ދީނާއި ގައުމިއްޔަތާ ގުޅުވައި ރަސްމާލެ ޕްރޮޖެކްޓާ މެދު ބިރުވެރިކަން އުފައްދަން މަސައްކަތް ކުރާ މީހުން އެކަން ކުރަމުން ދަނީ އެ ޕްރޮޖެކްޓު ކާމިޔާބު ވެއްޖެ ނަމަ އެ ބައެއްގެ ސިޔާސީ ހަޔާތަށް ހުރަސްއެޅިދާނެތީ ކަމަށް އިކޮނޮމިކް މިނިސްޓަރު މުހައްމަދު ސައީދު އިއްޔެ ވިދާޅުވެއްޖެ އެވެ.
ރަސްމާލެ ޕްރޮޖެކްޓާ ގުޅިގެން އިދިކޮޅު ސިޔާސީ މީހުން އަމާޒުކުރަމުންދާ ފާޑުކިޔުންތަކަށް ރައްދު ދެއްވަމުން ޕީއެސްއެމްއިން ގެނެސްދޭ "އަހާ" ފޯރަމްގައި ސައީދު ވިދާޅުވި ގޮތުގައި މި ސަރުކާރަކީ އިސްލާމް ދީނާއީ ގާނޫނު އަސާސީގެ އަސާސްތަކުގެ މައްޗަށް ވެރިކަން ކުރާ ސަރުކާރެކެވެ.
"އެނގިވަޑައިގަންނަވާނެ މި މާތްވެގެންވާ އިސްލާމްދީނަކީ އަދި މި ރާއްޖޭގެ ގާނޫނުއަސާސީއަކީ ހަމަގައިމު ވެސް މި ސަރުކާރު ރައީސް ޑޮކްޓާ މުހައްމަދު މުއިއްޒުގެ ސަރުކާރުން އެއްވެރިއަކަށް ބަލައިފިއްޔާ އެންމެ ބޮޑަށް މި އަސާސްގެ މަތީގައި [ހިންގާ] ސަރުކާރެއް. އަޅުގަނޑު ނުދަންނަވަން އެހެން ސަރުކާރުތައް މި އަސާސްގެ މަތީގައި ނޫނެކޭ،" ސައީދު ވިދާޅުވި އެވެ.
"އެހެންނަމަވެސް ވެރިއެއްގެ ހައިސިއްޔަތުން އަޅުގަނޑުމެންނަށް ފެންނާނެ، އަޅުގަނޑުމެން ކުރިމަތީގައި ހިނގާ ކަންތައްތައް މިއީ. އިސްލާމްދީނާ ރާއްޖޭގެ ސަގާފަތަށް ދިވެހިވަންތަކަމާ ގެއްލުވާލާނެ ވެރިއެއް ނޫން. ރައީސް މުހައްމަދު މުއިއްޒަކީ،"
ރަސްމާލޭ ޕްރޮޖެކްޓާ ދެކޮޅު މީހުންނަށް މި ރައްދު ދެއްވުމުގެ ކުރިން ސައީދު ވަނީ ރަސްމާލެ ޕްރޮޖެކްޓަކީ ކޮންމެހެން ވެސް ހިންގަން ޖެހޭ ޕްރޮޖެކްޓެއް ކަަމަށް ވިސްނައިދެއްވަން ގިނަ ސަބަބުތަކެއް ބަޔާންކުރައްވާފަ އެވެ. އޭނާގެ މި ވާހަކަ ފެއްޓެވީ ރާއްޖޭގެ ޓޫރިޒަމްގެ މިހާރު ހުރި އެސެޓުުތައް ބަޔާންކުރައްވަމުންނެވެ.
ސައީދު ވިދާޅުވި ގޮތުގައި ޓޫރިޒަމް ސިނާއަތަށް 5.5 ބިލިއަން ޑޮލަރު ލިބޭއިރު، އޭގެ ތެރެއިން ރާއްޖޭގެ އުފެއްދުންތެރިކަމަށް އިތުރުވަނީ ގާތްގަނޑަކަށް 1.7 ބިލިއަން ޑޮލަރެވެ. މި އަދަދުގެ ވަަށައިގެން ދިވެހި އިގުތިސޯދު އެނބުރޭއިރު، އިގުތިސޯދު ކުރިއަރުވަން ޓޫރިޒަމް ނޫން ކަމެއް ނުކުރެވޭ ކަމަށް އޭނާ ވިދާޅުވި އެވެ.
ޓޫރިޒަމްގެ 54 އަހަރުގެ ތާރީހުގެ ތެރޭގައި ގިނަ އަދަދެއްގެ އެސެޓުތަކެއް އުފެއްދި ރާއްޖޭގެ ނިސްބަތުން ބޮޑެތި އިންވެސްޓުމަންޓުތަކެއް ހުއްޓަސް، އެހެން ގައުމުތަކާ އަޅާ ބަލާއިރު، އިންވެސްޓްމަންޓުތައް ބޮޑު ނޫން ކަމަށް ސައީދު ވިދާޅުވި އެވެ.
"[ޓޫރިޒަމް] ވަށައިގެން އަޅުގަނޑުމެންގެ އިގުތިސޯދީ މި އެނބުރެނީ، އެހެން އެއްވެސް ކަމެއް، އެއްވެސްކަމެއް ރާއްޖޭގެ އިގުތިސޯދަކަށް ހައި އިމްޕެކްޓެއް އަންނާނެ ކަމެއް މިހާ ހިސާބަކަށް ކުރެވިފައެއް ނެތް... މި ދެންނެވި ޓުއަރިޒަމް އެސެޓްސްގެ ވެލިއު ގާތްގަނޑަކަށް އެކި މީހުން އެކި ހިސާބު ޖަހާ. އެހެންނަމަވެސް މި ހަމަ މާ ހައި، ބޮޑު އިންވެސްޓްމަންޓެއް ނޫން މިއީކީ. އޭގެ ޒާތަށް ބަލައިފިއްޔާ، އެހެން ގައުމުތަކާ ބަލައި،" އޭނާ ވިދާޅުވި އެވެ.
ރަސްމާލެ ޕްރޮޖެކްޓު ޖާއިޒުކުރަން ސައީދު ބޭނުންކުރެއްވި އަނެއް ނުކުތާއަކީ މުޅި އިގުތިސޯދު އެއް ސިނާއަތަކަށް ބަރޯސާވެފައި އޮތުމުގެ ނުރައްކަލެވެ. އޭނާ ވިދާޅުވީ، ގައުމުތައް ތަރައްގީވަމުންދާއިރު އެއް ސިނާއަތަކަށް ބަރޯސާވުމަކީ ނުރައްކަލެއް ކަމަށެވެ.
ސައީދު ގަބޫލުކުރައްވާ ގޮތުގައި މިއަދު ރާއްޖެއިން މި ފެންނަނީ ޓޫރިޒަމަށް ބަރޯސާވުމުގެ ނުރައްކަލެވެ. އަދި މިހާރު މި ލިބޭ އާމްދަނީއަށް ބަލައި، އިގުތިސޯދަށް އާދަޔާ ހިލާފު ބާރު ސްޕީޑެއް ނުގެނެސް ނުވަތަ ބޮޑު "ޖަމްޕެއް" ނުޖަހައި ވަށައިގެން އޮތް ވާދަވެރިކަމުގެ ތެރޭގައި ހިފެހެއްޓޭކަށް ނެތް ކަމަށް ވެސް އޭނާ ގަބޫލު ކުރައްވަ އެވެ.
މި ހާލަތުގައި ކަންކަން ހުރިއިރު، ސައީދު ވިދާޅުވީ، ދެން އޮތް ގޮތަކީ ސިންދަފާތުކުރުން ނުވަތަ ޑައިވާސިފައި ކުރުން ކަމަށެވެ. މިކަން ކުރާއިރު ވެސް ރާއްޖެއަށް އެކަށީގެން ނުވާ ކަހަލަ އިންޑަސްޓްރީތަކެއް ނުގެނެވޭނެ ކަމަށް އޭނާ ވިދާޅުވި އެވެ. އަދި ރިއަލް އެސްޓޭޓު ސިނާއަތް ރާއްޖެއާ ވަރަށް ގުޅޭ ކަމަށް މިނިސްޓަރު ވިދާޅުވި އެވެ.
"ރާއްޖޭގެ ޒީނަތްތެރިކަމާއި، ރާއްޖޭގެ ހަމަހިމޭންކަމާއި، ރާއްޖޭގެ މެހެމާންދާރީ އަދާކުރުމުގައި އޮތް ރީތި ސިފައަށް ބޭސްކޮށްގެން އިންވެސްޓްމަންޓް ބޮޑުކުރެވޭނެ. އެ ގޮތަށް ބަލާއިރުގައި ރާއްޖެއަށް އެންމެ އެކަށީގެން ވަނީ ރިއަލް އެސްޓޭޓު ވެސް މި ހަމަ މި އެ ސިފަޔާ އެކުގައި ބޮޑުކުރަމުން ގެނައުން އިނގޭތޯ،" ސައީދު ވިދާޅުވި އެވެ.
ސައީދު ވިދާޅުވި ގޮތުގައި، ވެލާނާ އިންޓަނޭޝަނަލް އެއަޕޯޓުގެ އިންވެސްޓުމަންޓު ވެސް ދެކޮޅު ޖައްސަން އީގަލްސް ހިލްސްގް ޕްރޮޖެކްޓު މުހިންމެވެ. އަދި، ރަސްމާލެ ޕްރޮޖެކްޓު ފަދަ ބޮޑު ޕްރޮޖެކްޓެއް ނުގެނެސް، މިހާރު ޓޫރިޒަމުން ލިބޭ އާމްދަނީއަށް ބަރޯސާވެގެން ތަރައްގީވެފައިވާ ގައުމަކަށް ރާއްޖެ ހެދުމަކީ "އިމްޕޮސިބަލް" ނުވަތަ ކުރެވޭނެ ކަމެއް ނޫން ކަމަށް އޭނާ ވިދާޅުވި އެވެ.
"އެ އަދަދު އެ ގޮތަށް ހިފަހައްޓައިގެން ތިބެގެނެއް 2040 ވަނަ އަހަރު އަންނައިރުގައި ރާއްޖެއަކީ ތަރައްގީވެފައި އޮތް ގައުމަކަށް ހެދުން އެއީ އިމްޕޮސިބަލް ކަމެއް. އެހެންވެއްޖެއްޔާ ރާއްޖޭގެ މި ވަގުތުގެ ޚަރަދުތައް ދެކޮޅުޖައްސާ ތަރައްގީވެފައި އޮތް ގައުމަކާ ދިމާލަށް ދިއުމަށްޓަކައި ރާއްޖެއަށް އާމްދަނީ އެބަޖެހޭ އެކްސެލަރޭޓެޑް ސްޕީޑުގައި ގެންނަން،" ސައީދު ވިދާޅުވި އެވެ.
ރަސްމާލެއަކީ ހުރިހާ މައްސަލައެއްގެ ހައްލު ކަމަށް ބުނެ ސަރުކާރުން ވިއްކަމުންދާއިރު، މި ޕްރޮޖެކްޓު ހިންގަން ކޮމާޝަލް ޓާމްސްގައި ސޮއިކޮށްފައިވާ އީގަލް ހިލްސްއަކީ އެކި ފިޔަވަހިތަކަށް ބަހާލައިގެން ވަރަށް ގިނަ ދުވަހުން ތަންތަން ތަރައްގީކުރާ ކުންފުންޏެކެވެ. މިހާތަނަށް އެ ކުންފުނިން މަސައްކަތް ފެށި ބޮޑެތި ޕްރޮޖެކްޓުތަކުގެ ތެރެއިން އެއްވެސް ޕްރޮޖެކްޓެއް އެއްކޮށް ނުނިމެ އެވެ.
އީގަލް ހިލްސްއިން އިންވެސްޓުކުރަމުން އަންނަ ގޮތަށް ބަލާއިރު، އެ ކުންފުނިން ޕްރޮޖެކްޓުތައް ހިންގަނީ ފައިނޭންސިން ހަމަޖެހުނު ވަރަކުން އެކި މަރުހަލާތަކަށް ބަހާލައިގެން ކަން ފާހަގަކުރެވެ އެވެ.
މިހެން ނަމަވެސް ދިވެހި ސަރުކާރުން ވަނީ ރަސްމާލެ ވޯޓާފްރަންޓް އެންޑް މެރީނާ ޕްރޮޖެކްޓުގެ ހުރިހާ ފިޔަވައްސެއް ނިންމަން ނަގާނީ 10 އަހަރު ކަަމަށް ބުނެފަ އެވެ. މާނައަކީ މިހާރު ރާވާފައިވާ ގޮތަށް އަންނަ އަހަރު މަސައްކަތް ފެށިޔަސް، މި ޕްރޮޖެކްޓު އެއްކޮށް ނިމޭނީ 2037 އަށެވެ.
މި މުއްދަތުގެ ތެރޭގައި ދިވެހި ދައުލަތަށް 10 ބިލިއަން ޑޮލަރުގެ އާމްދަނީއެއް ލިބޭނެ ކަމަށް ސަރުކާރުން ވަނީ ބުނެފަ އެެވެ. އަދި، މަޝްރޫއު ނިމުމުން އަހަރަކު އެއް ބިލިއަން ޑޮލަރު ދައުލަތަށް ވަންނާނެ ކަމަށް ވެސް ބުނެފައި ވެ އެވެ. ނަމަވެސް މިއީ ކޮން ގޮތަކުން ލިބޭނެ އާމްދަނީއެއް ކަމެއް ސަރުކާރުން އަދި ނުބުނެ އެވެ.
