ޔޫއޭއީގެ އީގަލް ހިލްސް ކުންފުންޏަށް ރަސްމާލޭގެ ދެބައިކުޅަ އެއްބައި ދޫކޮށްލުމާ ގުޅޭގޮތުން އަދާލަތު ޕާޓީގެ ލީޑަޝިޕަށް ސަރުކާރުން ޕްރެޒެންޓޭޝަނެއް ދީފި އެވެ.
އަދާލަތު ޕާޓީގެ ރަސްމީ އެކްސް އެކައުންޓުން ކުރި ޕޯސްޓެއްގައި ބުނީ ރަސްމާލެ މަޝްރޫއުއާ ގުޅޭގޮތުން އެ ޕާޓީން ސާފުކުރަން ބޭނުންވާ ކަންކަމާ ގުޅޭގޮތުން ހައުސިން މިނިސްޓަރު، އަބްދުﷲ މުއްތަލިބާ ބައްދަލުކޮށްފައިވާ ކަމަށެވެ.
އަދާލަތު ޕާޓީގެ ރައީސް، މުހައްމަދު ޝިފާންގެ އިތުރުން ވެސް އެ ޕާޓީގެ ބައެއް އެހެން އިސްވެރިން ބައިވެރިވެވަޑައިގެންނެވި އެ ބައްދަލުވުމުގައި ދެއްކި ވާހަކަތަކާއި ހިއްސާކުރި މައުލޫމާތުގެ ތަފުސީލެއް އެ ޕާޓީން ނުދެ އެވެ.
ސަރުކާރުގެ ފަރާތުން އަދާލަތު ޕާޓީއަށް ރަސްމާލެ މަޝްރޫއުއާ ގުޅޭގޮތުން މައުލޫމާތު ހިއްސާކޮށްފައި މިވަނީ، އެ މަޝްރޫއުއާ ގުޅޭގޮތުން ކަންބޮޑުވުމެއް އޮތްތޯ ބެލުމުގެ މަސައްކަތްތަކެއް ކުރަން ނިންމާފައިވާކަން އެ ޕާޓީން އިއުލާނުކުރި ފަހުންނެވެ.
ރަސްމާލެ ދިނީ 99 އަހަރަކަށް ނޫން, ތާއަބަދަށް!
"މިތަނުގެ ޕްރޮޕަޓީސްތައް ކުއްޔަށް ދޭނީ ދިވެހިރާއްޖޭގެ ގާނޫނުތަކުގެ ދަށުން 99 އަހަރަށް. އެތަންތަނުގެ ހައްގުތައް ވިއްކައިގެން ނުވަތަ ވާރުތައިން ވެސް އެހެން ފަރާތަކަށް ބަދަލުކޮށްފި ނަމަ 99 އަހަރުގެ އާ ކުލީގެ މުއްދަތެއް ފެށޭނެ. މީގެ ސަބަބުން އެތަން ގަންނަ ފަރާތްތަކުގެ އަތުގައި އެތައް ޖީލަކަށް އެތަންތަން ދެމިގެންދާނެ."
އަދާލަތު ޕާޓީގެ އިތުރުން، ރަސްމާލެ މަޝްރޫއުއާ ގުޅޭގޮތުން ސަރުކާރުން މިހައިތަނަށް ހާމަނުކޮށް ހުރި މައުލޫމާތުތައް ހާމަކޮށްދިނުމަށް އެދި ޕީއެންއެފްއިން ވެސް ވަނީ ރައީސް މުހައްމަދު މުއިއްޒުއަށް ސިޓީއެއް ފޮނުވައިފަ އެވެ.
ޕީއެންއެފްއިން ފޮނުވާފައިވާ ސިޓީގައި ބުނީ ރަސްމާލެ ޑީލްގައި ގޮތް ނޭނގޭ އެތައް ކަމެއް ހުރި ކަމަށެވެ. އަދި، އެ މުއާމަލާތުގެ ސަބަބުން ދިވެހި ރައްޔިތުންނަށާއި ދިވެހި ދައުލަތުގެ މިނިވަންކަމާއި އިސްތިގުލާލަށް ނުރައްކާވެދާނެ ކަމަށް ބެލެވޭ ކަމަށް ވެސް އެ ސިޓީގައި ބުންޏެވެ.
އެހެންކަމުން މިހައިތަނަށް އެ މުއާމަލާތާ ބެހޭގޮތުން ސަރުކާރުން ހާމަނުކޮށް ހުރި 34 ކަމެއް ސާފުކޮށްދިނުމަށް އެ ސިޓީގައި ރައީސްގެ ކިބައިން އެދިފައިވެ އެވެ.
ރަސްމާލެ އުމުރަށް ދޫކޮށްލަން ހެދި އެއްބަސްވުމުގެ ހަގީގަތް އޮޅުވާލަން މިނިސްޓަރު މުއްތަލިބު މަސައްކަތް ކުރައްވަނީ
"ރަސްމާލޭން ޕްރޮޕަޓީ ގަންނަ ފަރާތުގެ މިލްކަކީ އެ ޕްރޮޕަޓީއެކެވެ. އެ ޕްރޮޕަޓީ ހިމެނޭ ބިމަކީ ދިވެހި ދައުލަތުގެ މިލްކެއް. އެ ޕްރޮޕަޓީއެއް ވިއްކާލާ ނަމަ، ނުވަތަ އެފަރާތެއް މަރުވުމުން ވާރުތަވާ ނަމަ، ވާރުތަވާނީ ދިވެހި ސަރުކާރުން ބަލަންޖެހޭ ކަންކަން ބެލުމަށްފަހު ހުއްދަކުރާނަމަ،" މުއްތަލިބު ވިދާޅުވި އެވެ.
އީގަލް ހިލްސްއަށް ރަސްމާލެ ދޭން ސިއްރު އެގްރިމެންޓެއްގައި ސޮއި ކުރީ މިދިޔަ މަހުގެ 21 ގަ އެވެ. އެ އެގްރިމެންޓު ހާމަނުކޮށް ސަރުކާރުން ބުނަމުން އައީ ރަސްމާލެ ދިނީ 99 އަހަރަށް ކަމަށެވެ. އެތަން ދިނީ، ލީސް އެކުއިޒިޝަން ކޮސްޓެއް އަދި ކުއްޔެއް ވެސް ނުނަގާ ގޮތަށް މުޅިން ހިލެ އެވެ.
މި މައްސަލައިގައި ސަރުކާރަށް އިންތިހާއަށް ފާޑުކިޔުން އަމާޒުވި ނަމަވެސް ސަރުކާރުން މަސައްކަތް ކުރަމުން އަންނަނީ މިއީ ރަނގަޅު މުއާމަލާތެއް ކަމުގައި ދައްކާށެވެ. އެ ގޮތުން މިއީ އާންމު އުސޫލުން ރިސޯޓުތައް ދޭ ގޮތަށް ދީފައިވާ ތަނެއް ކަމަށާއި މި އިންވެސްޓުމަންޓުން ރާއްޖެ ނުދެކޭ ވަރުގެ އާމްދަނީ ވަންނާނެ ކަމަށް އަންނަނީ ބުނަމުންނެވެ.
