ޔުނައިޓެޑް އެރަބް އެމިރޭޓްސްގެ އަމިއްލަ ކުންފުންޏަކަށް ރަސްމާލެ އުމުރަށް ދޫކޮށްލަން ހެދި އެއްބަސްވުމުގެ ހަގީގަތް އޮޅުވާލަން ކޮންސްޓްރަކްޝަން މިނިސްޓަރު އަބްދުﷲ މުއްތަލިބު މަސައްކަތް ކުރައްވަން ފަށްޓަވައިފި އެވެ.
ރަސްމާލެއިން ހިއްކާ 1010 ހެކްޓަރުގެ ތެރެއިން 500 ހެކްޓަރު ދިނީ އީގަލް ހިލްސްއަށެވެ. ބިދޭސީ މަހުޖަނުންނަށް ދާއިމަށް ދިރިއުޅެވޭ ގޮތަށް ހަދާ އެ ރަށުގެ އެޕާޓްމަންޓްތައް ވިއްކުމުގެ މަސައްކަތް މިހާރު އެ ކުންފުނިން ވަނީ ފަށައިފަ އެވެ.
ސްމާލެ އީގަލް ހިލްސްއަށް ދިނީ މުޅި އުމުރަށް ވެސް ދިވެހިންނަށް އެތަން ނުލިބޭ ގޮތަށް ކަމަށް އެ ކުންފުނިން ވަނީ ހާމަކޮށްފަ އެވެ. އެތަނުން ވިއްކާ އެޕާޓްމަންޓެއް ނުވަތަ ބިމުގެ ފުރަތަމަ 99 އަހަރު ހަމަނުވަނީސް ވިއްކާލައިފި ނަމަ ނުވަތަ ވާރުތައިން ދީފި ނަމަ, އަލަށް ގަންނަ މީހާއަށް ވެސް އަލުން އިތުރު 99 އަހަރަށް އެތަން ލިބޭނެ ކަމަށް އީގަލް ހިލްސް އިން ޔަގީންކަންނދެ އެވެ.
"މިތަނުގެ ޕްރޮޕަޓީސްތައް ކުއްޔަށް ދޭނީ ދިވެހިރާއްޖޭގެ ގާނޫނުތަކުގެ ދަށުން 99 އަހަރަށް. އެތަންތަނުގެ ހައްގުތައް ވިއްކައިގެން ނުވަތަ ވާރުތައިން ވެސް އެހެން ފަރާތަކަށް ބަދަލުކޮށްފި ނަމަ 99 އަހަރުގެ އާ ކުލީގެ މުއްދަތެއް ފެށޭނެ. މީގެ ސަބަބުން އެތަން ގަންނަ ފަރާތްތަކުގެ އަތުގައި އެތައް ޖީލަކަށް އެތަންތަން ދެމިގެންދާނެ،" އީގަލް ހިލްސް އިން ބުނެފައިވެ އެވެ.
ރަސްމާލެ ދޫކޮށްލުމުގެ އެއްބަސްވުމުގައި ދިވެހި ސަރުކާރުގެ ފަރާތުން ސޮއި ކުރެއްވި މިނިސްޓަރު މުއްތަލިބު މިއަދު ކުރެއްވި ޕޯސްޓެއްގައި ވިދާޅުވީ، ރަސްމާލޭގައި ބިނާ ކުރާ ހުރިހާ ތަނެއް ބިދޭސީންނަށް މިލްކުވި ނަމަވެސް، މީގެ 99 އަހަރު ފަހުން ރަސްމާލޭގެ ބިން ދިވެހި ސަރުކާރަށް ލިބޭނެ ކަމަށެވެ.
"ރަސްމާލޭން ޕްރޮޕަޓީ ގަންނަ ފަރާތުގެ މިލްކަކީ އެ ޕްރޮޕަޓީއެކެވެ. އެ ޕްރޮޕަޓީ ހިމެނޭ ބިމަކީ ދިވެހި ދައުލަތުގެ މިލްކެއް. އެ ޕްރޮޕަޓީއެއް ވިއްކާލާ ނަމަ، ނުވަތަ އެފަރާތެއް މަރުވުމުން ވާރުތަވާ ނަމަ، ވާރުތަވާނީ ދިވެހި ސަރުކާރުން ބަލަންޖެހޭ ކަންކަން ބެލުމަށްފަހު ހުއްދަކުރާނަމަ،" މުއްތަލިބު ވިދާޅުވި އެވެ.
މުއްތަލިބު އެހެން ވިދާޅުވި ނަމަވެސް ބިދޭސީ ފަރާތަކުން އިމާރާތް މިލްކު ކުރާ ނަމަ، އެތަން އަޅާފައި އޮތް ބިން ދިވެހިންނަށް މިލްކުވުމެކޭ ނުވަތަ ނުވުމުކޭ ވާނީ އެއްވަރެކެވެ. އެއްބަސްވުން ދެމިއޮތްހާ ހިނދަކު ރަސްމާލޭގެ އިމާރާތްތައް ވިއްކާލުމާއި ވާރުތަކުރުމުގެ ހައްގު ބިދޭސީންނަށް ލިބޭނެ އެވެ.
