ރަސްމާލެއަށް ގެންނަން މި ސަރުކާރުން މަސައްކަތްކުރާ ފަދަ އިންވެސްޓުމެންޓުތައް ހުއްޓުވުމަކީ ދިވެހީންނަށް ލިބޭނެ ގެއްލުމެއް ކަމަށް ރައީސުލްޖުމްހޫރިއްޔާގެ ނޭޝަނަލް ޓެރިޓަރީ ސެކްރެޓަރީ އާޒިމާ ޝަކޫރު ވިދާޅުވެއްޖެ އެވެ.
ސޯޝަލްމީޑިއާގައި ކުރި ޕޯސްޓެއްގައި އާޒިމާ ވިދާޅުވީ ދިވެހިރާއްޖެއަށް އިންވެސްޓުކުރުމަށް ބޭރުގެ ބަޔަކު އައުމުން އެކަމާމެދު އީޖާބީ ނަޒަރަކުން ވިސްނަންޖެހޭ ކަމަށެވެ.
"ސިޔާސީ ވިސްނުމުގައި ސަރުކާރު ބަލިކުރަން އިންވެސްޓްމެންޓުތައް ބޭރުކުރީމާ ގެއްލުންވަނީ ވެރިމީހާއަކަށް ނޫން. ގެއްލުންވަނީ ހުރިހާ ދިވެހީންނަށް. މިކަން މިހައިހިސާބަށް ސިޔާސީ ވިސްނުމުގައި ދިވެހިރާއްޖެއިން ފަހާލެވުނު ބޮޑެތި އިންވެސްޓްމެންޓުތަކާއި އެ ފައިސާ ދުނިޔޭގައި ދެން އިންވެސްޓްކުރެވުނު ގޮތްތަކުން އެ ހުރީ ފެންނާން،" އާޒިމާ ވިދާޅުވި އެވެ.
އާޒިމާ ވިދާޅުވީ ރާއްޖެއަށް އެކަށީގެންވާ އިންވެސްޓުމެންޓުތަކެއް ގެނެވޭނީ އެ ބަޔަކަށް ވެސް އެކަށީގެންވާ މުއްދަތެއް ދީގެން ކަމަށެވެ. އެގޮތުން، 99 އަހަރަށް ބޭރުބަޔަކަށް ބިން ކުއްޔަށް ދީގެން ކަންބޮޑުވާން ނުޖެހޭ ކަމަށް އާޒިމާ ވިދާޅުވި އެވެ.
"ކަންބޮޑުވާންޖެހޭނީ މުއްދަތު ކުރުވިޔަސް ދިވެހި ދައުލަތުގެ ދުސްތޫރީ އަދި، ގާނޫނީ އޮނިގަނޑުގެ ދަށުގައި އިންވެސްޓްމެންޓުތައް ނުހުންނަ ނަމަ، ވާންޖެހޭ ކަންބޮޑުވުން،" އާޒިމާ ލިޔުއްވާފައިވެ އެވެ.
އެ ވާހަކަދެއްކުމުން ޖީއެމްއާރުގެ ވާހަކަ މީހުން ދައްކާނެކަން ފާހަގަކުރައްވައި އާޒިމާ ވިދާޅުވީ އެ އެއްބަސްވުން ބާތިލުކުރީ ރާއްޖޭގެ މާލީ، ގައުމީ ސަލާމަތާއި އަދި ފަތުރުވެރިކަމުގެ ސިނާއަތަށް ސީދާ ގޮންޖެހުންތަކެއް ހުރެގެން ކަމަށެވެ.
އީގަލް ހިލްސްއަށް ރަސްމާލެ ދޭން ސިއްރު އެގްރިމެންޓެއްގައި ސޮއި ކުރީ މިދިޔަ ހަފްތާގެ ހޯމަ ދުވަހެވެ. އެ އެގްރިމެންޓު ހާމަނުކޮށް ސަރުކާރުން ބުނަމުން އައީ ރަސްމާލެ ދިނީ 99 އަހަރަށް ކަމަށެވެ. އެތަން ދިނީ، ލީސް އެކުއިޒިޝަން ކޮސްޓެއް އަދި ކުއްޔެއް ވެސް ނުނަގާ ގޮތަށް މުޅިން ހިލެ އެވެ.
މި މައްސަލައިގައި ސަރުކާރަށް އިންތިހާއަށް ފާޑުކިޔުން އަމާޒުވި ނަމަވެސް ސަރުކާރުން މަސައްކަތް ކުރަމުން އަންނަނީ މިއީ ރަނގަޅު މުއާމަލާތެއް ކަމުގައި ދައްކާށެވެ. އެ ގޮތުން މިއީ އާންމު އުސޫލުން ރިސޯޓުތައް ދޭ ގޮތަށް ދީފައިވާ ތަނެއް ކަމަށާއި މި އިންވެސްޓުމަންޓުން ރާއްޖެ ނުދެކޭ ވަރުގެ އާމްދަނީ ވަންނާނެ ކަމަށް އަންނަނީ ބުނަމުންނެވެ.
