ގާހިރާ، މިސްރު (ސެޕްޓެމްބަރު 27) - އަންނަ އަންގާރަ ދުވަހު، އެފްރިކަން ކަޕް އޮފް ނޭޝަންސްގެ ކޮލިފައިންގައި މިސްރުން ސައުތު ސޫދާނާ ދެކޮޅަށް ކުޅޭ މެޗުގައި މިސްރުގެ ކެޕްޓަން، މުހައްމަަދު ސަލާހު ނުކުޅެން ނިންމައިފި އެވެ.
އުމުރުން 34 އަހަރުގެ ސަލާހު ވަނީ، މިސްރުން އެފްރިކަން ކަޕް އޮފް ނޭޝަންސްގެ ކޮލިފައިންގައި އެންގޯލާއާ ލަނޑެއް ނުޖެހި އެއްވަރުވި މެޗުގައި ކުޅެފަ އެވެ. ހުކުރު ދުވަހު ކުޅުނު މި މެޗުގައި، ސަލާހު ވަނީ 60 މިނިޓަށް ފަހު ބަދަލުކޮށްފަ އެވެ.
މިސްރު ފުޓްބޯޅަ އެސޯސިއޭޝަނުން ނެރުނު ބަޔާނެއްގައި ބުނެފައިވަނީ، މި މަހު 29 ވަނަ ދުވަހު (އަންގާރަ ދުވަހު) ސައުތު ސޫދާނާ ދެކޮޅަށް ކުޅޭ މެޗުގައި ސަލާހު ނުކުޅޭނެ ކަމަށެވެ. އަދި، އެ ނިންމުމަކީ، މިސްރުގެ ކޯޗު ހޮސާމް ހަސަންއާ މަޝްވަރާ ކުރުމަށް ފަހު ސަލާހު އެދިގެން ނިންމި ނިންމުމެއް ކަމަށް މިސްރުގެ އެފްއޭއާ ހަވާލާދީ މިސްރުގެ މީޑިއާތަކުން ވަނީ ރިޕޯޓްކޮށްފަ އެވެ.
ތުރުކީ ސުޕަ ލީގުގެ ޓްރަބްޒޯންސްޕޯރަށް ކުޅެމުން އަންނަ ލިވަޕޫލްގެ ކުރީގެ ތަރި، ސަލާހު މި ގޮތަށް އެދިފައިވަނީ ސައުތު ސޫދާނުގައި ކުޅެން ޖެހޭ މެޗު އޮތީ އާޓިފިޝަލް ޓާފް ދަނޑެއްގައި ކަމަށްވާތީ އެވެ. ޕްރޮފެޝަނަލް ގިނަ ކުޅުންތެރިން މި ފަަހުން އަންނަނީ އަނިޔާގެ މައްސަލަތަކުން ސަލާމަތްވުމުގެ ގޮތުން، އާޓިފިޝަލް ޓާފު ދަނޑުތަކުގައި ކުޅޭ މެޗުތަކުގައިި ނުކުޅެން ނިންމަމުންނެވެ. އެ ގޮތުން، މި ފަހުން، ބްރެޒިލްގެ ތަރި، ނޭމާ ވެސް ސަންޓޯސް އިން ޓާފްގައި ކުޅޭ ގިނަ މެޗުތަކުގައި ނުކުޅެ އެވެ.
އިނގިރޭސި ޕްރިމިއާ ލީގުގެ މޮޅު ކުޅުންތެރިޔާގެ މަގާމު ތިން ފަހަރު ހޯދާފައިވާ ސަލާހު ވަނީ އެ ޓީމާ އެކު ބޮޑު ނުވަ މުބާރާތެއްގެ ތަށި އުފުލާލައިފަ އެވެ. އެ ޓީމަށް ކުޅުނު 442 މެޗުން 257 ގޯލު ޖެހި އެވެ. ޓްރަބްޒޯންސްޕޯރާ ގުޅުމަށް ފަހު، ތުރުކީ ސުޕަ ލީގުގައި މިހާތަނަށް ކުޅުނު ހަ މެޗުން ހަތް ގޯލު ޖަހައި، ދެ ލަނޑު ޖަހަން ފުރުސަތު ތަނަވަސްކޮށްދިނެވެ.
