އިސްތަންބޫލް، ތުރުކީ (އޮގަސްޓް 2) - މި ވަގުތު އެއްވެސް ކްލަބެއްގެ ކޮންޓްރެކްޓެއްގައި ނެތް، މިސްރުގެ ގައުމީ ފުޓްބޯޅަ ޓީމުގެ ކެޕްޓަން، މުހައްމަދު ސަލާހު ގެންދަން ތުރުކީ ސުޕަ ލީގުގެ ޓްރަބްޒޯސްޕޯ އިން ކުރާ މަސައްކަތް ވަރުގަދަކޮށްފައިވާ ކަމަށް ރިޕޯޓްތައް ބުނެފި އެވެ.
އުމުރުން 34 އަހަރުގެ ސަލާހުގެ ސޮއި ހޯދަން ތުރުކީ ސުޕަ ލީގުގެ ކްލަބް ބެސިކްޓާސްގެ މެނޭޖްމަންޓަށް އެ ކްލަބްގެ ސަޕޯޓަރުން އަންނަނީ ޕްރެޝަރު ބޮޑު ކުރަމުންނެވެ. .
ރިޕޯޓްތައް ބުނާގޮތުން، ބެސިކްޓާސް އިން ވަނީ ސަލާހަށް އަހަރަކު، 15 މިލިއަން ޑޮލަރުގެ މުސާރައެއް ލިބޭ ޕްރޮޕޯސަލެއް ހުށަހަޅައިފަ އެވެ. އެ ޑީލްގެ ކަންކަން ކުރިއަށްދަނިކޮށް، މަޝްވަރާތައް މަޑުޖެހިފައިވަނީ، ސަލާހު، ފުރަތަމަ ކޮންޓްރެކްޓްގައި ސޮއިކުރާއިރު، ހަމަޖައްސަައިދޭ ބޯނަހުގައި، ސަލާހުގެ އޭޖެންޓް ރަމީ އައްބާސް އަށް 30 ޕަސެންޓްގެ ކޮމިޝަނެއް ހަމަޖައްސައިދޭން ހުށަހެޅުމުން ކަމަށް ރިޕޯޓްތައް ބުނެ އެވެ.
އެކަމާ ބެހޭގޮތުން، މިސްރު މީޑިއާ އިން ސުވާލުކުރުމުން، އައްބާސް ބުނެފައިވަނީ، ސަލާހު ކުޅޭނެ ކްލަބެއް ވަރަށް އަވަހަށް ފައިނަލް ވެގެންދާނެ ކަމަށެވެ. އެކަމަކު، އޭގެ ފަހުން، ސަލާހުގެ ޓްރާންސްފާގެ ކަންކަމުގެ އެއްވެސް ހަރަކާތެއް ނުހިނގާތާ ދެ ހަފްތާ އަށް ވުރެން ގިނަ ދުވަސް ވަނީ ވެފަ އެވެ.
އެއާ އެކު، ތުރުކީ ސުޕަ ލީގުގެ ޓްރަބްޒޯންސްޕޯރުން ސަލާހުގެ ސޮއި ހޯދުުމުގެ ޑީލަށް ވަނީ ވަދެފަ އެވެ. ރިޕޯޓްތައް ބުނާގޮތުން، ޓްރަބްޒޯންސްޕޯރުން ހުށަހަޅަނީ، ދެ އަހަރުގެ ކޮންޓްރެކްޓެކެވެ. އެއީ، ޖުމްލަ އެކު، 25 މިލިއަން ޑޮޮލަރަށް ވުރެން އިތުރު ޑީލެއް ކަމަށް ރިޕޯޓްތައް ބުނެ އެވެ. އަދި، ސަލާހު، އެ ކްލަބާ އެކު ކޮންޓްރެެކްޓްގައި ސޮއިކުރާއިރު، މުސާރައިގެ އިތުރުން ބޯނަހެއް ހަމަޖެއްސުމާއި ދެ އަހަރުގެ ކޮންޓްރެކްޓް ފުރިހަމަަކޮށްފިނަމަ އަދި އިތުރު ބޯނަހެއް ލިބޭ ގޮތަށް ވެސް ޓްރަބްޒޯންސްޕޯރުން ވަނީ ޕްރޮޕޯސަލްގައި ހިމަނައިފަ އެވެ.
ބެސިކްޓާސް އާއި ޓްރަބްޒޯންސްޕޯރުގެ އިތުރުން، ސަލާހުގެ ސޮއި ހޯދުމަށް ރޯމާ އާއި އެތުލެޓިކޯ މެޑްރިޑްގެ އިތުރުން، ސައުދީ ޕްރޯ ލީގާއި އެމްއެލްއެސްގެ ކްލަބްތައް އަންނަނީ ޕްރޮޕޯސަލްތައް ހުށަހަޅަމުންނެވެ. އަދި، ޗެލްސީގެ ކޯޗު ޒަބީ އަލޮންސޯ ވެސް ސަލާހު އެ ޓީމަށް ގެންދަން ޝައުގުވެރިވާ ކަމަށް އިނގިރޭސި ބައެއް ނޫސްތަކުން ރިޕޯޓްކޮށްފައިވެ އެވެ.
އެކަމަކު، ސަލާހުގެ ވިސްނުމަކީ ޔޫރަޕްގެ ކްލަބަކަށް ބަދަލުވުންކަމަށް ރިޕޯޓްތައް ބުނެ އެވެ.
ކުރިން ޗެލްސީ އަށް ކުޅުނު ސަލާހު، ލިވަޕޫލާ ގުޅުނީ، 2017 ވަނަ އަހަރު އިޓަލީގެ ރޯމާ ދޫކޮށް ޖުމްްލަ އެކު، 45 މިލިއަން ޑޮލަރުގެ ޕެކޭޖެއްގަ އެވެ. އޭގެ ފަހުން، ތިން ފަހަރެއްގެ މަތިން ސަލާހު ލިވަޕޫލާ އެކު، އެއްބަސްވުމެއް ހަދައި، އެ ޓީމު ދޫކޮށްލަން މި ނިންމީ ނުވަ އަހަރު އެ ޓީމަށް ކުޅެ، ގިނަ ކާމިޔާބީތަކެއް ހޯދުމަށް ފަހު އެވެ.
ލިވަޕޫލަށް ކުޅެދިން، 442 މެޗުން 257 ލަނޑު ޖެހި ސަލާހު ވަނީ، އެ މެޗުތަކުގައި، 123 ލަނޑު ޖަހަން ފުރުސަތު ތަނަވަސްކޮށްދީފަ އެވެ.
ލިވަޕޫލާ އެކު، ގިނަ ރެކޯޑްތަކެއް ހަދާފައިވާ ސަލާހު ވަނީ އެ ޓީމާ އެކު، ދެ ފަހަރު ޕްރިމިއާ ލީގާއި އެއް ފަހަރު ޗެމްޕިއަންސް ލީގާއި ކްލަބް ވޯލްޑް ކަޕާއި ޔުއެފާ ސުޕަ ކަޕާއި އެފްއޭ ކަޕްގެ އިތުރުން ދެ ފަހަރު ލީގު ކަޕްގެ ޗެމްޕިއަންކަން ހޯދައިފަ އެވެ. ސަލާހަކީ ޕީއެފްއޭ އިން ހޮވާ އެންމެ މޮޅު ކުޅުންތެރިޔާގެ މަގާމު ތިން ފަހަރެއްގެ މަތިން ހޯދި ހަމައެކަނި ކުޅުންތެރިޔާ އެވެ.
