އެމެރިކާ އާއި އިނގިރޭސިވިލާތުގެ މުހިންމު އަސްކަރީ މަރުކަޒެއް ގާއިމުކޮށްފައިވާ ޗާގޯސް ޖަޒީރާތައް މޮރިޝަސްއާ ހަވާލުކުރުމަށް ވެފައިވާ އެއްބަސްވުން އަލުން މުރާޖާކުރާނެ ކަމަށް އިނގިރޭސިވިލާތުގެ ޑިފެންސް ސެކްރެޓަރީ ވެސް ސްޓްރީޓިން ވިދާޅުވެއްޖެ އެވެ.
މި ނިންމުން ނިންމާފައިވަނީ އެމެރިކާގެ ރައީސް ޑޮނަލްޑް ޓްރަމްޕް އެ އެއްބަސްވުމާ ދެކޮޅަށް ވަރަށް ބޮޑަށް ފާޑުވިދާޅުވަމުން ގެންދަވާ ދަނޑިވަޅެއްގަ އެވެ.
އިންޑިއާ ކަނޑުގައި އޮންނަ މި ޖަޒީރާތައް އިނގިރޭސިވިލާތުގެ ކުރީގެ ކޮލޮނީއެއް ކަމަށްވާ މޮރިޝަސްއާ ހަވާލުކުރުމަށާއި، އަސްކަރީ މަރުކަޒު ހުންނަ ޑިއޭގޯ ގާސިއާ އެއްގަރުނުގެ މުއްދަތަށް ކުއްޔަށް ހިފުމަށް 2025 ވަނަ އަހަރު އެއްބަސްވި ރޭވުންތައް މަޑުޖައްސާލާފައިވާކަން އިނގިރޭސި ސަރުކާރުން އޭޕްރީލް މަހު ވަނީ ކަށަވަރުކޮށްދީފަ އެވެ.
މި ބަދަލު އައިސްފައިވަނީ، ކުރިން އެ އެއްބަސްވުމަށް ތާއީދުކުރެއްވި ނަމަވެސް ފަހުން އެއީ "ވަރަށް ބޮޑު މޮޔަކަމެއް" ކަމަށް ސިފަކުރައްވައި ޓްރަމްޕް ދެއްވި ވަރުގަދަ ހަމަލާތަކާ ގުޅިގެންނެވެ.
އެމެރިކާގެ ނުފޫޒުގަދަ ރައީސް ޓްރަމްޕް ވަނީ، މިދިޔަ ޖުލައި މަހު ކިއާ ސްޓާމާގެ ބަދަލުގައި އިނގިރޭސި ބޮޑުވަޒީރުކަމާ ހަވާލުވެވަޑައިގެންނެވި އެންޑީ ބާންހަމްއާ އެކު ސެޕްޓެމްބަރު 22 ވަނަ ދުވަހު ބޭއްވި ފުރަތަމަ ބައްދަލުވުމުގައި ވެސް އެ އެއްބަސްވުމާ ދެކޮޅަށް ވާހަކަދައްކަވާފަ އެވެ.
ނިއުޔޯކުގައި ކުރިއަށްދާ އދ. ގެ އާންމު މަޖިލީހުގެ ހަވާސާގައި ބޭއްވި މި ބައްދަލުވުމުގައި ޓްރަމްޕް ވިދާޅުވީ، ބާންހަމް އެ "ގޯސް" އެއްބަސްވުމާ މެދު އަލުން ވިސްނަވާނެ ކަމަށް ގަބޫލުކުރައްވާ ކަމަށެވެ. ޓްރަމްޕް މިހެން ވިދާޅުވިއިރު، އަރިހުގައި އިންނެވި އިނގިރޭސި ބޮޑުވަޒީރު ވަނީ ބޯޖައްސަވައި އެކަމަށް އެއްބަސްވެވަޑައިގެންފަ އެވެ.
ބާންހަމް ފަހުން މީޑިއާތަކަށް މައުލޫމާތު ދެއްވަމުން ވިދާޅުވީ، މި ނާޒުކު މައްސަލައިގައި ހައްލެއް ހޯދުމަށް އިނގިރޭސިވިލާތުން "ވަރަށް ބޮޑަށް މަސައްކަތް ކުރާނެ" ކަމަށާއި، އެމެރިކާގެ ބައިވެރިންނާ ގުޅިގެން ހައްލެއް ފެންނާނެ ކަމުގެ ފުރިހަމަ އިތުބާރު އެބައޮތް ކަމަށެވެ.
އޭގެ މަދު ގަޑިއިރުތަކެއް ފަހުން ސްޓްރީޓިން ވެސް ވަނީ އެ މޭރުމުން ވާހަކަދައްކަވާފަ އެވެ.
ބީބީސީއަށް ދެއްވި އިންޓަވިއުއެއްގައި އޭނާ ވިދާޅުވީ، އެމެރިކާގެ ބައިވެރިންނާއި ރައީސް ޓްރަމްޕްގެ ސަރުކާރާ ގުޅިގެން، އެ އެއްބަސްވުމަކީ އިނގިރޭސިވިލާތަށް ތާއީދުކުރެވޭނެ ފަދަ އެއްބަސްވުމަކަށް ހެދުމަށް އިތުރު މަސައްކަތްތަކެއް ކުރަންޖެހޭ ކަމަށެވެ.
މީގެ އިތުރުން ޓައިމްސް ރޭޑިއޯއަށް ދެއްވި އިންޓަވިއުއެއްގައި އޭނާ ވިދާޅުވީ، މައްސަލައަށް ފިލައިގެން ތިބުމަކީ ބުއްދިވެރި ގޮތެއް ނޫން ކަމަށާއި، ވަކިން ހާއްސަކޮށް މިއީ ދުނިޔޭގެ އެކި ކަންކޮޅުތަކުގައި ހުރި އިނގިރޭސިވިލާތުގެ ގައުމީ ސަލާމަތާ ގުޅުންހުރި އެންމެ މުހިންމު ވަސީލަތްތަކުގެ ތެރެއިން ވަސީލަތަކަށް ވާތީ އެކަމުގައި ފަރުވާކުޑަކުރެވެން ނެތް ކަމަށެވެ.
ކުރީގެ ބޮޑުވަޒީރު ސްޓާމާ އެ އެއްބަސްވުން އެކުލަވާލީ، ބައިނަލްއަގުވާމީ ގާނޫނީ ނިންމުންތަކުގެ ސަބަބުން ޗާގޯސްގެ މިލްކުވެރިކަމާ މެދު ސުވާލު އުފެދިފައިވާތީ، އެތަނުގައި ހުރި އަސްކަރީ މަރުކަޒު ދެމެހެއްޓޭނީ ހަމައެކަނި މޮރިޝަސްއާ އެކު އެއްބަސްވުމަކަށް އައިސްގެން ކަމަށް ވިދާޅުވަމުންނެވެ.
1960 ގެ އަހަރުތަކުގައި މޮރިޝަސްއަށް މިނިވަންކަން ލިބުނު ފަހުން ވެސް ޗާގޯސް ޖަޒީރާތަކުގެ ކޮންޓްރޯލް ބޭއްވީ އިނގިރޭސިވިލާތުންނެވެ.
އެ ދުވަސްވަރު އިނގިރޭސިވިލާތުން ވަނީ ޗާގޯސްގެ އެތައް ހާސް ރައްޔިތުންނެއް އެ ރަށްތަކުން ބޭރުކޮށް، މޮރިޝަސްއަށް ފޮނުވާލާފަ އެވެ. އޭގެ ފަހުން އެ މީހުން ދަނީ ބަދަލު ހޯދުމަށް އިނގިރޭސި ކޯޓުތަކުގައި ގާނޫނީ ގޮތުން ވަކާލާތު ކުރަމުންނެވެ.
2019 ވަނަ އަހަރު އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ލަފާދީފައިވަނީ އެ ޖަޒީރާތައް މޮރިޝަސްއާ ހަވާލުކުރުމަށެވެ.
އެ އެއްބަސްވުމުގެ ދަށުން އިނގިރޭސިވިލާތަށް 99 އަހަރުގެ މުއްދަތަށް އެ އަސްކަރީ މަރުކަޒު ކުއްޔަށް ލިބޭނެ އެވެ. އަދި އެ މުއްދަތު އިތުރުކުރުމުގެ އިޚްތިޔާރު ވެސް ލިބިގެންވެ އެވެ.
