ދ. މީދޫގައި ޕްރޮގްރާމްއެއް ޝޫޓުކުރަމުން ދަނިކޮށް ރައީސުލްޖުމްހޫރިއްޔާ މުހައްމަދު މުއިއްޒުގެ އަނބިކަނބަލުން، ސާޖިދާ މުހައްމަދުގެ ބޮޑުބޭބެ އާއި ޕީއެންސީގެ ބަޔަކު ރާއްޖެ ޓީވީގެ ނޫސްވެރިންނަށް ހުރަސްއަޅައި މާރާމާރީ ހިންގައިފި އެވެ.
ރާއްޖެ ޓީވީގެ ހެޑް އޮފް ޕްރޮގްރާމްސް، އާމިރު ސަލީމް މި ނޫހަށް ވިދާޅުވީ އެ މީހުންނަށް މީދޫއިން ހުރަސްއެޅީ ރާއްޖެ ޓީވީން ގެނެސްދޭ ހާލު ކިހިނެއް ޕްރޮގްރާމް ޝޫޓިން ކުރިއަށް ގެންދަނިކޮށް ކަމަށެވެ.
"ޝޫޓިންގައި ތިއްބާ ރައީސްގެ އަނބިކަނބަލުން، ސާޖިދާގެ އާއިލާގެ ބައެއް މީހުން، އަބްދުﷲ ލަތީފްއަކާއި ޕީއެންސީގެ [ދ. މީދޫ] ސްޓިއަރިން ކޮމިޓީގެ ރައީސް، ހާލިދަކާއި ދެން، މީދޫ ކައުންސިލުގެ ކުރީގެ ނައިބުރައީސް، އަލީ ޝަރީފްއަކާއި އެ މީހުންނާ އެއްކޮށް ދެން ގްރޫޕެއް އައީ،" އާމިރު ވިދާޅުވި އެވެ.
"އައިސް އަޅުގަނޑުމެން ތިބިތަނުގައި އިށީނދެ އަޑުގަދަކޮށް ހަޅޭއްލަވައި އަވަގުރާނަ ގޮވައި، ދެން ފަހުން މާރާމާރީއަކާ ހަމައަށް ދިޔައީ."
އާމިރު ވިދާޅުވީ އެ މީހުން އެ ސަރަހައްދަށް ގޮސް، ރާއްޖެ ޓީވީގެ ކެމެރާމަން، މުހައްމަދު އަނިލް އިށީނދެގެން އިން ގޮނޑީގައި ސައިކަލުން ވެސް ޖެއްސި ކަމަށެވެ. އަދި، އާމިރުމެންނަށް ހަމަލާދޭން ވެސް އެ މީހުން މަސައްކަތް ކުރި ކަމަށް އާމިރު ވިދާޅުވި އެވެ.
ނަމަވެސް، މާރާމާރީ ހިންގާފައި ވަނީ، މީދޫގައި އާމިރުމެންނާއެކު އުޅުނު އެ ރަށުގެ ރައްޔިތުންނާ ކަމަށް އާމިރު ވިދާޅުވި އެވެ.
އެ ހާދިސާ ހިނގާފައި ވަނީ މިއަދު ހަވީރު އެވެ. އެ މަންޒަރު ފެންނަ ވީޑިއޯ ވެސް މިހާރު ސޯޝަލްމީޑިއާގައި ދަނީ ދައުރުވަމުންނެވެ. ނަމަވެސް، އެކަމާ ގުޅިގެން މިހައިތަނަށް ފުލުހުން އެއްވެސް އެއްޗެއް ބުނެފައެއް ނުވެ އެވެ.
