ޕާކިސްތާނުގެ ޗީފް އޮފް ޑިފެންސް ފޯސް ފީލްޑް މާޝަލް ސައްޔިދު އަހުމަދު މުނީރު އާއި ރައްޔިތުންގެ މަޖިލީހުގެ ރައީސް އަބްދުﷲ އަބްދުއްރަހީމް މިއަދު ބައްދަލު ކުރައްވައިފި އެވެ.
ޗީފް އޮފް ޑިފެންސް ފޯސްގެ އިތުރުން މުނީރަކީ ޗީފް އޮފް އާމީ ސްޓާފް އެވެ. އޭނާ މިހާރު ހުންނެވި ފީލްޑް މާޝަލް ރޭންކަކީ ޕާކިސްތާނުގައި ސިފައިންނަށް ދޭ އެންމެ މަތީ ރޭންކެވެ.
ޕާކިސްތާނުގެ ސިފައިންގެ ޖެނެރަލް ހެޑްކުއާޓާސްގައި ބޭއްވި އެ ބައްދަލުވުމުގައި ދެ ގައުމުގެ ގުޅުން އިތުރަށް ބަދަހި ކުރަން މަޝްވަރާ ކުރި ކަމަށް އެ ގައުމުގެ ނޫސްތަކުގައި ބުނެފައިވެ އެވެ.
"އެ ބައްދަލުވުމުގައި ދެ ގައުމުގެ މަސްލަހަތު ހުރި ކަންކަމުގެ ވާހަކަ ދައްކާފައިވޭ. އަދި ސަރަހައްދީ ސަލާމަތާއި ދެ ގައުމުގެ ގުޅުން އިތުރަށް ބަދަހި ކުރަން މަޝްވަރާކޮށްފައިވޭ،" ރިޕޯޓުތަކުން ބުނެފައިވެ އެވެ.
މި ސަރަހައްދުގެ ސަލާމަތާއި ރައްކާތެރިކަން ކަށަވަރު ކުރަން ޕާކިސްތާނު އަދާކުރާ ރޯލު މަޖިލީހުގެ ރައީސް އަބްދުއްރަހީމް ފާހަގަ ކުރެއްވި ކަމަށް ވެސް ނޫސްތަކުގައި ލިޔެފައި އޮތެވެ.
އަބްދުއްރަހީމް ޕާކިސްތާނަށް ވަޑައިގަތީ މީގެ ދެ ދުވަސް ކުރިން ވެރިކަން ކުރާ ޕީޕަލްސް ނެޝަނަލް ކޮންގްރެސްގެ 15 މެންބަރުންގެ ވަފުދަކާއެކު އެވެ. މި ދަތުރު ހަމަޖެހިފައި ވަނީ ރައީސް މުހައްމަދު މުއިއްޒު އަންނަ މަހު ޕާކިސްތާނަށް ވަޑައިގަންނަވާ ގޮތަށް ހަމަޖެހިފައިވާ ކަމަށް ވާހަކަ ދެކެވެމުންދާ ދަނޑިވަޅެއްގަ އެވެ.
ރައީސް މުއިއްޒު ވެރިކަމަށް ވަޑައިގަތީ "އިންޑިއާ އައުޓް" ކެމްޕެއިނަކަށްފަހު އެވެ. އަދި ވެރިކަމުގެ ކުރީކޮޅު ޗައިނާއަށް ވަޑައިގެން އިންޑިއާއަށް ވަރަށް ވަރުގަދަ ބަހުގެ ހަމަލާތަކެއް ވެސް މުއިއްޒު ވަނީ ދެއްވައިފަ އެވެ. ޕާކިސްތާނަކީ އިންޑިއާއާ އެންމެ ވާދަވެރި ގައުމެވެ.
