ރަސްމާލޭގެ 500 ހެކްޓަރުގެ ނުވަތަ އެރަށުގެ ދެބައިކުޅައެއްބައި ޔޫއޭއީގެ ކުންފުންޏަކަށް 99 އަހަރަށް ދޭން ސަރުކާރުން ނިންމީ، އެ ރަށުން އެންމެ ވެލިފުކެއް ވެސް ބޭރުގެ ބަޔަކަށް ނުދޭން ވައުދުވެވަޑައިގެންފައި އޮއްވަ އެވެ.
ރަސްމާލެ 99 އަހަރަށް ކުއްޔަށް ދެނީ ޔޫއޭއީގެ އީގަލް ހިލްސްއަށެވެ. އެއީ ބުރުޖު ހަލީފާގެ މަސައްކަތުގައި ޝާމިލުވި ރިއަލް އެސްޓޭޓް ވިޔަފާރިވެރިޔާ މުހައްމަދު އަލައްބާރުގެ ކުންފުންޏެވެ. ރަސްމާލެ ޑިވެލޮޕް ކުރުމުގެ ކޮމާޝަލް ޓާމްސްގައި ސޮއި ކުރީ މިދިޔަ ހޯމަ ދުވަހެވެ.
އެކަމަކު، ރާއްޖޭގެ މިނިވަން ދުވަހުގެ ރަސްމިއްޔާތުގައި ޖުލައި 26، 2024، ބޭއްވި ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ރަސްމާލެއަކީ "އެއްވެސް ބޭރު ފަރާތަކަށް އެންމެ ދުވަހަކަށް ވެސް ކުއްޔަށް ދޭން، ނޫނީ ހިލޭވެސް ލިބޭނެ ބިމެއް ނޫން" ކަމަށެވެ.
"އެތަނުން [ރަސްމާލެއިން] ހިއްކާ ކޮންމެ ބިމެއްގެ، ކޮންމެ ވެލިފުކަކީ ދިވެހި ރައްޔިތުންނަށް މިލްކުވާ ވެލިފުކެއް. އެއްވެސް ބޭރު ފަރާތަކަށް އެންމެ ދުވަހަކަށް ވެސް ކުއްޔަށް ދޭން، ނޫނީ ހިލޭ ވެސް ލިބޭނެ ބިމެއްނޫން، ދެން އެތަނުން ހިކިގެން ދާނީކީއެއް،" މުއިއްޒު ވިދާޅުވެފައިވެ އެވެ.
އޭގެ އިތުރުން، ރަސްމާލެ ދެން ހިއްކާނީ އެއްވެސް ބިމެއް ދޭން ނުޖެހޭ ގޮތަށް ކަމަށް ވެސް މުއިއްޒު އެ ދުވަހު ވިދާޅުވި އެވެ.
"ރަސްމާލޭގެ މަސައްކަތް ކުރިން ހިންގި ގޮތް އަޅުގަނޑުމެންނަށް ކަމުނުގޮސްގެން، އެ އެގްރިމެންޓް ބާތިލުކޮށް، މިހާރު އެއްވެސް ފަރާތަކަށް ބިމެއް، ކުރު މުއްދަތަކަށްވިޔަސް، ދިގު މުއްދަތަކަށްވިޔަސް ދޭން ނުޖެހޭ ގޮތަށް ހިންގަން ނިންމައި، އެ މަސައްކަތް އެވަނީ އަލުން ފެށިފައި،" އެމަނިކުފާނު ވިދާޅުވި އެވެ.
ޔޫއޭއީގެ ކުންފުންޏަށް ރަސްމާލެ ދެނީ 99 އަހަރަށް ކަން އިއުލާނު ކުރެއްވީ ފިނޭންސް މިނިސްޓަރު ހަސަން ޒަރީރު ދައުލަތުގެ މީޑިއާ ޕީއެސްއެމްއަށް ދެއްވި އިންޓަވިއުއެއްގަ އެވެ.
"ރާއްޖޭގެ ވަރަށް ގިނަ އިންވެސްޓާސް، ވަރަށް ގިނަ ޕްރޮޖެކްޓްސްތައް މިހާރު ވެސް ހިންގާ ރިސޯޓްތައް ވެސް އެބަ ހިންގާ ބޮޑެތި ދުވިސައްތަ، ތިންސަތޭކަ މިލިއަން ޑޮލަރުގެ ރިޒޯޓް ޕްރޮޕަޓީސްތައް އެބަ ޑިވެލޮޕް ކުރޭ. އެ ޕްރޮޕަޓީސްތައް ވެސް މި ޑިވެލޮޕް ކުރެވެނީ ގާތްގަނޑަކަށް 99 އަހަރާ ހަމައަށް ރާއްޖޭގެ މިހާރުގެ ލީގަލް ފްރޭމްވޯކް ތެރެއިން 99 އަހަރާ ހަމައަށް ލީސްކޮށްގެން،" ހޯމަ ދުވަހު ވިދާޅުވި އެވެ.
ރަސްމާލެ ޑިވެލޮޕް ކުރަނީ ފަތުރުވެރިކަމުގެ މަންޒިލެއްގެ ގޮތުގަ އެވެ. އަދި އެތަނުގައި މެރިނާއެއް ވެސް އަޅަ އެވެ. އެތަނުގައި އަޅާ ކޮޓަރިތައް ދިގު މުއްދަތަކަށް ގަތުމުގެ ފުރުސަތު ބޭރުގެ މީހުންނަށް މިހާރު ވެސް ވަނީ ހުޅުވާލައިފަ އެވެ.
