ޗައިނާގެ ގައުމީ ދުވަސް ފާހަގަ ކުރަން މިއަދު ވެރި ރަސް މާލޭގައި ބޭއްވި ރަސްމިއްޔާތެއްގައި ރައީސް މުހައްމަދު މުއިއްޒު ބައިވެރިވެވަޑައިގެންފި އެވެ.
ޗައިނާގެ ގައުމީ ދުވަސް ފާހަގަ ކުރަނީ ކޮންމެ އަހަރެއްގެ ވެސް އޮކްޓޯބަރު 1، ގަ އެވެ. ޗައިނާ އުފެދުނީ މީގެ 77 އަހަރު ކުރިން 1949 ވަނަ އަހަރެވެ.
ޗައިނާގެ ގައުމީ ދުވަސް ފާހަގަ ކުރަން ބޭއްވި ރަސްމިއްޔާތުގައި ވާހަކަ ދައްކަވަމުން މުއިއްޒު ވިދާޅުވީ، ޗައިނާއަކީ ރާއްޖޭގެ މުހިންމު އިގްތިސާދީ ބައިވެރިއެއް ކަމަށެވެ.
"އާބަން ސަރަހައްދުތައް ތަރައްގީ ކުރުމާއި ދެމެހެއްޓެނިވި ގޮތެއްގައި ރަށްތައް ތަރައްގީ ކުރުމާއި ތައުލީާއި ޓެކްނިކަލް އަދި އިންސްޓިޓިއުޝަނަލް ސަޕޯޓުގެ ދާއިރާއިން ޗައިނާ ދަނީ ރާއްޖެއަށް އެހީވަމުން،" ރައީސް ވިދާޅުވި އެެވެ.
އެ ބައްދަލުވުމުގައި ވާހަކަ ދައްކަވަމުން ޗައިނާއިން ރާއްޖެއަށް ކަނޑައަޅާފައިވާ އެމްބެސެޑަރު ކޮންގް ޒިއާންހުއާ ވިދާޅުވީ ރާއްޖެއަކީ ޗައިނާއަށް މުހިންމު ގައުމެއް ކަމަށާއި ބައިނަލްއަގްވާމީ މައިދާނުގައި ދެ ގައުމުގެ ހިޔާލު އެއް ގޮތް ކަމަށެވެ.
"ދެ ގައުމުން ގުޅިން، އަމާން، ސުލްހަވެރި ކުރިމަގެއް އިންސާނިއްޔަތަށް ހޯދައިދޭން މަސައްކަތް ކުރެވިދާނެ،" އޭނާ ވިދާޅުވި އެވެ.
ރައީސް މުއިއްޒު ވެރިކަމަށް ވަޑައިގަތީ "އިންޑިއާ އައުޓް" ކެމްޕެއިނަކަށްފަހު އެވެ. އަދި ވެރިކަމުގެ ކުރީކޮޅު ޗައިނާއަށް ވަޑައިގެން އިންޑިއާއަށް ވަރަށް ވަރުގަދަ ބަހުގެ ހަމަލާތަކެއް ވެސް މުއިއްޒު ވަނީ ދެއްވައިފަ އެވެ.
