ރަސްމާލޭ ވޯޓާފްރަންޓް އެންޑް މެރީނާ މަޝްރޫއު ހިންގަން ޔޫއޭއީގެ އީގަލް ހިލްސް ކުންފުންޏަށް 500 ހެކްޓަރުގެ ބިން ދިނުމަކީ ދިވެހީންގެ މުސަގުބަލުން ކުރާ ވައްކަމެއް ކަމަށާއި އެއީ ދެން އަންނަ ސަރުކާރަކުން ބާތިލުކުރަން ޖެހޭ އެއްބަސްވުމެއް ކަމަށް ކުރީގެ ރައީސް، އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ޕީއެންއެފްގެ އޮފީހުގައި ރޭ ބޭއްވި ޖަލްސާގައި ވާހަކަދައްކަވަމުން ޔާމީން ވިދާޅުވީ ރަސްމާލޭގެ ދެބައިކުޅައެއްބައި އީގަލް ހިލްސް ކުންފުންޏަށް ދޭން ނިންމާފައި އޮތީ 99 އަހަރަށް ކަމަށެވެ. އަދި، އެ މީހުންނާއެކު ވެފައި އޮތް އެއްބަސްވުމުގައި އޮތީ، އެ ތަނުގެ މުއްދަތު އިތުރުކުރެވޭ ގޮތަށް ކަމަށާއި އެއީ ރާއްޖޭގެ އެއްވެސް ގާނޫނަކުން ހުއްދަކުރާ ކަމެއް ނޫންކަމަށް ޔާމީން ވިދާޅުވި އެވެ.
"އެހެންވީމާ މިއީ އަސްލުގައި އަޅުގަނޑުމެންގެ މުސްތަގުބަލުން މި ކުރަނީ ވައްކަން، އެހެންވީމާ އެއީ ގާނޫނާއި ހިލާފު އެއްބަސްވުމަކަށް ވާތީ އެ އަޕްހޯލްޑުކުރާކަށް ނުޖެހޭ ދެން އަންނަ ސަރުކާރަކަށް، އެއްގޮތަކަށް ވެސް ނުޖެހޭނެ އިނގޭތޯ؟،" ޔާމީން ވިދާޅުވި އެވެ.
"ޔޫއޭއީގެ މި ކުންފުންޏަށް ވެސް އެނގެންވާނެ އިނގޭތޯ؟ މި މީހުންނަށް ވެސް އެނގެންވާނެ އަޅުގަނޑުމެންގެ މުސްތަގުބަލެއް ތިގޮތަށް ވިއްކާ ނުލެވޭނެކަން އެ ވިއްކާލަނީ މި މީހުންގެ ގައުމުގައި ވެސް ހުއްދަ ނުކުރާ ކަންކަން އެހެންވީމާ އެއަކަށް އޮނާއެއް ނުކުރާނެ އިހުތިރާމެއް ނުކުރާނެ އިނގޭތޯ؟."
ރަސްމާލޭގެ ބިމުން ބައެއް އީގަލް ހިލްސް ކުންފުންޏަށް ދެނީ ލީސް އެކުއިޒިޝަން ކޮސްޓު (ބިން ހޯދުމުގެ އަގު) ނުނަގާ، 99 އަހަރުގެ މުއްދަތުގެ ތެރޭގައި އެއްވެސް ކުއްޔެއް ނުނަގާ ގޮތަަށް ކަަމަށް ހައުސިން މިނިސްޓަރު އަބްދުالله މުއްތަލިބު ވަނީ ވިދާޅުވެފަ އެވެ.
މުއްތަލިބު ވިދާޅުވި ގޮތުގައި، ރަސްމާލޭން މި ގޮތަށް ލިބެން ހުރި ފައިސާތައް ސަރުކާރުން ދޫކޮށްލީ، އޭގެ މުގާބިލުގައި ސަރުކާރަށް މުޅި ޕްރޮޖެކްޓުގެ މުއްދަތުގެ ތެރޭގައި ފައިސާ ލިބޭނެ ގޮތެއް ހޯދުމުގެ ގޮތުންނެވެ. އެ ގޮތުން މިހާރު ރިސޯޓުތައް ތަރައްގީކުރަން ދޭ ގޮތާ ހިލާފަށް، ރަސްމާލޭގެ ބިމުގެ ބަދަލުގައި ސަރުކާރަށް ލިބެނީ އާމްދަނީ އާއި ޓެކްސްތަކެވެ.
ރަސްމާލޭގެ ބިމުގެ މުގާބިލުގައި ސަރުކާރަށް ލިބޭ އާމްދަނީ
- ރަސްމާލޭގައި ފޯރުކޮށްދޭ ހުރިހާ ހިދުމަތްތަކުންނާއި ވިއްކާ މުދަލުން، ރިސޯޓުތަކުން ދައްކާ ރޭޓުގައި ޓެކްސްތައް
- ރަސްމާލޭގައި ތަރައްގީކުރާ ތަންތަން ޑިވެލޮޕަރު ވިއްކާ އަގުގެ 10 ޕަސެންޓު
- ރަސްމާލޭގައި ހިންގާ ކޮންމެ ޕްރޮޕަޓީ މުއާމަލާތަކުން ހަތަރު ޕަސެންޓު
ބިމަށް އަގެއް، ކުއްޔެއް ނުނަގާ ގޮތަށް ދޫކޮށްލުން ދިފާއުކުރައްވަމުން މުއްތަލިބު ވިދާޅުވަނީ ސަރުކާރުގެ ބޭނުމަކަށްވީ، ޓީޖީއެސްޓީ އާމްދަނީ ކަށަވަރުކުރުން ކަމަށެވެ. ޓީޖީއެސްޓީއަކީ ދައުލަތަށް އެންމެ ގިނަ ފައިސާ ވަންނަ ދާއިރާކަން ފާހަގަކުރައްވަމުން، މުއްތަލިބު ވިދާޅުވީ ދުރު މުސްތަގުބަލަށް ވިސްނާއިއު މިއީ މާ ފައިދާ ބޮޑު ގޮތެއް ކަމަށެވެ.
ސަރުކާރުން އަންދާޒާ ކުރަނީ، ކުރިއަށް އޮތް 10 އަހަރު ދުވަހުގެ ތެރޭގައި މި ޕްރޮޖެކްޓުގެ ހުރިހާ މަރުހަލާއެއް ނިމި ފުރިހަމަ ވުމުން، ރަސްމާލެއަށް އެކަނި އެއް މިލިއަން ޓޫރިސްޓުން އަންނާނެ ކަަމަށެވެ. އަދި މި ޕްރޮޖެކްޓުގެ ދަށުން ތަންތަަން ތަރައްގީކުރުމުގެ މަރުހަލާގެ ތެރޭގައި ދައުލަތަށް 11 ބިލިއަން ޑޮލަރު ވަންނާނެ ކަމަށެވެ. އޭގެ އިތުރުން، 54000 ވަޒީފާ އުފެދިގެން ދާނެ ކަމަށް ވެސް ސަރުކާރުން ވަނީ ބުނެފަ އެވެ.
