ކުރީގެ ނައިބުރައީސް ފައިސަލް ނަސީމްއަށް ސޯޝަލް މީޑިއާގައި ކުރަމުންދާ ތުހުމަތުތައް އޭނާގެ އާއިލާއިން ދޮގުކޮށްފި އެވެ.
ފައިސަލްގެ އާއިލާ 10 މެންބަރުން ސޮއިކޮށް ނެރުނު ނޫސް ބަޔާނެއްގައި ބުނީ، ސޯޝަލް މީޑިއާގައި އޭނާއަށް ކޮށްފައިވާ ތުހުމަތުތަކަކީ "ކަނޑައެޅިގެން ދޮގު" ކަމަށެވެ.
އޭގެ އިތުރުން، 2023 ވަނަ އަހަރު ފައިސަލްގެ މަންމަ އާއި އެއްބަނޑު އެއްބަފާ އިތުރު ތިން މީހަކު ރައީސް އޮފީހުގައި ކުރީގެ ރައީސް އިބްރާހިމް މުހައްމަދު ސޯލިހާ ބައްދަލުކުރި ކަމަށް ބުނެ ފަތުރަމުންދާ ވާހަކަތަކަކީ ދޮގެއް ކަމަށް ވެސް އެ ބަޔާނުގައި ބުނެފައިވެ އެވެ.
ސިޔާސީ މަންފާއެއް ހާސިލުކުރުމުގެ ނިޔަތުގައި، ފައިސަލްގެ އަގު ވައްޓާލުމުގެ ބޭނުމުގައި ފަތުރަމުންދާ ހަގީގަތާ ހިލާފު ދޮގު ވާހަކަތައް، މުޅި އާއިލާގެ ފަރާތުން ކުށްވެރިކުރާ ކަމަށް އެ ނޫސް ބަޔާނުގައި ބުނެފައިވެ އެވެ.
މި ނޫސް ބަޔާނުގައި ސޮއިކޮށްފައިވާ ފައިސަލްގެ އާއިލާ މެންބަރުންނަކީ ތޯހާ ނަސީމް، ބަދޫރާ ނަސީމް، ހައިދަރު ނަސީމް، ގައިސަރު ނަސީމް، ސަފޫރާ ނަސީމް، ޝަޒުރާ ނަސީމް، އަޒުރާ ނަސީމް، އަސްރާ ނަސީމް، ނަޒުރާ ނަސީމް އަދި ޚައިބަރު ނަސީމް އެވެ.
ފައިސަލްއާ ގުޅޭގޮތުން މިފަދަ ވާހަކަތައް ފެތުރެން ފެށުނީ އެމްޑީޕީގެ ރިޔާސީ ޕްރައިމަރީގައި އޭނާ ވާދަކުރައްވަން އުޅޭ ކަމުގެ އަޑުތައް ގަދަވާން ފަށާފައި ވަނިކޮށެވެ.
