ކުށުގެ ވެށިން ކުޑަކުދިން ސަލާމަތްކޮށް ރައްކާތެރިކުރުމަށްޓަކައި މިދިޔަ ސަރުކާރުން ކުރިއަށް ގެންދަން ނިންމި ހޯޕް އައިލެންޑުގެ މަސައްކަތް ލަސްވަމުން ދާތީ ކުރީގެ ނައިބު ރައީސް، ފައިސަލް ނަސީމް ކަންބޮޑުވުން ފާޅުކޮށްފި އެވެ.
އެކްސްގައި ކުރެއްވި ޕޯސްޓެއްގައި ފައިސަލް ވިދާޅުވީ އެ މަޝްރޫއުއަކީ އާއިލާތަކަށް އައު އުއްމީދެއް ގެނުވައި ޒުވާނުންނަކީ އުފެއްދުންތެރި ބައެއްގެ ގޮތުގައި މުޖުތަމައުގައި ބައިވެރިވުމަށް ހޯޑައިދޭ އިތުރު ފުރުސަތެއްގެ ގޮތުގައި ރޭވި މަޝްރޫއުއެއް ކަމަށެވެ.
"މިއީ މުޖުތަމައުގައި އޮތް ގިނަ މައްސަލަތަކަކަށް ހައްލު ލިބިގެންދާނެ ގޮތަށް ރޭވިފައި އޮތް މަޝްރޫއުއެއް. މި ކޮންސެޕްޓު އެކުލަވވައިލެވުނު އިރުވެސް މި މަސައްކަތް ވަނީ ލަސްވެފައި، މިއަދު އަދި މިކަން ކުރުަމަށް މާލަސްވެއްޖެ،" ފައިސަލް ވިދާޅުވި އެވެ.
ހޯޕް އައިލެންޑް އަކީ ގޭންގު ކުށްތަކުގައި ޖެހޭ ސުކޫލް ކުދިންނާއި ކުށުގެ މާހައުލުގައި އުޅޭ ޒުވާން ކުދިން ބޭތިއްބުމަށް ތަރައްގީ ތަނެކެވެ. އެ ތަން ގާއިމުކުރަން މިދިޔަ ސަރުކާރުން ކަނޑައެޅީ ލ. ކަލައިދޫގަ އެވެ.
މި ސަރުކާރުން ވެރިކަމާ ހަވާލުވުމަށްފަހު، ދ. ވާނީއަށް އެ މަޝްރޫއު ބަދަލުކުރަން ނިންމި އެވެ. އެއަށްފަހު، މާޗު 21، 2025 ގައި ރައީސުލްޖުމްހޫރިއްޔާ ނެރުއްވި ގަރާރަކުން ވަނީ އެ މަޝްރޫއު އުތުރު ތިލަފަޅަށް ބަދަލުކުރަން ނިންމައިފަ އެވެ. ހޯޕް އައިލެންޑް އަޅާތަން ބަދަލުކުރަން ނިންމީ ވާނީގައި އެ ތަން އެޅުމަށް ކުރެހުން ވެސް ނިންމުމަށް ފަހުގަ އެވެ.
ރައީސްގެ ގަރާރުގައި މި ޖަލު ތަރައްގީކުރަން ފައިސާ ދޭނެ އިންވެސްޓަރަކު ހޯދަން ވެސް އިއުލާނުކޮށްފައިވެ އެވެ. ނަމަވެސް، މިއަދާ ހަމައަށް ވެސް އެ މަޝްރޫއުއަށް އިންވެސްޓަރަކު ލިބުނުކަމެއް ނުވަތަ ނޫންކަމެއް ސަރުކާރުން ހާމައެއް ނުކުރެ އެވެ.
