ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި ވާދަނުކުރައްވާނެ ކަމަށާއި، މި ފަހަރު އެ މަނިކުފާނު ހުންނެވީ އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލަށް ތާއިދުކުރައްވައިގެން ކަމަށް ކުރީގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.
އެސްއެސްޓީވީ "ބާރު ހަތަރެއް" ޕްރޮގްރާމުގައި ނަޝީދު ވިދާޅުވީ އެމްޑީޕީގެ ރިޔާސީ ޕްރައިމަރީ ކާމިޔާބު ކުރައްވާނީ ފައްޔާޒު ކަމަށެވެ. އަދި ޕްރައިމަރީގެ ނަތީޖާއަށް ފަހު ވެސް އެމްޑީޕީއަށް ސަރުކާރު ހޯދައިދިނުމަށްޓަކައި އެމްޑީޕީގެ ކެންޑިޑޭޓާއެކު ސާބިތުވެ ހުންނަވާނެ ކަމުގެ ޔަގީންކަން އެ މަނިކުފާނު ދެއްވި އެވެ.
"ހަމަ ކޮންމެ ގޮތެއް ވިޔަސް އަޅުގަނޑު ހަމަ އެ ކެންޑިޑޭޓާއެކީ ގޮސް އެމްޑީޕީއަށް ސަރުކާރު ހޯދައިދެވެންދެން އަޅުގަނޑުގެ މަސައްކަތް ކުރިއަށް ގެންދާނަން،" ނަޝީދު ވިދާޅުވި އެވެ.
ކުރީގެ ރައީސް އިބްރާހިމް މުހައްމަދު ސޯލިހު ޕްރައިމަރީގައި ވާދަކުރައްވަފާނެ ކަމާމެދު ސުވާލު ކުރުމުން ނަޝީދު ވިދާޅުވީ ސޯލިހު ޕްރައިމަރީއަށް ކުރިމަތިލައްވަންޖެހޭ ސަބަބެއް ވިސްނިވަޑައިނުގަންނަވާ ކަމަށެވެ. އަދި ވާދަވެރި އެހެން ބޭފުޅަކު ނުކުމެވަޑައިގެންނެވި ނަމަވެސް އެ މަނިކުފާނުގެ ނިންމެވުމަށް ބަދަލެއް ނާންނާނެ ކަމަށް ވެސް ވިދާޅުވި އެވެ.
ސޯލިހުގެ ނަން ޕްރައިމަރީގެ ވޯޓުކަރުދާހުގައި އޮތް ނަމަ ނަޝީދުގެ ނަން އަންނާނެތޯ ސުވާލުކުރުމުން ނަޝީދު ސާފުކޮށް ވިދާޅުވީ، "މިހުރީ ފައްޔާޒަށް ތާއިދުކޮށްގެން،" ކަމަށެވެ.
ފައްޔާޒަށް ތާއިދުކޮށްގެން ހުންނެވި ކަމަށް ތަކުރާރުކޮށް ވިދާޅުވުމަށް ފަހު ނަޝީދު ވިދާޅުވީ "އެ ވާހަކަ ދިގުކޮށް ވެސް ދެއްކި ދާނެ، ކުރުކޮށްވެސް ދެއްކިދާނެ" ކަމަށެވެ.
ޕްރައިމަރީގައި މިފަހަރު ވާދަނުކުރެއްވި ނަމަވެސް، ސިޔާސީ ގޮތުން އެ މަނިކުފާނަށް އޮތް ތާއިދަށް އުނިކަމެއް ނާންނަކަން ފާހަގަކުރައްވަމުން ނަޝީދު ވިދާޅުވީ އެ މަނިކުފާނަށް ތާއިދުކުރާ ރައްޔިތުން ވެސް މަދެއް ނޫން ކަމަށެވެ.
"އެހެން ނަމަވެސް އަޅުގަނޑު މިފަހަރު މިހުރީ ފައްޔާޒަށް ތާއިދުކޮށްގެން،" ނަޝީދު ވިދާޅުވި އެވެ.
ފައްޔާޒު ވެރިކަމަށް ގެންނެވުމަށް މަސައްކަތް ކުރައްވާނެ ކަމަށް ނަޝީދު ފުރަތަމަ އިއުލާނު ކުރެއްވީ އެ މަނިކުފާނު ޕާޓީގެ ޗެއާޕާސަންގެ މަގާމަށް ވާދަ ކުރެއްވިކަން އިއުލާނު ކުރެއްވުމަށް ބޭއްވި ނޫސްވެރިންގެ ބައްދަލުވުމުގަ އެވެ.
2023 ވަނަ އަހަރުގެ ރިޔާސީ އިންތިހާބުގެ ތެރޭގައި އެމްޑީޕީގެ އެތެރޭގައި އުފެދުނު ބޮޑެތި ހިޔާލުތަފާތުވުންތަކާ ގުޅިގެން ނަޝީދު ވަނީ އެމްޑީޕީން ވަކިވެވަޑައިގެން ދަ ޑިމޮކްރެޓްސް އުފެއްދެވި އެވެ. އޭގެ ދެ އަހަރު ފަހުން އަލުން އެމްޑީޕީއާ ގުޅިވަޑައިގެން، މިއަހަރު ބޭއްވި ޗެއާޕާސަންގެ އިންތިހާބު ބޮޑު ތަފާތަކުން ނަޝީދު ކާމިޔާބު ކުރެއްވި އެވެ.
ރިޔާސީ ޕްރައިމަރީގައި ވާދަކުރައްވާނެކަން ރަސްމީކޮށް އިއުލާންކުަރައްވާފައި ވަނީ ކުރީގެ ފޮރިން މިނިސްޓަރު އަބްދުﷲ ޝާހިދު އާއި ކުރީގެ ނައިބު ރައީސް ފައިސަލް ނަސީމް އެވެ.
އެމްޑީޕީގެ ރިޔާސީ ޕްރައިމަރީގައި ކުރީގެ އިބްރާހިމް މުހައްމަދު ސޯލިހު ވާދަކުަރއްވާނެ ކަމަށް އެ މަނިކުފާނު ރަސްމީކޮށް އިއުލާނު ނުކުރެއްވި ނަމަވެސް ޕްރައިމަރީގައި ސޯލިހު ވާދަކުރައްވާނެ ކަމަށް އިތުބާރު ކުރެވޭ ބައެއް މަސްދަރުތަކުން ބުނެފައިވެ އެވެ.
