ރައްޔިތުންގެ މެދުގައި ނެގި ފެންނަ ނުފެންނަ ވޯޓުން ބޮޑުތަނުން ސަރުކާރަށް ނޫނެކޭ ބުނުމުން އަވަސް އިންތިހާބަކަށް ދާންޖެހޭ ކަމަށް ކުރީގެ ނައިބުރައީސް ފައިސަލް ނަސީމް މިއަދު ވިދާޅުވެއްޖެ އެވެ.
ފައިސަލް އެކްސްގައި ކުރި ޕޯސްޓެއްގައި ވިދާޅުވީ ފެންނަ ނުފެންނަ ވޯޓުގެ ނަތީޖާއާއެކީގައި އަވަސް އިންތިހާބަކަަށް ދިއުމަކީ ގައުމަށް މިވަގުތު އެންމެ ރަނގަޅުވާނެ ގޮތްކަން މިހާރު ޔަގީންވެފައިވާ ކަމަށެވެ.
"ރައްޔިތުންގެ ނޫނެކޭ ވޯޓު އާއި އެކު އަވަސް އިންތިހާބަކަށް ދިއުމަކީ ދެން ގައުމަށް ރަނގަޅުވާނެ ގޮތްކަން މިހާރު ޔަގީން. ގައުމުގެ މަސްލަހަތަށްވުރެ އަމިއްލަ އެދުން އިސްކޮށްފިނަމަ މާ ދެރަގޮތްތައް ދިމާވެދާނެ،" ފައިސަލް ވިދާޅުވި އެވެ.
ފައިސަލް ވިދާޅުވީ ވެރިކަމަކީ ހިތަށް އަރާ ގޮތަކަށް ކަންތައްކޮށް ކުޅޭ ކުޅޭ އެއްޗެއް ގޮތުގައި ވެގެން ނުވާނެ ކަމަށާއި މި ސަރުކާރު ފެށުނީއްސުރެ މިއަދާ ހަމައަށް ފެންނަނީ އެއްވެސް ހަރުދަނާ ކަމެއް އަދި މިސްރާބެއް ނެތި ހިންގާ ސަރުކާރެއް ގޮތުގައި ކަމަށެވެ.
"ވެރިކަމަކީ ހަމަ ހިތަށް އަރާ ގޮތަކަށް ކަންތައްކޮށް، ކުޅޭ ކުޅޭ އެއްޗެއްގެ ގޮތުގައި ބަލައިގެންވާނެ ކަމެއް ނޫން. މިއަދުގެ ސަރުކާރު ފެށުނީއްސުރެ މިއަދާ ހަމައަށް މިފެންނަނީ އެއްވެސް ހަރުދަނާ ކަމެއް ނެތި، އަދި ދާނެ މިސްރާބެއް ނެތި ހިންގާ ވެރިކަމެއްގެ ގޮތުގައި. މިއީ ރައްޔިތުން އިންތިހާއަށް ކަންބޮޑުވާ ކަމެއް،" ފައިސަލް ވިދާޅުވި އެވެ.
ސަރުކާރުގެ އެންމެ ފައިދާވާ ކުންފުނިތައް ބަނގުރޫޓުވާ ދަރަޖައަށް ވައްޓާލާފައިވާކަން ފާހަގަކުރައްވާ ފައިސަލް ވިދާޅުވީ ފެންނަ ނުފެންނަ ވޯޓުގައި ރައްޔިތުން ސަރުކާރަށް 70 ޕަސަންޓުން ނޫނެކޭ ބުނީ ސަރުކާރުން ކުރާ ކަންކަމަށް ނުރުހޭތީ ކަމަށެވެ.
ސިޔާސީ ބޭނުމަށް ގިނަ އަދަދެއްގެ ވަޒީފާ ބެހުމުގެ ސަބަބުން ދައުލަތަށް ކެތްނުވެގެން މަގާމުތަކުން މީހުން ވަކިކުރަން މަޖުބޫރުވެފައިވާ ކަމަށާއި މަޝްރޫއުތަކުގެ ބިންގާ އެޅި ކަމުގައި ވިޔަސް އެކަންތައްތައް ކުރިއަށް ނުގޮސް ހުއްޓިފައިވާ ކަމަށް ފައިސަލް ވިދާޅުވި އެވެ.
"ކުރާނެ މަސައްކަތެއް ނެތި އިންތިހާއަށް ބޮޑު މުސާރައިގައި ގޭގައި ސިޔާސީ މަސައްކަތް ކުރަން ބޭތިއްބި މީހުން ވަކި ކުރަން މަޖުބޫރު ވެއްޖެ. ކުންފުނިތަކުގެ ވެރިންނާއި ވަޒީރުންވެސް ވަކިކުރާނީތޯ ނުވަތަ ބައިތިއްބާނީތޯ ނޭނގިގެން އުޅޭކަން ޔަގީން ވާ ހިސާބައް ކަންތައްތައް ގޮސްފި. މިއީ ސަރުކާރުން އަނެއްކާވެސް ވިސްނަންވެއްޖެ ކަމެއް،" ފައިސަލް ވިދާޅުވި އެވެ.
މީގެ އިތުރުން ފައިސަލް ވިދާޅުވީ މެދުއިރުމަތީގައި ކުރިއަށްދާ ހަނގުރާމައާ ގުޅިގެން މުޅި ދުނިޔެ ދަތި ދުވަސްތަކަކާ ކުރިމަތިލާން ޖެހިފައިވާއިރު، ހިކުމަތްތެރިކަމާއެކު ގައުމުގެ ކަންކަން ކުރިއަށް ގެންދަން ޖެހޭ ކަމަށެވެ.
ފައިސަލް މިހެން ވިދާޅުވެފައި މިވަނީ ކެބިނެޓުން ޖުމްލަ 10 މިނިސްޓަރުން މިއަދު އިސްތިއުފާ ދެއްވާފައިވާ ދަނޑިވަޅެއްގަ އެވެ. ރައީސް އޮފީހުން ބުނީ އެ ހުރިހާ މިނިސްޓަަރުން އިސްތިއުފާ ދެއްވީ މުއިއްޒު ގެންނަން ބޭނުންވެވަޑައިގަންނަވާ އިސްލާހުތަކަށް ފުރުސަތު ދެއްވުމުގެ ގޮތުން ކަމަށެވެ.
ސަރުކާރުން އަމަލުކުރާ ގޮތުން ކުރީގެ ޗެއާޕާސަން ފައްޔާޒް އިސްމާއިލް ވަނީ ހުރިހާ ޕާޓީތައް މަޝްވަރާ ކުރުމަށް ގޮވާލައްވާފަ އެވެ. އޭގެ އިތުރުން ކުރީގެ ރަައީސް މުހައްމަދު ނަޝީދު ވަނީ އިންތިގާލީ ސަރުކާރެއް އެކުލަވާލުމަށް ގޮވާއްލަވާފަ އެވެ.
