ރަސްމާލޭ ވޯޓާފްރަންޓް އެންޑް މެރީނާ މަޝްރޫއު ހިންގަން ޔޫއޭއީގެ އީގަލް ހިލްސް ކުންފުންޏަށް 500 ހެކްޓަރުގެ ބިން ދެނީ ލީސް އެކުއިޒިޝަން ކޮސްޓު (ބިން ހޯދުމުގެ އަގު) ނުނަގާ، 99 އަހަރުގެ މުއްދަތުގެ ތެރޭގައި އެއްވެސް ކުއްޔެއް ނުނަގާ ގޮތަަށް ކަަމަށް ހައުސިން މިނިސްޓަރު އަބްދުالله މުއްތަލިބު ވިދާޅުވެއްޖެ އެވެ.
ރަސްމާލޭގައި ހިންގާ ޕްރޮޖެކްޓާ ގުޅޭ ގޮތުން މުއްތަލިބު އޭނާގެ ލިންކްަޑިއިންގައި ހިއްސާކުރެއްވި ލިޔުމެއްގައި ވަނީ، ބިން ހޯދާށާއި އެ ބިމުގެ ކުލީގެ ގޮތުގައި އީގަލް ހިލްސްއިން އެއްވެސް ފައިސާއެއް ދައްކާކަށް ނުޖެހޭނެ ކަމަށެވެ.
މުއްތަލިބު ވިދާޅުވި ގޮތުގައި، ރަސްމާލޭން މި ގޮތަށް ލިބެން ހުރި ފައިސާތައް ސަރުކާރުން ދޫކޮށްލީ، އޭގެ މުގާބިލުގައި ސަރުކާރަށް މުޅި ޕްރޮޖެކްޓުގެ މުއްދަތުގެ ތެރޭގައި ފައިސާ ލިބޭނެ ގޮތެއް ހޯދުމުގެ ގޮތުންނެވެ. އެ ގޮތުން މިހާރު ރިސޯޓުތައް ތަރައްގީކުރަން ދޭ ގޮތާ ހިލާފަށް، ރަސްމާލޭގެ ބިމުގެ ބަދަލުގައި ސަރުކާރަށް ލިބެނީ އާމްދަނީ އާއި ޓެކްސްތަކެވެ.
ރަސްމާލޭގެ ބިމުގެ މުގާބިލުގައި ސަރުކާރަށް ލިބޭ އާމްދަނީ
- ރަސްމާލޭގައި ފޯރުކޮށްދޭ ހުރިހާ ހިދުމަތްތަކުންނާއި ވިއްކާ މުދަލުން، ރިސޯޓުތަކުން ދައްކާ ރޭޓުގައި ޓެކްސްތައް
- ރަސްމާލޭގައި ތަރައްގީކުރާ ތަންތަން ޑިވެލޮޕަރު ވިއްކާ އަގުގެ 10 ޕަސެންޓު
- ރަސްމާލޭގައި ހިންގާ ކޮންމެ ޕްރޮޕަޓީ މުއާމަލާތަކުން ހަތަރު ޕަސެންޓު
ބިމަށް އަގެއް، ކުއްޔެއް ނުނަގާ ގޮތަށް ދޫކޮށްލުން ދިފާއުކުރައްވަމުން މުއްތަލިބު ވިދާޅުވަނީ ސަރުކާރުގެ ބޭނުމަކަށްވީ، ޓީޖީއެސްޓީ އާމްދަނީ ކަށަވަރުކުރުން ކަމަށެވެ. ޓީޖީއެސްޓީއަކީ ދައުލަތަށް އެންމެ ގިނަ ފައިސާ ވަންނަ ދާއިރާކަން ފާހަގަކުރައްވަމުން، މުއްތަލިބު ވިދާޅުވީ ދުރު މުސްތަގުބަލަށް ވިސްނާއިއު މިއީ މާ ފައިދާ ބޮޑު ގޮތެއް ކަމަށެވެ.
މިކަމަަށް ބާރު ދެއްވަން މުއްތަލިބު ހިއްސާކުރެއްވި ނަމްބަރުތަކުގައި ވަނީ ޓޫރިޒަމުގެ ބިމު ކުލީގެ ގޮތުގައި 2024 ގައި ލިބުނީ 1.88 ބިލިއަން ރުފިޔާ އަދި މިދިޔަ އަހަރު ލިބުނީ 2.07 ބިލިއަން ރުފިޔާ ކަމަށެވެ. މި އަދަދުތަކާ ޓީޖީއެސްޓީގެ ގޮތުގައި ވަން އަދަދުތަކަށް އަޅާބަލާއިރު އުޅެނީ ފަސް ގުނަ މަތީގަ އެވެ. ޓީޖީއެސްޓީގެ ގޮތުގައި 2024 ގައި 9.6 ބިލިއަން ރުފިޔާ ލިބިފައިވާއިރު، މިދިޔަ އަހަރު 10.9 ބިލިއަން ރުފިޔާ ލިބުނެވެ.
"އެކުއިޒިޝަން ފީ އާއި ލީސް އެކްސްޓެންބަން ފީ ވަންނަނީ އެކަން ހިނގާ އަހަރުތަކުގަިއ އެއް ފަހަރު ވަންނަ ފައިސާގެ ގޮތުގައި. އެއްވަރަކަށް، ކުރިއަރަމުން އަންނަ އާމްދަނީ ލިބެނީ ހަރަކާތުން ނަގާ ޓެކްސް އިން: މެހެމާނުން އައުމާއި، ހަރަދުކުރުމާއި، އެނބުރި އައުމުން،" މުއްތަލިބު ވިދާޅުވި އެވެ.
ސަރުކާރުން އަންދާޒާ ކުރަނީ، ކުރިއަށް އޮތް 10 އަހަރު ދުވަހުގެ ތެރޭގައި މި ޕްރޮޖެކްޓުގެ ހުރިހާ މަރުހަލާއެއް ނިމި ފުރިހަމަ ވުމުން، ރަސްމާލެއަށް އެކަނި އެއް މިލިއަން ޓޫރިސްޓުން އަންނާނެ ކަަމަށެވެ. އަދި މި ޕްރޮޖެކްޓުގެ ދަށުން ތަންތަަން ތަރައްގީކުރުމުގެ މަރުހަލާގެ ތެރޭގައި ދައުލަތަށް 11 ބިލިއަން ޑޮލަރު ވަންނާނެ ކަމަށެވެ.
އޭގެ އިތުރުން، 54000 ވަޒީފާ އުފެދިގެން ދާނެ ކަމަށް ވެސް ސަރުކާރުން ވަނީ ބުނެފަ އެވެ. މި ޕްރޮޖެކްޓު ހިންގާ އީގަލް ހިލްސް ކުންފުނިން ބުނަނީ މި ޕްރޮޖެކްޓަށް އެ ކުންފުނިން އިންވެސްޓުކުރަނީ 12 ބިލިއަން ޑޮލަރު ކަމަށެވެ. މިއީ މި ރާއްޖޭގެ ޖީޑީޕީއަށް ވުރެ ފަސް ބިލިއަނެއްހާ ޑޮލަރު އިތުރު އަދަދެކެވެ.
