ދުނިޔޭގެ މަސްރަހު ނުތަނަވަސްވެފައިވާ މި ދަނޑިވަޅުގައި، އެކުވެރި ގައުމުތަކާއެކު އޮންނަ ގުޅުންތައް އިތުރަށް ވަރުގަދަކުރުމުގެ ގޮތުން، ޔޫރަޕިއަން ޔޫނިއަން (އީޔޫ) ގެ ފުރަތަމަ "އެސޯސިއޭޓް މެންބަރު" ގައުމަކަށް ވުމުގެ ފުރުސަތު ކެނެޑާއަށް ފަހިކޮށްދޭން ބޭނުންވާ ކަމަށް ޔޫރަޕިއަން ކޮމިޝަނުގެ ރައީސް އުރުސުލާ ފޮން ޑަ ލަޔަން ބުދަ ދުވަހު ވިދާޅުވެއްޖެ އެވެ.
އުރުސުލާ މި ހުށަހެޅުން ހުށަހެޅުއްވުމާއެކު، ޔޫރަޕިއަން ޕާލަމެންޓުގެ މެންބަރުން ވަނީ ކޮޅަށް ތެދުވެ އޭނާއަށް ވަރަށް ބޮޑަށް މަރުހަބާ ދަންނަވައިފަ އެވެ. އޭގެ ފަހުން އުރުސުލާ ވަނީ، އޭނާގެ އަހަރީ "ސްޓޭޓް އޮފް ދަ ޔޫނިއަން" ތަގުރީރު އަޑުއެއްސެވުމަށް ޕާލަމެންޓަށް ވަޑައިގެން އިންނެވި ކެނެޑާގެ ބޮޑުވަޒީރު މާކް ކާނީގެ އަރިހަށް ވަޑައިގެން އޭނާއާ ސަލާމްކުރައްވައި މަރުހަބާ ވިދާޅުވެފަ އެވެ.
ސްޓްރާސްބާގްގައި ހުންނަ ޔޫރަޕިއަން ޕާލަމެންޓުގައި ވާހަކަދައްކަވަމުން އުރުސުލާ ވިދާޅުވީ، މިއަދުގެ ދުނިޔޭގެ މަސްރަހު އޮތް ނާޒުކު ހާލަތުގެ ސަބަބުން، އާ ބައިވެރިވުންތަކާއި ގުޅުންތައް ގާއިމުކުރުން މުހިންމު ކަމަށެވެ.
ޔޫރަޕުގެ 27 ގައުމު ހިމެނޭ މި އިއްތިހާދުގެ ބޯޑަރު ކައިރީގައި، ރަޝިޔާއިން ޔޫކްރެއިންގައި ކުރަމުންދާ ހަނގުރާމައިގެ ނުރައްކާ އޮތްއިރު، ވިޔަފާރިއާއި އެހެނިހެން ދާއިރާތަކުން ވެސް ބޮޑެތި ގޮންޖެހުންތަކެއް ވަނީ ކުރިމަތިވެފަ އެވެ. އެގޮތުން އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ގެންގުޅޭ ސިޔާސަތުތަކާއި، ދުނިޔޭގައި ނުފޫޒު ގަދަކުރަމުންދާ ޗައިނާގެ ސަބަބުން އީޔޫ އާއި ކެނެޑާއަށް ވެސް ވަނީ ވާދަވެރި އަދި ދަތި ހާލަތްތަކަކާ ކުރިމަތިލާން ޖެހިފަ އެވެ.
