އެމެރިކާގެ ސީއެންއެން، ޕޮލިޓިކޯ އަދި އެމްއެސް ނައު ވައިޓް ހައުސްއަށް ވަނުން މަނާކުރުމާ ގުޅިގެން، ރައީސް ޑޮނަލްޑް ޓްރަމްޕްގެ ސަރުކާރާ ދެކޮޅަށް ދައުވާ ކުރާނެ ކަމަށް އެ މީޑިއާތަ އައުޓްލެޓްތަކުން ބުނެފި އެވެ.
ޓްރަމްޕްގެ ޓީމާ ބެހޭގޮތުން އެ މީޑިއާތަކުން ފަތުރަނީ "ޚިޔާލީ ވާހަކަތަކެއް" ކަމަށް ތުހުމަތުކުރައްވައި، އެ މުއައްސަސާތައް ވައިޓް ހައުސްއަށް ވަނުން މަނާކުރިކަން އިއުލާން ކުރެއްވީ މިދިޔަ ހުކުރު ދުވަހު އެވެ. އެ ކުންފުނިތަކުން ބުނި ގޮތުގައި ހޮނިހިރު ދުވަހު އެ ތަންތަނުގެ ރިޕޯޓަރުން ވައިޓް ހައުސްގެ އިމާރާތަށް ވަނުމަށް ވަނީ ހުރަސްއަޅާފަ އެވެ.
މިދިޔަ ހޯމަ ދުވަހު އެ ތިން މީޑިއާ އައުޓްލެޓުން ނެރުނު ގުޅިފައިވާ ބަޔާނެއްގައި ބުނެފައިވަނީ، ނޫސްވެރިން ރިޕޯޓްކުރާނެ އެއްޗެއް ނިންމުމުގެ ބާރު ސަރުކާރަށް ލިބިގެންނުވާ ކަމަށް ބުނާ އަސާސް ދިފާއުކުރުމަށްޓަކައި ގާނޫނީ ފިޔަވަޅު އަޅަމުންދާ ކަމަށެވެ.
އދ. ގެ އާންމު މަޖިލީހުގައި ބައިވެރިވެވަޑައިގަތުމަށް ޓްރަމްޕް ނިއު ޔޯކަށް ފުރާވަޑައިގަތުމާ ގުޅިގެން، އެމެރިކާގެ ބޮޑެތި ޓީވީ ނެޓްވޯކްތަކުން ވަނީ ވައިޓް ހައުސްގެ "ޕޫލް ކަވަރޭޖް" ނުވަތަ ގުޅިގެން ކުރިއަށްގެންދާ ކަވަރޭޖް މެދުކަނޑާލާފަ އެވެ.
މި ދައުވާއާ ގުޅިގެން ޓްރަމްޕް ވަނީ އެ މީޑިއާ މުއައްސަސާތަކަކީ ފެންވަރު ދަށް ބައެއްގެ ގޮތުގައި ސިފަކުރައްވައި، އެއީ އެމަނިކުފާނުގެ ކާމިޔާބީތަކުގެ އަގުވައްޓާލައި އިހާނެތިކޮށް ހިތާ "ފަސާދަވެފައިވާ ނޫސްވެރިކަމެއް" ކަމަށް ވިދާޅުވެފަ އެވެ.
ޓްރަމްޕްގެ އަމިއްލަ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތް ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، ހަމައެކަނި ނޭދެވޭ ވާހަކަތައް ލިޔާ "ފޭކް ނިއުސް" ފަތުރާ މީހުންނާއި، ގޮތް ނޭނގޭ މަސްދަރުތަކާ ހަވާލާދީ ދޮގު އަދި އަބުރާ ބެހޭ ވާހަކަތައް ފަތުރައި ގައުމީ ސަލާމަތަށް ނުރައްކާކުރާ ފަރާތްތަކަށް، ދުނިޔޭގެ އެންމެ މުހިންމު އޮފީހަށް ވަނުމުގެ ފުރުސަތު ދީގެން ނުވާނެ ކަމަށެވެ.
މީގެ އިތުރުން، އެމަނިކުފާނުގެ ޓީމުން މި މައްސަލަ އިސްތިއުނާފު ކުރާނެކަން "ޔަގީނާ ގާތަށް" އެނގޭ ކަމަށް ވެސް ޓްރަމްޕް ވިދާޅުވި އެވެ.
އެމެރިކާގެ ގާނޫނުއަސާސީގެ ފުރަތަމަ އިސްލާހު (ފަސްޓް އެމެންޑްމަންޓް) އިން ނޫސްވެރިކަމުގެ މިނިވަންކަން ހަނިކުރުން ސަރުކާރަށް މަނާކުރެ އެވެ. ކޯޓުތަކުން މީގެ ކުރިން މި މާއްދާ މާނަކޮށްފައިވަނީ، މީޑިއާތަކުން ރިޕޯޓްކުރާ ކޮންޓެންޓަށް ބަލައި، ވަކި މީޑިއާއަކާ މެދު ތަފާތުކުރުން ގެންގުޅުން ސަރުކާރަށް މަނާކުރާ ގޮތަށެވެ.
