ހިޖުރަވެރިން ފޮނުވާލުމަށް 35 ގައުމަކާއެކު އެމެރިކާއިން ހަދާފައިވާ ސިއްރު އެއްބަސްވުންތަކެއްގެ ދަށުން، މިހާތަނަށް 25،000 އަށްވުރެ ގިނަ މީހުން، އެ މީހުންނަށް އެއްވެސް ގުޅުމެއް ނެތް ގައުމުތަކަށް ޑީޕޯޓްކޮށްފައިވާ ކަމަށް ރިޕޯޓަކުން ހާމަވެއްޖެ އެވެ.
ޖެނުއަރީ 2025 ގައި އެމެރިކާގެ ރައީސް ޑޮނަލްޑް ޓްރަމްޕް ވެރިކަމާ ހަވާލުވެވަޑައިގަތް ފަހުން، ގާނޫނީ ގޮތުން އަމިއްލަ ގައުމަށް ފޮނުވާނުލެވޭ ހިޖުރަވެރިން ބަލައިގަތުމަށް ތަރައްގީވަމުން އަންނަ ގައުމުތަކާއެކު ވޮޝިންޓަނުން ދަނީ އެއްބަސްވުންތަކެއްގައި ސޮއިކުރަމުންނެވެ.
"ފޮބިޑަން ސްޓޯރީޒް" އިން ކުރިއަށް ގެންދިޔަ މި ތަހުގީގުން ހާމަވިގޮތުގައި، ހިޖުރަވެރިން ބަލައިގަންނަ ގައުމުތަކަށް ސީދާ ގޮތުންނާއި، އެ މީހުން ފޮނުވާލުމުގެ ކަންކަން ފަހިކޮށްދޭ އދ. ގެ އެޖެންސީތަކަށް ދިނުމަށް ޓްރަމްޕްގެ ސަރުކާރުން ވަނީ 410 މިލިއަން އެމެރިކާ ޑޮލަރު ކަނޑައަޅާފަ އެވެ.
ބައިނަލްއަގުވާމީ ނޫސްވެރިންގެ އިއްތިހާދަކާ ގުޅިގެން ފޮބިޑަން ސްޓޯރީޒް އިން އެއްކުރި މައުލޫމާތުތަކަށް ބަލާއިރު، އޮގަސްޓް 31، 2026 ގެ ނިޔަލަށް މަދުވެގެން 25،447 މީހުން ވަނީ އެމެރިކާއިން ތިންވަނަ ގައުމުތަކަށް ޑީޕޯޓްކޮށްލާފަ އެވެ.
މީގެ ތެރެއިން ގިނަ މީހުން، ނުވަތަ ގާތްގަނޑަކަށް 20،000 މީހުން ފޮނުވާލާފައިވަނީ މެކްސިކޯއަށެވެ. ބާކީ ތިބި މީހުން ލެޓިން އެމެރިކާ، އެފްރިކާ އަދި ޕެސިފިކް ސަރަހައްދުގެ 27 ގައުމަކަށް ބަހާލާފައިވާއިރު، އިތުރު ހަތް ގައުމަކާއެކު މިހާރު ވަނީ އެއްބަސްވުންތައް ނިންމާފަ އެވެ.
މި އެއްބަސްވުންތައް އެކި ގައުމުތަކުގައި ތަފާތެވެ. އޭގެ ތެރޭގައި ޑީޕޯޓްކޮށްލެވޭނެ މީހުންގެ ގައުމުތަކާއި، ކުށުގެ ރެކޯޑު އޮތް މީހުން ބަލައިގަންނާނެތޯ ނުވަތަ ނޫންތޯ ކަނޑައެޅުން ހިމެނެ އެވެ.
2026 ވަނަ އަހަރުގެ ކުރީކޮޅު އޭއެފްޕީން ހެދި ތަހުގީގަކުން އެނގުނުގޮތުގައި، ޑީޕޯޓްކޮށްލާ މީހުން ބަލައިގަތުމަށް އެފްރިކާގެ ގައުމުތަކަށް މަޖުބޫރުކުރުވުމުގެ ގޮތުން ވޮޝިންޓަނުން ދަނީ ވިސާ ދިނުން މަނާކުރުމާއި ފިޔަވަޅު އެޅުން ފަދަ އުކުޅުތައް ބޭނުންކުރަމުންނެވެ.
ގާނޫނީ ވަކީލުން އޭއެފްޕީއަށް މައުލޫމާތު ދިންގޮތުގައި، ޑީޕޯޓްކޮށްލާ މީހުން ފޮނުވާލަނީ އެއްވެސް ގާނޫނީ ހިމާޔަތެއް ނެތް "ކަނު އަނދިރިގަނޑަކަށެވެ". އެ މީހުންނާ އެއްވެސް ގުޅުމެއް ނެތް ގައުމުތަކުގައި އެއްވެސް ދައުވާއަކާ ނުލައި ބަންދުކޮށްފައި ބައިތިއްބާއިރު، އެ ގައުމުތަކުގައި އެ މީހުންނަށް ލިބިދޭ އެއްވެސް ހައްގެއް ނޯވެ އެވެ.
ފޮބިޑަން ސްޓޯރީޒް އިން ބުނި ގޮތުގައި، ތިންވަނަ ގައުމުތަކުން ޑީޕޯޓްކޮށްލާ މީހުން ބަލައިގަތުމާ ގުޅޭގޮތުން އެފްރިކާގެ 54 ގައުމުގެ ތެރެއިން 49 ގައުމަކާ އެމެރިކާއިން ވަނީ މަޝްވަރާކޮށްފަ އެވެ.
މި މަޝްވަރާތަކާއި ފައިސާގެ މުއާމަލާތްތައް މައިގަނޑު ގޮތެއްގައި ބަލަހައްޓަނީ މޭ 2025 ގައި އުފެއްދި، މާ ބޮޑު މަގުބޫލުކަމެއް ނެތް ސްޓޭޓް ޑިޕާޓްމަންޓުގެ ގޮފި، "އޮފީސް އޮފް ރީމިގްރޭޝަން" އިން ކަމަށް ފޮބިޑަން ސްޓޯރީޒްގެ ރިޕޯޓުގައިވެ އެވެ.
މި އޮފީހުގެ އިސްވެރިއަކީ ކުރިން ސެކިއުރިޓީ އޮފިސަރެއްގެ ގޮތުގައި މަސައްކަތް ކުރެއްވި، އުމުރުން 41 އަހަރުގެ ޑިޕްލޮމެޓް ކްރިސްޓިއަން ޖޯވް އާހާޑް އެވެ.
ޑީޕޯޓްކޮށްލާ މީހުން ބަލައިގަތުމާ ގުޅޭގޮތުން ޑިސެމްބަރު މަހު އެމެރިކާއާއެކު ފަހުމުނާމާއެއްގައި ސޮއިކުރި ކެމަރޫނަށް އޭނާ ކުރެއްވި ދަތުރުގެ ތަފްސީލުތައް މި ރިޕޯޓުގައި ހިމަނާފައިވެ އެވެ. އެ އެއްބަސްވުމުގައި ސޮއިކުރިތާ ހަފުތާއެއް ފަހުން، ގާތްގަނޑަކަށް 400 މިލިއަން ޑޮލަރުގެ ފަސް އަހަރު ދުވަހުގެ ސިއްހީ އެހީގެ ޕްރޮގްރާމެއްގައި ވެސް އެ ގައުމުން ވަނީ ސޮއިކޮށްފަ އެވެ.
ޖެހިގެން އައި މަހު ސްޓޭޓް ޑިޕާޓްމަންޓުން ބުނީ، ރެފިއުޖީން އަނބުރާ ފޮނުވާލުމުގެ ކަންކަން ފަހިކުރުމަށާއި ގަވާއިދާ ހިލާފަށް ހިޖުރަކުރުން ހުއްޓުވުމަށް ކެމަރޫނުގައި ހުންނަ އދ. ގެ ރެފިއުޖީ އެޖެންސީ (ޔޫއެންއެޗްސީއާރު) އަށް އިތުރު 30 މިލިއަން ޑޮލަރު ދޭނެ ކަމަށެވެ.
ޑީޕޯޓްކޮށްލި މީހުން ގޮވައިގެން ފުރަތަމަ ބޯޓު ކެމަރޫނަށް ގޮސްފައިވަނީ ޖެނުއަރީ 14 ވަނަ ދުވަހު އެވެ.
އެހެން ބައެއް އެއްބަސްވުންތަކުގެ ދަށުން ސަރުކާރުތަކަށް ސީދާ ގޮތުން ފައިސާ ދީފައިވެ އެވެ.
އާބާދީގައި 18،000 މީހުންވެސް ހަމަނުވާ ޕެސިފިކް ކުޑަ ޖަޒީރާ ގައުމެއް ކަމަށްވާ ޕަލާއޫ އިން ޑިސެމްބަރު 2025 ގައި ވަނީ 7.5 މިލިއަން ޑޮލަރުގެ ބަދަލުގައި ތިންވަނަ ގައުމުތަކުގެ 75 މީހުން ބަލައިގަތުމަށް އެއްބަސްވުމެއްގައި ސޮއިކޮށްފަ އެވެ.
ނަމަވެސް، އެ އެއްބަސްވުމުގެ ދަށުން މިހާތަނަށް އެ ގައުމަށް ފޮނުވާލާފައިވަނީ އެންމެ ތިން މީހުންނެވެ.
އެސްވާޓިނީގައި 5 މިލިއަން ޑޮލަރަށްވުރެ އަގުބޮޑު އެއްބަސްވުމެއްގެ ދަށުން 160 މީހުން ބަލައިގަތުމަށް އެއްބަސްވެފައިވާއިރު، ޖުލައި 2025 އިން ފެށިގެން މިހާތަނަށް 32 މީހުން ވަނީ އެ ގައުމަށް ގޮސްފަ އެވެ. މި ތަހުގީގުން އެނގުނު ގޮތުގައި، އެ ގައުމުން ވަނީ ކުށުގެ ރެކޯޑު އޮތް މީހުން ވެސް ބަލައިގެންފަ އެވެ.
މި އެއްބަސްވުންތަކަށް ކަނޑައެޅި 410 މިލިއަން ޑޮލަރުގެ ތެރެއިން 81 މިލިއަން ޑޮލަރު ހާއްސަކޮށްފައިވަނީ ސޮއިކުރި ގައުމުތަކުގެ ސަރުކާރުތަކަށް ކަމަށް ސްޓޭޓް ޑިޕާޓްމަންޓުގެ އެތެރޭގެ ލިޔެކިޔުންތަކުން ދައްކަ އެވެ.
ބާކީ ހުރި ފައިސާ އަމާޒުކޮށްފައިވަނީ އެހީދޭ ޖަމިއްޔާތަކަށެވެ. އޭގެ ތެރޭގައި އދ. ގެ އިންޓަނޭޝަނަލް އޯގަނައިޒޭޝަން ފޯ މައިގްރޭޝަން (އައިއޯއެމް) އަށް ދޭ 178 މިލިއަން ޑޮލަރާއި، ޔޫއެންއެޗްސީއާރު އަށް ދޭ 123 މިލިއަން ޑޮލަރު ހިމެނެ އެވެ.
މި ކަމުގައި ބައިވެރިވާތީ އެ އެޖެންސީތަކަށް ފާޑުކިޔުންތައް އަމާޒުވެފައިވީ ނަމަވެސް، ޔޫއެންއެޗްސީއާރު އިން ފޮބިޑަން ސްޓޯރީޒް އަށް ބުނީ އެއީ ދެ ގައުމުގެ ދެމެދުގައިވާ އެއްބަސްވުންތަކުގެ ބައިވެރިއެއް ނޫން ކަމަށާއި، އެމެރިކާގެ ފަންޑު ބޭނުންކުރަނީ ހިމާޔަތް ހޯދާ ނިޒާމުތައް ވަރުގަދަކުރުމުގެ މެންޑޭޓުގެ ދަށުން ކަމަށެވެ.
