ބާރުގެ ބޭނުންކޮށްގެން ގްރީންލޭންޑް ހިފާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވުމާ ގުޅިގެން އުފެދުނު ނުތަނަވަސްކަމަށް ނިމުމެއް ގެނެސް، އެ ސަރަހައްދުގެ ސަލާމަތީ ކަންކަމާ ގުޅޭ އެއްބަސްވުމެއްގައި އެމެރިކާ އާއި ޑެންމާކުން ސޮއިކޮށްފި އެވެ.
މި އެއްބަސްވުމާ ގުޅޭގޮތުން ޓްރަމްޕް ވިދާޅުވީ، މީގެ ސަބަބުން ގްރީންލޭންޑްގެ ސަލާމަތީ ކަންކަމާއި އެހެނިހެން ހުރިހާ ބޭނުންތަކެއްގެ މައްޗަށް އެމެރިކާއަށް "ދާއިމީ ބާރުވެރިކަން" ލިބިގެންދާނެ ކަމަށެވެ.
ޑެންމާކުގެ ބޮޑުވަޒީރު ވިދާޅުވީ މި އެއްބަސްވުމުގެ ސަބަބުން އާކްޓިކް ސަރަހައްދާއި އުތުރު އެޓްލާންޓިކް ސަރަހައްދުގެ ސަލާމަތީ ކަންކަން ވަރުގަދަވެގެންދާނެ ކަމަށެވެ. ނަމަވެސް، ޓްރަމްޕް ސޯޝަލް މީޑިއާގައި ހާމަކުރެއްވި ބައެއް ތަފުސީލުތަކާ ގުޅޭގޮތުން ބޮޑުވަޒީރު އެއްޗެއް ވިދާޅެއް ނުވެ އެވެ.
މި އެއްބަސްވުމަކީ ގްރީންލޭންޑްގެ ސްޓްރެޓީޖިކް މުހިންމުކަމާއި އެ ތަނުގެ ގުދުރަތީ މުއްސަނދި ކަމަށް ރިއާޔަތްކޮށް، ގައުމީ ސަލާމަތަށްޓަކައި އެ ސަރަހައްދު "އަތުލާނެ" ކަމަށް ބުނެ ޓްރަމްޕް މަސްތަކެއް ވަންދެން ދެއްވަމުން ގެންދެވި އިންޒާރުތަކަށް ފަހު ވެވުނު އެއްބަސްވުމެކެވެ.
ޓްރަމްޕްގެ "ޓްރޫތް ސޯޝަލް" އެކައުންޓުގައި ކުރެއްވި ޕޯސްޓެއްގައި ވިދާޅުވީ، މި އެއްބަސްވުމަކީ އެމެރިކާއިން އެއްވެސް ހަރަދެއް ކުރަންޖެހޭ ކަމެއް ނޫން ކަމަށާއި، މީގެ ސަބަބުން ގްރީންލޭންޑްގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި "ކުރަންޖެހޭ ކޮންމެ ކަމެއް ކުރުމުގެ" ބާރު އެމެރިކާއަށް ލިބޭނެ ކަމަށެވެ.
އޭނާ އިތުރަށް ވިދާޅުވީ، އެމެރިކާއާ ދެކޮޅު އެއްވެސް ގައުމަކަށް ގްރީންލޭންޑްގައި އަސްކަރީ ހަރަކާތެއް ނުހިންގޭނެ ކަމަށާއި، އެމެރިކާގެ ލިޔުމުން ދޭ ހުއްދައެއް ނެތި އެ ގައުމުގައި "ނާޒުކު އިންވެސްޓްމަންޓްތައް" ނުކުރެވޭނެ ކަމަށް އެއްބަސްވުމުގައި ބަޔާންކޮށްފައިވާނެ ކަމަށެވެ.
ޑެންމާކުގެ ބޮޑުވަޒީރު މެޓޭ ފްރެޑްރިކްސަން ކަށަވަރުކޮށްދެއްވި ގޮތުގައި، އަންނަ ހަފުތާގައި އދ. ގެ އާންމު މަޖިލީހުގެ ހަވާސާގައި މި އެއްބަސްވުމުގައި ރަސްމީކޮށް ސޮއިކުރާނެ އެވެ.
ބޮޑުވަޒީރު ވިދާޅުވީ މި އެއްބަސްވުމުގެ ސަބަބުން އާކްޓިކް ސަރަހައްދުގެ ސަލާމަތީ ކަންކަން ވަރުގަދަވާނެ ކަމަށާއި، ހަމައެއާއެކު ޑެންމާކުގެ އިސްތިގުލާލާއި ސަރަހައްދީ ނުފޫޒުގެ އިތުރުން ގްރީންލޭންޑްގެ ރައްޔިތުން އަމިއްލަ އިހުތިޔާރުގައި ގޮތް ނިންމުމަށް އޮތް ހައްގަށް ވެސް އިހުތިރާމްކުރާނެ ކަމަށެވެ.
އޭނާ އިތުރަށް ވިދާޅުވީ، މި އެއްބަސްވުމަށް އަމަލުކުރަން ފެށޭނީ ޕާލަމަންޓުން ފާސްކޮށް، ގާނޫނީ ގޮތުން ފުރިހަމަކުރަންޖެހޭ އިޖުރާއަތްތައް ނިންމުމަށްފަހު ކަމަށެވެ.
ގްރީންލޭންޑް ސަރުކާރުގެ ޗެއާމަން ޖެންސް-ފްރެޑްރިކް ނީލްސަން ނެރުއްވި ބަޔާނެއްގައި ވިދާޅުވީ، ގްރީންލޭންޑާއި ޑެންމާކު އަދި އެމެރިކާގެ ސަލާމަތް ކަށަވަރުކޮށްދޭ މިފަދަ އެއްބަސްވުމަކަށް އާދެވުމަކީ އުފާކުރާ ކަމެއް ކަމަށެވެ.
މައުދަނުން މުއްސަނދިވެފައިވާ ގްރީންލޭންޑަކީ ރަޝިއާ އާއި ޗައިނާ ފަދަ ގައުމުތަކުގެ ނުފޫޒު ފޯރުމުގެ ބިރު އޮތް ތަނެއް ކަމަށް ބުނެ، އެ ސަރަހައްދު ގަތުމަށް ނުވަތަ އެމެރިކާގެ ބައެއްގެ ގޮތުގައި ހެދުމަށް ޓްރަމްޕް މަސްތަކެއް ވަންދެން މަސައްކަތް ކުރެއްވި އެވެ. އަދި އެތަން ހިފުމަށް އަސްކަރީ ބާރު ބޭނުންކޮށްފާނެ ކަމުގެ އިންޒާރު ދެއްވުމުން، ޑެންމާކާއި ނޭޓޯގެ އެހެން ގައުމުތަކުން ވަނީ އެކަމާ ވަރަށް ބޮޑަށް ކަންބޮޑުވުން ފާޅުކޮށްފަ އެވެ.
