އާޓިފިޝަލް އިންޓެލިޖެންސް (އޭއައި) ޓެކްނޮލޮޖީގެ ނުރައްކާތެރިކަމުގެ ވާހަކަތައް ގަދަވެފައި ވަނިކޮށް، އެމެރިކާގައި "އޭއައި ފޯސް" އެއް އުފައްދަވައި، އެ ދާއިރާގެ ކަންކަން ބެލެހެއްޓުމަށް "އޭއައި ޒާރު" އެއް ނުވަތަ އިސްވެރިއަކު އައްޔަންކުރައްވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިއުލާނު ކުރައްވައިފި އެވެ.
ހޮނިހިރު ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އޭނާގެ ސަރުކާރުން އެއްވެސް ގޮތަކަށް އޭއައި ސިނާއަތުގެ ކުރިއެރުމަށް ހުރަސްއަޅައި ނުވަތަ އެ މަސައްކަތް ހުއްޓުވައި ނުލާނެ ކަމަށެވެ. އަދި އޭއައި ޓެކްނޮލޮޖީ ބޭނުންކުރުމުގައި ރައްކާތެރިކަމުގެ ހަރުދަނާ ފިޔަވަޅުތަކެއް އެޅެންދެން، އެ ދާއިރާ ތަރައްގީކުރުން މަޑުޖައްސާލުމަށް ގޮވާލަމުންދާ ގޮވާލުންތަކަށް ވެސް ޓްރަމްޕް ވަނީ ރައްދު ދެއްވާފައެވެ.
ޓްރަމްޕް މިފަދައިން ވިދާޅުވެފައި މިވަނީ، އޭއައިގެ ސަބަބުން ކުރިމަތިވެދާނެ ނުރައްކާތަކާ ގުޅޭގޮތުން ގިނަ އިންޒާރުތަކެއް ލިބެމުންދާތީ، އެ ޓެކްނޮލޮޖީ ތަރައްގީކުރުމުގައި ގުޅިގެން ފިޔަވަޅުތަކެއް އެޅުމަށް ގޮވާލުންތައް އިތުރުވެފައިވާ ދަނޑިވަޅެއްގައެވެ.
އޭއައި ފޯސް އުފެއްދުމާ ގުޅޭގޮތުން ޓްރަމްޕް އިއުލާނު ކުރެއްވި ނަމަވެސް، އެ މަޝްރޫއުގެ ތަފުސީލެއް ނުވަތަ އެކަން ކުރިއަށްދާނެ ތާވަލެއް އޭނާ ހާމަކުރައްވާފައެއް ނުވެއެވެ.
ސޯޝަލް މީޑިއާގައި ޓްރަމްޕް އިތުރަށް ވިދާޅުވީ، އޭއައި އަކީ ދެން އަންނަން އޮތް ސިނާއީ އިންގިލާބު ނުވަތަ އިންޓަނެޓް ފަދަ ވަރުގަދަ ވަސީލަތެއް ކަމަށާއި، ނަމަވެސް މީގެ ނުފޫޒާއި ބޮޑުމިން އެއަށްވުރެ މާ ބޮޑުވާނެ ކަމަށެވެ. އަދި މިއީ އެމެރިކާގެ ޖީޑީޕީގެ 25 އިންސައްތައާ ގާތްކުރާ މިންވަރެއްގެ ބޮޑު ދާއިރާއަކަށް ވެދާނެ ކަމަށް ލަފާކުރައްވަމުން، އޭއައިގެ ދާއިރާއިން ޗައިނާއަށްވުރެ ކުރީގައި އެމެރިކާ ދެމިއޮތުމަށް ބޭނުންވާ ކަމަށް ވެސް ޓްރަމްޕް ވިދާޅުވިއެވެ.
ދުނިޔޭގެ އެންމެ ބޮޑު ދެ އިގުތިސާދު ކަމަށްވާ އެމެރިކާ އާއި ޗައިނާއިން ކުރިއަރާފައިވާ ޓެކްނޮލޮޖީގެ ދާއިރާއިން ކުރިހޯދުމަށް މަސައްކަތް ކުރަމުންދާއިރު، މިހާރު ދެ ގައުމުގެ ވާދަވެރިކަމުގެ މަރުކަޒަކީ އޭއައި އެވެ. އަދި އަންނަ ހަފުތާގައި ޓްރަމްޕް ޗައިނާގެ ރައީސް ޝީ ޖިންޕިންއާ ބައްދަލުކުރައްވާއިރު މި މައުޟޫއަށް މަޝްވަރާ ކުރައްވާނެ ކަމަށް ބެލެވެއެވެ.
މީގެ އިތުރުން ޓްރަމްޕް ވިދާޅުވީ، އޭއައި ބޭނުންކޮށްގެން ނޭދެވޭ އަމަލުތައް ހިންގާ ފަރާތްތަކާ ދެކޮޅަށް މިހާރު އޮތް ޖިނާއީ އަދި މަދަނީ އަދުލުގެ ނިޒާމުގެ ތެރެއިން އޭނާގެ ސަރުކާރުން ފިޔަވަޅު އަޅާނެ ކަމަށެވެ.
އޭއައިގެ ސަބަބުން ކުރިމަތިވެދާނެ ނުރައްކާތަކާ މެދު ކުރެވޭ ތުހުމަތުތަކާއި ކަންބޮޑުވުންތަކަކީ "އޮޅުވާލުމެއް" ގެ ގޮތުގައި ސިފަކުރައްވައި، ޓްރަމްޕް ވަނީ ކުރިން ދެއްކެވި ވާހަކަތައް ތަކުރާރު ކުރައްވާފައެވެ.
އޭއައި ޓެކްނޮލޮޖީގެ ސަބަބުން އިންސާނިއްޔަތަށް ނުރައްކާވެދާނެ ކަމަށް މިހާރުގެ އަދި ކުރީގެ ދިރާސާވެރިން ބުނަމުންދާއިރު، އޭގެ ތެރެއިން އެކަކު ވަނީ މި ޓެކްނޮލޮޖީގެ ސަބަބުން "ހުރިހާ އިންސާނުން މަރުވުމުގެ" 10 ޕަސެންޓަށްވުރެ ބޮޑު ފުރުސަތެއް އޮތް ކަމަށް ބުނެފަ އެވެ. މިފަދަ ވާހަކަތަކުގެ ސަބަބުން ފާއިތުވި ހަފުތާތަކުގައި ވަނީ ބޮޑު ސަމާލުކަމެއް މިކަމަށް ހުއްޓިފައެވެ.
އޭއައިގެ ދާއިރާގައި މަސައްކަތްކުރާ ބޮޑެތި ކުންފުނިތަކުން ދަނީ އިންސާނުންނަށްވުރެ ބުއްދިވެރި ޓެކްނޮލޮޖީއެއް ކަމަށްވާ "ސުޕަ އިންޓެލިޖެންސް" އުފެއްދުމަށް ވާދަވެރި މަސައްކަތްތަކެއް ކުރަމުންނެވެ.
ކްލޯޑް، ޗެޓްޖީޕީޓީ އަދި ޖެމިނައި ފަދަ އޭއައި ވަސީލަތްތައް އުފައްދާފައިވާ އެންތްރޮޕިކް، އޯޕަން އޭއައި އަދި ގޫގުލް ފަދަ ކުންފުނިތަކުން ވަނީ، އެ ކުންފުނިތަކުގެ ޗެޓްބޮޓްތައް ބޭނުންކޮށްގެން ނުރައްކާތެރި އަމަލުތައް ހިންގާފައިވާ ބައެއް ހާދިސާތަކާއި ސެކިއުރިޓީ ބްރީޗްތަކުގެ މައުލޫމާތު ހާމަކޮށްފައެވެ.
އެންތްރޮޕިކްގެ ވެރިޔާ ދާރިއޯ އަމޯޑޭ ދާދިފަހުން ވަނީ އޭއައި ތަރައްގީކުރުން މަޑުޖައްސާލުމަށް ގޮވާލައްވައި، މުޅި ސިނާއަތް ރެގިއުލޭޓްކޮށް، އޭއައި މޮޑެލްތައް ތަރައްގީކުރާ ގޮތް މިނިވަން ފަރާތްތަކުން މޮނިޓާކުރުމަށް ހުށަހަޅުއްވާފައެވެ.
އޯޕަން އޭއައިގެ ސޭމް އޮލްޓްމަން އާއި އެކްސް އޭއައިގެ އީލޮން މަސްކް ވެސް ވަނީ އަމޯޑޭގެ މި ހުށަހެޅުންތަކަށް ތާއީދުކުރައްވާ ކަމަށް ވިދާޅުވެފައެވެ.
އެންތްރޮޕިކްގެ ކޯ-ފައުންޑަރ ޖެކް ކްލާކް ބީބީސީއަށް މައުލޫމާތު ދެއްވަމުން ވިދާޅުވީ، ތިންވަނަ ފަރާތަކަށް ޗެކް ކުރެވޭ ފަދަ "ކިލް ސްވިޗް" އެއް ނުވަތަ ކުއްލި ހާލަތުގައި ނިޒާމު ހުއްޓުވޭނެ ގޮތެއް އޮތުމަކީ މި ސިނާއަތުގައި މަޖުބޫރު ކަމަކަށް ހަދަންޖެހިދާނެ ކަމަށެވެ.
މި އިންޒާރުތަކާ ގުޅިގެން އެމެރިކާގެ ގާނޫނު ހަދާ މަޖިލީހުގެ މެންބަރުން ދަނީ އޭއައިއާ ގުޅޭ ގާނޫނުތައް ހުށަހަޅަމުންނެވެ. ނަމަވެސް އޮލްޓްމަން މި ހަފުތާގައި ވިދާޅުވީ، އާ ޓެކްނޮލޮޖީއާ އެއްވަރަށް ފައިހަމަކޮށް، އެކަން ރެގިއުލޭޓް ކުރުމުގައި ވޮޝިންޓަނަށް ދަތިތަކެއް ކުރިމަތިވެފައިވާ ކަމަށެވެ. އަދި އޭއައިގެ ރައްކާތެރިކަން ކަށަވަރުކުރުމުގައި އެ ޓެކްނޮލޮޖީ އުފައްދާ ކުންފުނިތަކަށް އާންމުން އިތުބާރު ކުރަންޖެހޭ ކަމަށް އޭނާ ވިދާޅުވި އެވެ.
ސެން ފްރެންސިސްކޯގައި ބޭއްވި ކޮންފަރެންސެއްގައި އޮލްޓްމަން ވިދާޅުވީ، އެ ކުންފުނިތަކުން ރަނގަޅު ގޮތް ނިންމާނެ ކަމަށް ދުނިޔެއިން އިތުބާރު ކުރަންޖެހޭ ކަމަށާއި، އެއީ އެކަމުގެ ސީރިއަސްކަން އެ ފަރާތްތަކަށް އިހުސާސްވާތީ ކަމަށެވެ.
އިނގިރޭސިވިލާތުގެ އެކި ސިޔާސީ ޕާޓީތަކަށް ނިސްބަތްވާ މެންބަރުން ވެސް ވަނީ އޭއައިގެ ސަބަބުން އިންސާނީ ހައްގުތަކަށް ނުރައްކާވެދާނެ ކަމަށް ބުނެފަ އެވެ. އަދި މިހާރު ހުރި ގާނޫނުތަކަކީ މި ޓެކްނޮލޮޖީގެ ހަލުވި ކުރިއެރުމާ އެކަށޭނަ ގޮތެއްގައި ކުރިމަތިލެވޭނެ ފަދަ ގާނޫނުތަކެއް ނޫން ކަމަށް އެ ބޭފުޅުން ވަނީ ވިދާޅުވެފަ އެވެ.
އިންސާނީ ހައްގުތަކާ ބެހޭ ޖޮއިންޓް ކޮމިޓީ (ޖޭސީއެޗްއާރް) އިން ވަނީ މިފަދަ ނުރައްކާތަކުގެ ސީރިއަސްކަމަށް ރިއާޔަތްކޮށް، އޭއައިއާ ގުޅޭ އާ ބިލެއް އެކުލަވާލުމަށް ގޮވާލައި ރިޕޯޓެއް ޝާއިއުކޮށްފަ އެވެ.
