ވެލާނާ އިންޓަނޭޝަނަލް އެއާޕޯޓުގެ ޗެކިން ކައުންޓަރު ސަރަހައްދުގައި ހުރެ، އޭނާގެ ދައްތަގެ ދަބަހުގައި ބޮމެއް އޮތް ކަމަށް ބުނެ އިންޒާރު ދިން މިސްރުގެ ރައްޔިތަކު ހައްޔަރުކޮށް، އޭނާގެ ބަންދަށް ކްރިމިނަލް ކޯޓުން ފަސް ދުވަހުގެ މުއްދަތެއް ޖަހައިފި އެވެ.
އެ މައްސަލައިގައި ހައްޔަރުކޮށް ބަންދުގެ މުއްދަތު ޖަހާފައި ވަނީ ޕީޓާ ސަމާން މަރްޒޫކް ސަމާން، 38އ ނަމަކަށް ކިޔާ މިސްރު މީހަކަށެވެ.
އެ ހާދިސާ ހިނގާފައި ވަނީ އެއާޕޯޓުގެ ޑިޕާޗާ ސްކްރީން ސަރަހައްދުގައި ސަލާމަތީ ކަންކަން ބަލަހައްޓާ އޮފިސަރުން، އެ މީހާގެ ދައްތަގެ ދަބަސް ބަލައިފާސްކުރަން އުޅުމުގެ ތެރޭގައި އެ ދަބަހުގައި ބޮމެއް އޮތް އޭނާ ބުނި މައްސަލައިގަ އެވެ. ނަމަވެސް، އެ ދަބަސް ބަލައިފާސްކުރި އިރު، ބޮމެއް ނުވަތަ ނުރައްކާތެރި އެއްވެސް އެއްޗެއް ފެނިފައެއް ނުވެ އެވެ.
މި މައްސަލައިގައި ހައްޔަރުކުރި މިސްރު މީހާ ކޯޓަށް ހާޒިރުކުރުމުން، އޭނާ ވަނީ އެއީ ސަމާސާއަކަށް ދެއްކި ވާހަކައެއް ކަމަށް ބުނެފަ އެވެ. އަދި އޭނާގެ އަމަލަށް މައާފަށް އެދި، ފުލުހުންގެ ތަހުގީގަށް ފުރިހަމައަށް އެއްބާރުލުން ދިން ކަމަށް ވެސް އޭނާ ވަނީ ބުނެފަ އެވެ.
އެހެންނަމަވެސް، ފަސް ދުވަހުގެ މުއްދަތަކަށް އޭނާ ބަންދުކުރަން ކްރިމިނަލް ކޯޓުން ނިންމީ އޭނާ ބަންދުން ދޫކޮށްލައިފި ނަމަ، މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ބުނެ އެވެ.
އެއާޕޯޓުތަކުގައި ބޮމުގެ އިންޒާރު ދިނުމާއި، ނުރައްކާތެރި ހަތިޔާރެއް އޮތް ކަމަށް ބުނެ ސަމާސާއެއްގެ ގޮތުގައި ވެސް ދޮގު މައުލޫމާތު ދިނުމަކީ ކަނޑައެޅިގެން މަނާ ކަމެކެވެ.
މީގެ ކުރިން ވެސް މިފަދަ ސަމާސާ ވާހަކަތައް ދެއްކި ބައެއް މީހުން ހައްޔަރުކޮށް، ގާނޫނީ ފިޔަވަޅު އަޅާފައިވެ އެވެ.
