ޔުނައިޓެޑް އެރަބް އެމިރޭޓްސްގެ އީގަލްސް ހިލްސްއަށް ރަސްމާލެ ދޫކޮށްލަން ހެދި އެގްރިމެންޓު ހާމަކުރަން ގޮވާލައި ރައްޔިތުންގެ މަޖިލީހަށް މެންބަރު މީކާއިލް އަހުމަދު ނަސީމް ކުއްލި މައްސަލައެއް ހުށަހަޅައިފި އެވެ.
އިދިކޮޅު އެމްޑީޕީއަށް ނިސްބަތްވާ މީކާއީލް ހުށަހެޅުއްވި މައްސަލައިގައި ވަނީ ރަސްމާލެ ދޫކޮށްލަން ސެޕްޓެމްބަރު 21، ގައި ހެދި އެގްރިމެންޓާމެދު ވަރަށް ގިނަ ކަންބޮޑުވުންތައް ފާޅުކޮށްފަ އެވެ. އެގޮތުން އޭނާ ފާހަގަ ކުރި މައްސަލަތަކުގެ ތެރޭގައި؛
- އެއްބަސްވުން ހާމަނުކުރުން ދައުލަތުގެ މާލިއްޔަތަށް ގެއްލުންލިބި، ކޮރަޕްޝަނަށް މަގުފަހިވުން
- އެއްބަސްވުން ހާމަނުކުރުމުގެ ސަބަބުން
- ރައްޔިތުންގެ ފައިސާއިން ބިން ހިއްކުމަށްފަހު، ދިޔަ ހަރަދު ވެސް ނުލިބޭ ގޮތަށް އެތަން އީގަލް ހިލްސްއަށް ދޫކޮށްލުން
- ރަސްމާލެއިން 500 ހެކްޓަރު 99 އަހަރަށް ދިނުން
- އެކުއިޒިޝަން ކޮސްޓެއް ނުވަތަ ބިމު ކުއްޔަށް ނުނަގާ ގޮތަށް ރަސްމާލެ ދޫކޮށްލުން
- ތިން ވަނަ ފަރާތަކަށް ކުއްޔަށް ދީގެން (ރޯލިން އިންޓްރެސްޓް އުފެއްދުމުގެ ހައްގު) އީގަލް ހިލްސްއަށް އޮތުން
އޭގެ އިތުރުން، ދިވެހިރާއްޖޭގެ އެއްވެސް ސަރަހައްދެއް ބޭރުގެ ބަޔަކަށް ދޫނުކޮށްލެވޭނެ ކަމަށް ގާނޫނުއަސާސީގައި ބަޔާންކޮށްފައިވާ ކަމަށް ވެސް މީކާއީލް ހުށަހެޅި މައްސަލައިގައި ބުނެފައިވެ އެވެ. އަދި ރަސްމާލެ ދޫނުކޮށްލަން ރައީސް މުހައްމަދު މުއިއްޒު ވައުދުވެވަޑައިގެންފައިވާތީ އެކަން ވެސް މީކާއީލްގެ މައްސަލައިގައި ފާހަގަކޮށްފައިވެ އެވެ.
ޔޫއޭއީގެ އީގަލް ހިލްސް އަށް ރަސްމާލެ ދޫކޮށްލަން ސަރުކާރުން އެއްބަސްވީ 99 އަހަރަށެވެ. ރަސްމާލެއިން އެޕާޓްމަންޓެއް ގަންނަ ބިދޭސީ މީހާއަށް ލިބޭ 99 އަހަރުގެ ލީސް މުއްދަތުގައި އެތަން ވިއްކާލައިފި ނަމަ ނުވަތަ ހިބައިން ދީފި ނަމަ 99 އާ ލީސް މުއްދަތެއް ފެށޭނެ އެވެ.
ރާއްޖޭގެ ބައެއް ބޭރު މީހުންނަށް 99 އަހަރަށް ވުރެ ދިގު ނޫން މުއްދަތަކަށް ދިނުން ގާނޫނުއަސާސީ ހުއްދަ ކުރެ އެވެ. ނަމަވެސް އެކަމާ ގުޅޭ ގާނޫނެއް މިހާތަނަކަށް ނެތެވެ. ޓޫރިޒަމާ ބެހޭ ގާނޫނުން ހުއްދަ ލިބެނީ 50 އަހަރަށެވެ. އަދި ލީސް މުއްދަތު އިތުރު 49 އަހަރަށް އެކްސްޓެންޑު ކުރެވިދާނެ އެވެ.
ސްޕެޝަން އިކޮނޮމިކް ގާނޫނުގެ ދަށުން ބިދޭސީ ބަޔަކަށް އެންމެ ގިނަވެގެން ބިމެއް ދޫކުރެވެނީ 66 އަހަރަށެވެ. އެކަމަކު އެ މުއްދަތު 33 އަހަރަށް އިތުރު ކުރެވިދާނެ އެވެ.
ރަސްމާލެ ދޫކޮށްލަން ސަރުކާރުން އެއްބަސްވީ އެކުއިޒިޝަން ފީއެއް އަދި ބިމު ކުއްޔެއް ވެސް ނުނަގާ ގޮތަށެވެ. ސަރުކާރަށް ލިބޭ ހަމައެކަނި އެއްޗަކީ ރަސްމާލޭގައި އަޅާ ކޮމާޝަލް ޕްރޮޕަޓީސް ވިއްކައިގެން ލިބޭ ރެވެނިއުގެ 10 ޕަސެންޓާއި އެޕާޓްމަންޓުތައް ވިއްކައިގެން ލިބޭ ރެވެނިއުގެ ހަތަރު ޕަސެންޓެވެ.
ވަޒީރު މުއްތަލިބު ވިދާޅުވީ ރަސްމާލޭގައި އަޅާ އިމާރާތްތައް ވިއްކައިގެން ދައުލަތަށް ތިން ބިލިއަން ޑޮލަރު ނުވަތަ 46 ބިލިއަން ރުފިޔާ 10 އަހަރު ތެރޭގައި ލިބޭނެ ކަމަށެވެ. އެއީ މިދިޔަ އަހަރު ބަޖެޓަށްވުރެ ވެސް ކުޑަ އަދަދެކެވެ.
