ސީރިއާގައި ބޮޑު ދެ މަޝްރޫއުއެއް ހިންގުމަށް ޔޫއޭއީގެ އީގަލް ހިލްސްއާއެކު އެ ގައުމުގެ ސަރުކާރުން ފްރޭމްވޯކް އެއްބަސްވުމެއްގައި ސޮއިކޮށްފި އެވެ.
އީގަލް ހިލްސްއަކީ ރަސްމާލެއިން 500 ހެކްޓަރު ދިނުމަށް ނިންމާފައިވާ ކުންފުންޏެވެ. އެ ކުންފުންޏަށް އެތައް ހަރަދެއްކޮށްގެން ހިއްކި ބިން 99 އަހަރަށް ދޫކޮށްލަނީ ހިލެ އެވެ.
ސީރިއާގެ ރިޔާސީ ގަނޑުވަރުގައި ބޭއްވި ހާއްސަ ރަސްމިއްޔާތެއްގައި އެ ގައުމުގެ ރައީސް އަހުމަދު އަލް-ޝަރާއުގެ ހާޒިރުގައި މި އެއްބަސްވުމުގައި އީގަލް ހިލްސްގެ ފަރާތުން ސޮއިކުރެއްވީ އެ ކުންފުނީގެ ވެރިޔާ މުހައްމަދު އަލަބާރެވެ. ސީރިއާ ސަރުކާރުގެ ފަރާތުން ސޮއިކުރެއްވީ ހައުސިން މިނިސްޓަރާއި ޓޫރިޒަމް މިނިސްޓަރެވެ.
މި އެއްބަސްވުމުގެ ދަށުން މައިގަނޑު ދެ މަޝްރޫއެއް ހިންގުމަށް ވަނީ ހަމަޖެހިފަ އެވެ. އެއީ ދިމިޝްކުގައި އެޕާޓްމަންޓްތަކާއި، ވިލާތަކާއި، ހޯޓާތަކުގެ އިތުރުން ފިހާރަތައް ހިމެނޭ ގޮތަށް ތަރައްގީކުރާ ޓަވަރުތަކަކާއި ލަޓާކިއާގައި ރެސިޑެންޝަލް ހައުސިން، ފަތުރުވެރިކަމުގެ ވަސީލަތްތައް އަދި މެރީނާއެއް ހިމެނޭ ގޮތަށް ތަރައްގީކުރާ މެރީނާއެކެވެ.
ދިމިޝްކުގެ ވަށައިގެންވާ ސަރަހައްދުތަކުގައި ރިއަލް އެސްޓޭޓް މަޝްރޫއުތަކަށް 10 ބިލިއަނާއި 11 ބިލިއަން ޑޮލަރާ ދެމެދުގެ އަދަދެއް އަދި ޓޫރިޒަމް ޕްރޮޖެކްޓަށް ފަސް ބިލިއަނާއި ހަތް ބިލިއަން ޑޮލަރާ ދެމެދުގެ އިންވެސްޓްމަންޓެއް ކުރާނެ ކަމަށް މީގެކުރިން އީގަލް ހިލްސްއިން ހާމަކޮށްފައިވެ އެވެ.
ބްލޫމްބާގުން ރިޕޯޓުކޮށްފައިވާ ގޮތުގައި މި މަޝްރޫއުތަކުގެ ޖުމްލަ އަގު 20 ބިލިއަން ޑޮލަރަށް އަރާނެ އެވެ. މިއީ ރާއްޖޭގައި ހިންގާ މަޝްރޫއުގެ އަގު ކަމަށް ވެސް ދިވެހި ސަރުކާރުން އޮތީ ބުނެފަ އެވެ. ނަމަވެސް، އީގަލް ހިލްސްގެ ނޫސްބަޔާނުގައި އެ އަދަދުގެ ގޮތުގައި އޮތީ 12 ބިލިއަން ޑޮލަރެވެ.
މި މަޝްރޫއުތަކުގެ ސަބަބުން ސީރިއާގައި 40،000 އަށްވުރެ ގިނަ ވަޒީފާގެ ފުރުސަތު އުފެދިގެންދާނެ ކަމަށް އީގަލް ހިލްސްއިން ބުނެ އެވެ.
