2016 ވަނަ އަހަރު ފަރަންސޭސިވިލާތުގެ ވެރިރަށް ޕެރިހުގައި ކިމް ކާޑޭޝިއަންގެ އަތުން ގިނަ އަދަދެއްގެ ގަހަނާ ފޭރުނު މައްސަލައިގައި، އޭނާއަށް ލިބުނު ގެއްލުމުގެ ބަދަލެއްގެ ގޮތުގައި އެންމެ ޔޫރޯއެއް (1.15 ޑޮލަރު) ދިނުމަށް ޕެރިހުގެ ކޯޓަކުން ހުކުމްކޮށްފި އެވެ.
މި މައްސަލައިގައި ހިމެނޭ ވަކީލަކު ވިދާޅުވި ގޮތުގައި، ބަދަލުގެ ގޮތުގައި މި ކުޑަ އަދަދު ކަނޑައެޅީ ކާޑޭޝިއަން އަމިއްލައަށް އެދިފައިވާ ގޮތުގެ މަތިންނެވެ.
މި ހާދިސާއަކީ އޭނާގެ ހަޔާތުގައި ކުރިމަތިވި "އެންމެ ބިރުވެރި ތަޖުރިބާ" ކަމަށް ކާޑޭޝިއަން ސިފަކޮށްފައިވާއިރު، މިދިޔަ އަހަރު ކޯޓުން ވަނީ މި ވައްކަމުގައި ބައިވެރިވި އަށް މީހެއްގެ މައްޗަށް ކުށް ސާބިތުވާކަމަށް ކަނޑައަޅާފަ އެވެ. ކާޑޭޝިއަން އާއި އޭނާގެ ސްޓައިލިސްޓް ސިމޯން ހަރޫޝް ނެރުނު ގުޅިފައިވާ ބަޔާނެއްގައި، ފަރަންސޭސިވިލާތުގެ ކޯޓުތަކަށް ވަނީ ޝުކުރު އަދާކޮށްފަ އެވެ.
އެސޯސިއޭޓެޑް ޕްރެސް (އޭޕީ) އަށް ދިން ބަޔާނުގައި ބުނެފައިވަނީ، އެ ހާދިސާއަކީ ނަފްސާނީ ގޮތުން ވަރަށް ބޮޑު އަސަރެއް ކުރި ކަމެއް ކަމަށާއި، އޭގެ ނޭދެވޭ އަސަރު އަދިވެސް ދެމިއޮތް ކަމަށެވެ. އަދި ކޯޓުގެ ނިންމުމަކީ ފައިސާގެ ބަދަލަށްވުރެ ބޮޑަށް، ކުށްވެރިން ޒިންމާދާރުކުރުވުމާއި އިންސާފު ގާއިމުވުން ކަމަށް އެ ބަޔާނުގައި ފާހަގަކޮށްފައިވެ އެވެ. މީގެ އިތުރުން، މި މަރުހަލާގައި އެހީތެރިވި ހުރިހާ ފަރާތްތަކަށް ޝުކުރު އަދާކުރަމުން، މިހާރު ބޭނުންވަނީ އެ ހިތްދަތި ހަނދާންތަކުން އަރައިގަނެ ކުރިއަށް ދިއުމަށް ކަމަށްވެސް ބުނެފައިވެ އެވެ.
ކާޑޭޝިއަން މަޑުކޮށްގެން ހުރި "ހޮޓެލް ޑި ޕޯޓަލޭސް" ގެ ރިސެޕްޝަނިސްޓަކަށް ލިބުނު ގެއްލުމުގެ ބަދަލެއްގެ ގޮތުގައި 109,516 ޔޫރޯ (126,472 ޑޮލަރު) ދިނުމަށް ވެސް ކޯޓުން ވަނީ އަމުރުކޮށްފަ އެވެ. މި ވައްކަން ހިންގި ގުރޫޕުން ކާޑޭޝިއަންއަށް އަމާޒުކޮށް ހަމަލާދިން އިރު، އެ ރިސެޕްޝަނިސްޓް ވެސް އެތަނުގައި ހުއްޓެވެ.
އޮކްޓޯބަރު 2، 2016 ގައި ޕެރިސް ފެޝަން ވީކް ތެރޭގައި ހިންގި މި ބޮޑު ވައްކަމުގެ ސަބަބުން ނަފްސާނީ ގޮތުން ބޮޑެތި ގެއްލުންތަކެއް ލިބިފައިވާ ކަމަށް ރިސެޕްޝަނިސްޓް ބުނެފައިވެ އެވެ. އޭނާ ބަދަލުގެ ގޮތުގައި 550,000 ޔޫރޯ (634,868 ޑޮލަރު) ހޯދުމަށް އެދިފައިވީ ނަމަވެސް، އޭނާގެ ވަކީލު މުހަންދު އުއިޖާ ވިދާޅުވީ ކޯޓުގެ މި ނިންމުމަކީ ލިބުނު ކާމިޔާބީއެއް ކަމަށެވެ.
ކޯޓުން ވަނީ އެ ހޮޓަލަށް ލިބުނު ގެއްލުމުގެ ބަދަލެއްގެ ގޮތުގައި 50,000 ޔޫރޯ (57,741 ޑޮލަރު) ދިނުމަށް އަމުރުކޮށްފަ އެވެ. އަދި ވައްކަން ކުރި ވަގުތު ކާޑޭޝިއަންއާއެކު ހުރި އޭނާގެ ސްޓައިލިސްޓް ހަރޫޝް އެދުނު ގޮތަށް، އޭނާއަށް ވެސް ބަދަލުގެ ގޮތުގައި އެންމެ ޔޫރޯއެއް ދިނުމަށް ވަނީ ހުކުމްކޮށްފަ އެވެ.
މިކަން ހިނގީ ފުލުހުންގެ ހެދުމުގައި ތިބި ދެ މީހަކު ކާޑޭޝިއަން ހުރި ކޮޓަރިއަށް ވަދެގަނެ، އޭނާގެ އަތާއި ފައި ބަނދެ އަނގަ ބަންދުކުރުމަށް ފަހު، 6 މިލިއަން ޑޮލަރަށްވުރެ އަގުބޮޑު ގަހަނާ ފޭރިގަނެގެންނެވެ. އޭގެ ތެރޭގައި އެރޭ ޝޯއަށް އޭނާ އެޅި އަލިމަސް އަނގޮޓި ވެސް ހިމެނެ އެވެ.
މި ވައްކަން ކުރި މީހުންގެ އުމުރަށް ބަލައި، ފަރަންސޭސިވިލާތުގައި އެމީހުން މަޝްހޫރުވެފައިވަނީ "ކާފަ ވަގުން" ނުވަތަ "ލެ ޕަޕީސް ބްރަކުއާސް" ގެ ނަމުންނެވެ. ހަތިޔާރާއެކު ފޭރުމާއި، މީހުން ރަހީނުކުރުމާއި، ކުށްކުރާ ގުރޫޕެއް ހިންގުމުގެ ދައުވާ އުފުލުނު އިރު، އޭގެ ތެރެއިން ހަ މީހުންގެ އުމުރަކީ 60 އާއި 70 އަހަރާ ދެމެދެވެ.
ޝަރީއަތް ނިމެންދެން ބަންދުގައި ތިބި މުއްދަތު ހުކުމުގެ މުއްދަތުން އުނިކުރުމުން، ކުށް ސާބިތުވި އެއްވެސް މީހަކު އަލުން ޖަލަށް ދާކަށް ނުޖެހުނެވެ. އަދި އެއްވެސް މީހަކު ކޯޓުގެ ހުކުމް އިސްތިއުނާފުކޮށްފައެއް ވެސް ނުވެ އެވެ.
