އެމެރިކާގެ އެކްޓްރެސް ހޭޑަން ޕެނެޓިއޭ މަރުވީ މަސްތުވާތަކެތި އޯވަޑޯޒްވެގެން ކަމަށް ކަނޑައަޅައި، އެ މައްސަލައިގެ ތަހުގީގު ފުލުހުން ނިންމާލައިފި އެވެ.
އުމުރުން 36 އަހަރުގެ ހޭޑަން މަރުވީ މިދިޔަ އޮގަސްޓު މަހުގެ 16 ވަނަ ދުވަހު ސައުތު ކެރޮލައިނާގައި ހުންނަ އޭނާގެ ގޭގަ އެވެ. ގްރީންވިލް ޕޮލިސް ޑިޕާޓްމަންޓުން ބުނީ މެޑިކަލް އެގްޒެމިނަރުގެ ރިޕޯޓަށް ބިނާކޮށް، އޭނާ މަރުވީ ޑްރަގް އޯވަޑޯޒް ވެގެން ކަމަށް ކަނޑައަޅާފައިވާ ކަމަށެވެ.
ހޭޑަންގެ ހަށިގަނޑުން ފެނިފައިވާ ޑްރަގްތަކުގެ ތެރޭގައި ފެންޓަނީލް އާއި ޒެނެކްސްގެ އިތުރުން މަސްލް ރިލެކްސަންޓެއް ކަމަށްވާ މެތޯކާބަމޯލް އަދި ނަފްސާނީ ބަލިތަކަށް ފަރުވާކުރަން ބޭނުންކުރާ ކުއެޓިއާޕިން ހިމެނެ އެވެ. ފެންޓަނީލް އަކީ ފާއިތުވި ފަސް އަހަރުގެ ތެރޭގައި އެމެރިކާގައި އެތައް ލައްކަ ބަޔަކު މަރުވުމަށް މެދުވެރިވި ނުރައްކާތެރި ބާވަތެކެވެ.
މި މައްސަލަ ތަހުގީގު ކުރުމުގައި އެމެރިކާގެ ޑްރަގް އެންފޯސްމަންޓް އެޖެންސީ (ޑީއީއޭ) އިން ވެސް ހަރަކާތްތެރިވި އެވެ. ނަމަވެސް އެ އިދާރާގެ ތަހުގީގު ނިމުނުކަން އަދި ސާފެއް ނުވެ އެވެ.
ފުލުހުންގެ ރިޕޯޓުތައް ބުނާގޮތުން، އެމަޖެންސީގައި ސިއްހީ އެހީތެރިން ހޭޑަންގެ ގެއަށް ދިޔައިރު އޭނާގެ ކުރީގެ ލޯބިވެރިޔާ ބްރަޔަން ހިކަސަން އާއި އޭނާގެ ބޭބެ ޒެކް އެތާނގައި ތިއްބެވެ. ހޭޑަންގެ އޮޓޮޕްސީން އޭނާއަށް އެއްވެސް އަނިޔާއެއް ދީފައިވާ ކަމުގެ ނިޝާނެއް ފެނިފައެއް ނުވެ އެވެ.
ކުޑައިރުއްސުރެ އެކްޓުކުރަމުން އައި ހޭޑަން އަކީ "ހީރޯސް" އަދި "ނޭސްވިލް" ފަދަ ޑްރާމާތަކުން ގިނަ ބައެއްގެ ލޯބި ހޯދާފައިވާ ތަރިއެކެވެ. އޭނާ ވަނީ ޑްރަގަށް އެޑިކްޓުވުމުގެ މައްސަލަތަކާ ކުރިމަތިލާން ޖެހުނު ކަމަށް މީގެ ކުރިން އާންމުކޮށް ވާހަކަދައްކާފަ އެވެ.
