އެމެރިކާގެ ރައީސް ޑޮނަލްޑް ޓްރަމްޕަށް ތާއީދު ހޯދުމަށް މަސައްކަތްކުރާ ފަންޑްރެއިޒިން ކޮމިޓީއަކުން، ރޮކް މިއުޒިކްގެ ފަންނާނު ނީލް ޔަންގްގެ 1989 ވަނަ އަހަރުގެ މަޝްހޫރު ލަވަ "ރޮކިން އިން ދަ ފްރީ ވޯލްޑް" ހުއްދަނެތި ބޭނުންކުރި ކަމަށް ބުނެ، 10 މިލިއަން ޑޮލަރުގެ ދައުވާއެއް އުފުލައިފި އެވެ.
ކެނެޑާ އާއި އެމެރިކާގެ ރައްޔިތުކަން އޮންނަ މި ފަންނާނު ތުހުމަތުކުރާ ގޮތުގައި، އޮކްޓޯބަރު 12 ވަނަ ދުވަހު އޯހިއޯގައި ބޭއްވި ރެލީއެއްގައި އެ ލަވަ ޖަހާފައިވަނީ "ޓްރަމްޕް 47 ކޮމިޓީ" އިން އޭނާގެ ކޮޕީރައިޓްގެ ހައްގުތަކަށް އަރައިގަނެގެންނެވެ.
ނީލް ޔަންގް ވަނީ 2020 ވަނަ އަހަރު ވެސް ޓްރަމްޕްގެ އިންތިޚާބީ ކެމްޕޭނާ ދެކޮޅަށް، މި ލަވައިގެ އިތުރުން "ޑެވިލްސް ސައިޑްވޯކް" ނަމަކަށް ކިޔާ ލަވައެއް ބޭނުންކުރި މައްސަލައިގައި ދައުވާކޮށްފަ އެވެ. ނަމަވެސް، އޭގެ ކުޑަދުވަސްކޮޅެއް ފަހުން ދެ ފަރާތުން ވާހަކަދައްކައިގެން އެ މައްސަލަ ހައްލުކޮށްފައިވާ ކަމަށް އޭނާ ބުންޏެވެ.
ނީލް ޔަންގްގެ ކުންފުނި "ސިލްވަ ފިޑްލް މިއުޒިކް" މެދުވެރިކޮށް ހުށަހެޅި މި ދައުވާގައި ބުނެފައިވަނީ، އޮކްޓޯބަރު 12 ވަނަ ދުވަހު އޯހިއޯގެ ޔަންގްސްޓައުންގައި ބޭއްވި ސިޔާސީ ހަރަކާތެއްގައި އެ ލަވަ ޖަހާފައިވަނީ އެއްވެސް ލައިސަންސެއް ނުވަތަ އޭނާގެ ހުއްދައެއް ނެތި ކަމަށެވެ.
އެމެރިކާގެ ގާނޫނުތައް ބުނާ ގޮތުން، ކެމްޕޭން ރެލީތަކުގައި މިއުޒިކް ބޭނުންކުރާއިރު، އެ ލަވައެއްގެ އަސްލު ކޮޕީއެއް ގަނެފައި އޮތް ނަމަވެސް، އާންމުންގެ ކުރިމަތީގައި އެ ލަވަ ޖެހުމަށްޓަކައި "ޕަބްލިކް ޕާފޯމަންސް ލައިސަންސް" އެއް ހޯދަންޖެހެ އެވެ.
އެމެރިކާގެ ކޮންގްރެސް އިން ބުނާ ގޮތުގައި، އަޑު ރެކޯޑިންތަކަށް އާންމުކޮށް ހުށަހެޅުމުގެ ހައްގު ލިބިފައި ނޯންނާތީ، އެ ލަވައެއްގެ ކޮޕީރައިޓް އޮންނަ ފަރާތުގެ ހުއްދަ ހޯދަންޖެހެ އެވެ. މި ހުއްދަ ސީދާ ފަންނާނުގެ އަތުން ނުވަތަ ކޮޕީރައިޓް ބަލަހައްޓާ އިދާރާތައް މެދުވެރިކޮށް ހޯދިދާނެ އެވެ.
ޓްރަމްޕްގެ ސިޔާސަތުތަކާއި އޭނާގެ ސަޚުސިއްޔަތާ ދެކޮޅު، އުމުރުން 80 އަހަރުގެ ގްރެމީ އެވޯޑް ހާސިލްކޮށްފައިވާ ނީލް ޔަންގް ސިފަކުރާ ގޮތުގައި، އެ ލަވައަކީ އެމެރިކާގެ ފަގީރުންނާއި ހާލުގައި ޖެހިފައިވާ މީހުން ތަހައްމަލުކުރާ ހިތްދަތި ހަގީގަތްތަކުގެ މެދުގައި ހުރި ފަރަގު ހާމަކޮށްދޭ ވަރުގަދަ ލަވައެކެވެ.
އޭނާ ބުނި ގޮތުގައި އެ ލަވައަކީ ޑޮނަލްޑް ޓްރަމްޕް ގަބޫލުކުރައްވާ ކަންކަމާ މުޅިން އިދިކޮޅު މާނައެއް އެކުލެވޭ ލަވައެކެވެ.
އަލަށް ހުށަހެޅި މި ދައުވާގައި ބުނެފައިވަނީ، 2020 ވަނަ އަހަރުގެ މައްސަލައިގައި ކެމްޕޭން ޓީމުން އެއްވެސް ދިފާއެއް ހުށަނާޅައި، މައްސަލަ ހުށަހެޅުމާއެކު ވަގުތުން އެއްބަސްވުމަކަށް އައިސް، ހުއްދަނެތި ދެން ދުވަހަކުވެސް އެ ލަވަ ބޭނުން ނުކުރާނެ ކަމަށް ވައުދުވި ކަމަށެވެ.
ނީލް ޔަންގް އަންގާރަ ދުވަހު އޭނާގެ ވެބްސައިޓުގައި މި ދައުވާއާ ގުޅޭ ގޮތުން ލިޔަމުން، 1980 އާއި 1990 ގެ އަހަރުތަކުގައި އޭނާގެ ގިނަ ޝޯތަކަކަށް ޓްރަމްޕް ވަޑައިގެންފައިވާތީ އެކަމަށް ޝުކުރު އަދާކުރި އެވެ. ނަމަވެސް، އޭނާގެ މިއުޒިކް ބޭނުންކުރުމުގެ ހުއްދަ ދިނުމަށް ވަނީ އިންކާރުކޮށްފަ އެވެ.
ނީލްޔަންގްގެ އިތުރުން، ދަ ރޯލިން ސްޓޯންސް، ރިއާނާ، އެޑެލް، އާރް.އީ.އެމް އަދި ޕްރިންސްގެ އާއިލާއިން ވެސް ވަނީ މީގެ ކުރިން ކެމްޕޭން ހަރަކާތްތަކުގައި އެ ފަންނާނުންގެ މިއުޒިކް ބޭނުންކުރާތީ ޓްރަމްޕަށް ފާޑުކިޔާފަ އެވެ.
