ފްރާންސްގެ މަޝްހޫރު އިންފްލުއެންސަރަކު މަރުވެފައި އޮއްވާ ފެނުނު މައްސަލައިގައި، ގަސްތުގައި މީހަކު މަރާލުމުގެ ތަހުގީގެއް އެ ގައުމުގެ ކަމާބެހޭ އިދާރާތަކުން ފަށައިފި އެވެ.
ޓިކްޓޮކްގައި ލިޕް-ސިންކް ވީޑިއޯތަކުން މަގުބޫލުކަން ހޯދާފައިވާ ސޯނިއާ ބެލީނާގެ ހަށިގަނޑު، ފްރާންސްގެ ސެއިންޓް-ޖިލްސްގެ މޭބިސްކަދުރު ބަގީޗާއެއްގެ ތެރޭގައި "ބައެއް ބައިތައް އަންދާލާފައި" އޮއްވާ ފެނުނުތާ ހަފުތާއެއް ފަހުން، މި މަރުގެ މައްސަލައިގައި ތުހުމަތުކުރެވޭ ދެ ފިރިހެނަކު ހައްޔަރުކޮށްފައިވާ ކަމަށް ނީމްސް ޕަބްލިކް ޕްރޮސެކިއުޓާގެ އޮފީހުން ނެރުނު ބަޔާނެއްގައި ބުނެފައިވެ އެވެ.
އޮގަސްޓް 19 ވަނަ ދުވަހު ނެރުނު އެ ބަޔާނުގައި ބުނެފައިވަނީ، ނީމްސްގެ ކްރިމިނަލް އިންވެސްޓިގޭޝަން ޔުނިޓުގެ ތަހުގީގު ކުރާ ފަރާތްތަކުން އެ ދުވަހު ދެ މީހަކު ހައްޔަރުކޮށްފައިވާ ކަމަށެވެ. އަދި އެ މީހުން ފުލުހުންގެ ބަންދަށް ބަދަލުކުރީ، މި ހާދިސާއާ ސީދާ ގޮތުން ނުވަތަ ނުސީދާ ގޮތުން އެ މީހުންގެ ބައިވެރިވުމެއް އޮތްކަމަށް ބެލެވޭ ހެކިތަކެއް ލިބިފައިވާތީ ކަމަށް ވެސް އެ ބަޔާނުގައިވެ އެވެ.
ނަމަވެސް، އޮގަސްޓް 20 ވަނަ ދުވަހު ޕްރޮސެކިއުޓާގެ އޮފީހުން ހާމަކުރި ގޮތުގައި، ހައްޔަރުކުރި ދެ މީހުންގެ ތެރެއިން އެކަކު މިހާރު ވަނީ ދޫކޮށްލާފަ އެވެ. އެއީ މި ހާދިސާގައި އެ މީހާގެ ބައިވެރިވުމެއް އޮތްކަން މިހާތަނަށް އެއްކުރެވުނު ހެކިތަކުން ސާބިތު ނުކުރެވޭތީ ކަމަށް އެ އޮފީހުން ބުނެ އެވެ.
އެހެންނަމަވެސް، ދެވަނަ މީހާގެ ބަންދުގެ މުއްދަތު އިތުރުކޮށް، އޭނާ އަދިވެސް ހުރީ ފުލުހުންގެ ބަންދުގައި ކަމަށް ޕްރޮސެކިއުޓާގެ އޮފީހުން އިތުރަށް މައުލޫމާތު ދެއެވެ.
އޮގަސްޓް 12 ވަނަ ދުވަހު ބެލީނާގެ ހަށިގަނޑު ފެނުމާއެކު، މީހަކު މަރާލުމުގެ ތަހުގީގެއް ވަގުތުން ފަށާފައިވާ ކަމަށާއި، އޮގަސްޓް 13 ވަނަ ދުވަހު އޮޓޮޕްސީ ނުވަތަ ޕޯސްޓްމޯޓަމް ހަދާނެ ކަމަށް ޕްރޮސެކިއުޓާގެ އޮފީހުން ކުރިން އިއުލާނުކުރި އެވެ. ނަމަވެސް އެ ތަހުގީގުގެ ނަތީޖާ މިހާތަނަށް އާންމުކޮށްފައެއް ނުވެ އެވެ.
މި ހާދިސާއާ ގުޅިގެން، ބެލީނާގެ ކޮއްކޮ ކަމަށް ބުނާ އަންހެނަކު ބުނެފައިވަނީ، އޮގަސްޓް 10 ވަނަ ދުވަހުން ފެށިގެން ބެލީނާ ވީނުވީއެއް ނޭނގި ގެއްލިފައިވާ ކަމަށެވެ.
އޮގަސްޓް 17 ވަނަ ދުވަހު ޓިކްޓޮކް ލައިވްއެއްގައި އޭނާ ބުނި ގޮތުގައި، ބެލީނާ އެ ރޭ ބޭރަށް ދަނީ ކަމަށް ބުނި ނަމަވެސް، އޭގެ ފަހުން އޭނާ އެނބުރި ގެއަކަށް ނާދެ އެވެ. އަދި ބުދަ ދުވަހުގެ ހެނދުނު ސެއިންޓް-ޖިލްސް އިން އޭނާގެ ހަށިގަނޑު ފެނުނު ކަމަށް ވެސް ބުންޏެވެ. މީގެ އިތުރުން، މި މަރުގެ ތަހުގީގު ކުރިއަށްދާއިރު ބައެއް މީހުންގެ ފަރާތުން އާއިލާއަށް ކުރިމަތިވަމުންދާ އިހާނެތި ބަސްތަކުގެ ވާހަކަ ހިއްސާކުރަމުން އޭނާ ބުނީ، ބެލީނާއަށް ވީގޮތަކީ އޭނާއަށް ހައްގު މިންވަރު ކަމަށް ބައެއް މީހުން ބުނަމުންދާ ކަމަށެވެ.
އިންޓަނެޓްގައި އާންމުން ކުރަމުންދާ މިފަދަ ކޮމެންޓްތަކާ ގުޅިގެން، ބެލީނާގެ އާއިލާގެ ވަކީލު މުރާދު ބާތިކް ވިދާޅުވީ، އެފަދަ އެއްވެސް އަމަލަކަށް ދޫނުދެއްވާނެ ކަމަށާއި، މި ދަނޑިވަޅުގައި އާއިލާގެ ޒާތީ މިނިވަންކަމަށް އިހުތިރާމް ކުރުމަށް އެދޭ ކަމަށެވެ.
