ޕްރިންސަސް ޑަޔާނާ އަވަހާރަވި ހާދިސާއާ ގުޅިގެން ކިންގް ޗާލްސް އަމަލުކުރެއްވި ގޮތާ ބެހޭ އާ ތުހުމަތުތަކެއް ފެންމަތިވެފައިވާ ދަނޑިވަޅެއްގައި، ޑަޔާނާގެ މަޝްހޫރު "ރިވެންޖް ޑްރެސް" މިދިޔަ ހުކުރު ދުވަހު ލަންޑަނުގައި ދައްކާލައިފި އެވެ.
"ޕީޕަލްސް ޕްރިންސަސް" ނުވަތަ ރައްޔިތުންގެ އަމީރާގެ ގޮތުގައި މަޝްހޫރުވި ޑަޔާނާ އަވަހާރަވިތާ ގާތްގަނޑަކަށް 30 އަހަރު ފުރެން ކައިރިވެފައިވާއިރު، ޝާހީ އާއިލާގެ މައްޗަށް އޭނާގެ ހިޔަނި އަދިވެސް ވަނީ އެޅިފަ އެވެ.
މި ހެދުމަކީ 1990 ގެ ކުރީކޮޅު ޗާލްސް އާއި ޑަޔާނާގެ ކައިވެނި ރޫޅެމުންދިޔަ ދުވަސްވަރު، އެ ދެމެދުގައި އުފެދުނު ނުތަނަވަސްކަމުގެ ރަމްޒެކެވެ. ޗާލްސްގެ ބޭވަފާތެރިކަމަށް އޭނާ އަމިއްލައަށް އިއުތިރާފުވިތާ މާގިނަ އިރުތަކެއް ނުވަނީސް، ކޮނޑު ކެނޑި ކަޅު ކުލައިގެ ފަށުވި މި ހެދުމުގައި ޑަޔާނާ އާންމުންގެ ކުރިމައްޗަށް ނުކުމެވަޑައިގަތެވެ.
މި ހަފުތާގައި އެ ދެ ބޭފުޅުންގެ ގުޅުމަށް އަލުން ސަމާލުކަން ހުއްޓިފައިވަނީ، ޑަޔާނާގެ ކޮއްކޯފުޅު ޗާލްސް ސްޕެންސާ ނެރުއްވަން ތައްޔާރުވަމުންދާ ފޮތެއްގައި ހިމެނޭ ބައިތަކެއް އާންމުވުމާ ގުޅިގެންނެވެ. އެ ފޮތުގައި ސްޕެންސާ ތުހުމަތު ކުރައްވާފައިވާ ގޮތުގައި، ޑަޔާނާ އަވަހާރަވިތާ ކުޑަ ވަގުތުކޮޅެއްގެ ތެރޭގައި ރަސްގެފާނު ހުންނެވީ "އިންތިހާއަށް އުފާވެފައި" ކަމަށެވެ.
ބަކިންގްހަމް ޕެލަސްއިން ވަނީ މި ތުހުމަތުތަކަށް ރައްދުދީފަ އެވެ. ގަނޑުވަރުން ބުނެފައިވަނީ ލިބުނު ހިތާމައިގެ ސަބަބުން ލިޔުންތެރިޔާގެ ހަނދާނަށް އަސަރުކޮށްފައިވާ ކަމަށް ބެލެވޭ ކަމަށެވެ.
ޑަޔާނާގެ މަގުބޫލުކަން މުޅި ދުނިޔޭގައި އަދިވެސް ދެމިއޮތްކަން ހާމަކޮށްދެމުން، ސަދަބީޒްގައި މި ހެދުން ދައްކާލާފައިވަނީ ހޮންކޮންގް، ޖެނީވާ އަދި ނިއު ޔޯކަށް ކުރާ ދުނިޔޭގެ ދަތުރުގެ ފުރަތަމަ މަންޒިލްގެ ގޮތުގަ އެވެ.
މި ދަތުރުގެ އެންމެ ފަހު މަންޒިލްގައި އަންނަ ޑިސެމްބަރު މަހު މި ހެދުން ނީލަން ކިޔުމަށް ހަމަޖެހިފައިވާއިރު، މި ހެދުމުގެ އަގު 150،000 ޑޮލަރާއި 300،000 ޑޮލަރާ ދެމެދުގެ އަދަދަކަށް އަރާނެ ކަމަށް ލަފާކުރެވެ އެވެ.
ޕެރިހުގައި 1997 ވަނަ އަހަރު ހިނގި ކާރު އެކްސިޑެންޓެއްގައި ޑަޔާނާ އަވަހާރަވިއިރު އުމުރަކީ 36 އަހަރެވެ.
އެ ދުވަސްވަރު ޑަޔާނާ އަވަހާރަވުމާ ގުޅިގެން ޝާހީ އާއިލާ ބޮޑު ނުތަނަވަސްކަމެއްގެ ތެރެއަށް ވެއްޓުނެވެ. މުޅި ގައުމު ހިތާމައިގައި އޮތްއިރު، ޝާހީ އާއިލާއިން ދެއްކި ހަރުކަށި އަދި އިހުސާސްތަކެއް ނެތް އުސޫލުތަކުގެ ސަބަބުން އާންމުންގެ ރުޅިވެރިކަން އަމާޒުވި އެވެ. މީގެ ސަބަބުން ޝާހީ އާއިލާގެ ސިޔާސަތުތައް ބަދަލުކޮށް، އާންމުން ބޭނުންވި ފަދަ އިންސާނީ އިހުސާސްތައް ދައްކަން މަޖުބޫރުވި އެވެ.
ނަމަވެސް، ޑަޔާނާ އަވަހާރަވުމުން ރަސްގެފާނު ހުންނެވީ "އިންތިހާއަށް އުފާވެފައި" ކަމަށް ބުނެ ސްޕެންސާ ކުރެއްވި ތުހުމަތުތައް ބަކިންގްހަމް ޕެލަސްއިން ވަނީ ވަރަށް ހަރުކަށި އިބާރާތުން ދޮގުކޮށްފަ އެވެ.
