ސިއްހީ ބޮޑެތި ގޮންޖެހުންތަކުގެ ސަބަބުން، މަޝްހޫރު ލަވަކިޔުންތެރިޔާ ސެލީން ޑިއޯން ހަ އަހަރުގެ މިޔުޒިކާ ދުރުގުައި ހުރުމަށް ފަހު، ހޮނިހިރު ދުވަހު އެނބުރި އަތުވެއްޖެ އެވެ.
ފަރަންސޭސިވިލާތުގެ ޕެރިހުގައި ބޭއްވުމަށް ހަމަޖެހިފައިވާ ކޮންސަޓް ސީރީޒްގެ ފުރަތަމަ ޝޯގައި އޭނާ ވަނީ ފޭނުން އަންތަރީސްކޮށްލާފަ އެވެ.
"އަޅުގަނޑު އެންމެ ލޯބިވާ މި ސިޓީގެ ސްޓޭޖުގައި މިއަދު މި ހުރީ އެންމެންގެ ލޯތްބާއި އެއްބާރުލުމާ ހެދި،" އޭނާ ބެލުންތެރިންނާ މުހާތަބުކޮށް ބުންޏެވެ. "މި ދަތުރަކީ ވަރަށް އުނދަގޫ އަދި ކުރިން ރޭވި ވަރަށް ވުރެ މާ ދިގު ދަތުރެއް. އެކަމަކު އަޅުގަނޑު ހިތްވަރު ދޫނުކޮށް ހިފަހައްޓާލީ."
މަސްތަކަށް ވާންވެ، ހަށިގަނޑުގެ ހަރަކާތްތަކަށް ހުރަސްއަޅާ ނާދިރު ބައްޔެއް ކަމަށްވާ 'ސްޓިފް ޕާސަން ސިންޑްރޯމް' ޖެހިފައިވާކަން 2022 ވަނަ އަހަރު ސެލީން ޑިއޯން ވަނީ ހާމަކޮށްފަ އެވެ. މި ބަލީގެ ސަބަބުން އޭނާއަށް ޕާފޯމް ކުރުމަށް ވަނީ ވަރަށް ބޮޑަށް ހުރަސްތަކެއް ކުރިމަތިވެފަ އެވެ.
ޝޯގެ ފުރަތަމަ ލަވަ ކިޔަމުން ދިޔައިރު ސެލީން ޑިއޯންއަށް ވަރަށް ބޮޑަށް އަސަރުކޮށް، އޭނާގެ ލޮލުން ކަރުނަ ހިލުނެވެ. އަދި ލަވައިގެ ވަކި ހިސާބަކުން ކުރިއަށް ނުގެންދެވިގެން، ބެލުންތެރިންގެ އެހީތެރިކަމަށް އެދި މައިކް އެމީހުންނާ ދިމާލަށް ދިއްކޮށްލި އެވެ.
މުޅި ޝޯގައި ވެސް ގިނައިން ފަރަންސޭސި ބަހުން ވާހަކަދައްކަމުން އޭނާ ބުނީ، "އަޅުގަނޑު ވައުދުވިން ނުރޯން - އެކަމަކު މިއީ އުފާވެރިކަމުގެ ކަރުނަ،" ކަމަށެވެ.
އޭނާ ވަނީ ދުނިޔޭގެ އެންމެ މަގުބޫލު ލަވަކިޔުންތެރިންގެ ތެރޭގައި އޭނާ ހިމެނުނު މަޝްހޫރު ލަވަތައް ކަމަށްވާ "މައި ހާޓް ވިލް ގޯ އޮން" އަދި "އޯލް ބައި މައިސެލްފް" ފަދަ ލަވަތައް ކިޔައިދީފަ އެވެ.
ޕެރިހުގައި ބޭއްވުމަށް ހަމަޖެހިފައިވާ 16 ކޮންސަޓާއި، 2027 ވަނަ އަހަރު ބޭއްވުމަށް ހަމަޖެހިފައިވާ އިތުރު 10 ކޮންސަޓާ ގުޅިގެން ފަރަންސޭސިވިލާތުގެ ވެރިރަށުގައި ވަނީ ބޮޑު ފޯރިއެއް ހިފާފަ އެވެ.
