ޕާކިސްތާނުގެ ކުރީގެ ބޮޑުވަޒީރު އިމްރާން ޚާން މިނިވަންކުރުމަށް ގޮވާލައި އަންނަ ހަފުތާގައި ބޭއްވުމަށް ހަމަޖެހިފައިވާ މުޒާހަރާތަކުގެ ކުރިން، އޭނާގެ ކޮއްކޮ އަލީމާ ޚާނަމް ހައްޔަރުކޮށްފި ކަމަށް އިމްރާންގެ ޕާކިސްތާން ތަހްރީކޭ އިންސާފް (ޕީޓީއައި) ޕާޓީން ބުނެފި އެވެ.
ޕީޓީއައިގެ އޮފިޝަލުން ވިދާޅުވި ގޮތުގައި އަލީމާ ޚާނަމް ހައްޔަރުކޮށްފައިވަނީ އާދީއްތަ ދުވަހުގެ މެންދުރުފަހުގެ ވަގުތެއްގައި ލާހޯރުންނެވެ. އެ ޕާޓީން ވަނީ މިއީ "ޣައިރު ގާނޫނީ" ހައްޔަރުކުރުމެއްގެ ގޮތުގައި ސިފަކޮށްފަ އެވެ. އަދި އޭނާގެ ދަރިފުޅު އަންނަނީ މަންމަ ވަގުތުން ދޫކޮށްލުމަށް ގޮވާލަމުންނެވެ.
ލާހޯރުގެ ޑެޕިއުޓީ ކޮމިޝަނަރު ނެރުއްވި ހައްޔަރުކުރުމުގެ އަމުރުގައި ބުނެފައިވަނީ، އަލީމާ ޚާނަމް އަންނަނީ ސޯޝަލް މީޑިއާ އާއި އާންމު އެއްވުންތައް މެދުވެރިކޮށް އިމްރާން ޚާނަށް ތާއީދުކުރާ މީހުން މުޒާހަރާއަށް ނެރުމަށް މަސައްކަތް ކުރަމުން ކަމަށެވެ. އެ އަމުރުގައިވާ ގޮތުން އޭނާ 30 ދުވަހުގެ މުއްދަތަށް ބަންދުގައި ބަހައްޓާނެ އެވެ.
އަލީމާ ޚާނަމް އަކީ އޭނާގެ ބޭބެ އިމްރާން ޚާން ޖަލަށްލާފައި ހުރި ހުރުމަށް ވަރަށް ބޮޑަށް ފާޑުކިޔަމުންދާ، އަދި ސަޕޯޓަރުންނާއި މީޑިއާތަކާ ގަވާއިދުން ވާހަކަދައްކާ ފަރާތެކެވެ.
އާދީއްތަ ދުވަހުގެ ހެނދުނުގެ ވަގުތެއްގައި އަލީމާގެ އާއިލާއިން ބުނެފައިވަނީ، އޭނާ ހުރި ތަނެއްގެ އެއްވެސް ޚަބަރެއް ނުވާތާ ގިނަ އިރުތަކެއް ވެފައިވާ ކަމަށެވެ.
އަލީމާގެ ދަރިފުޅު ޝަހްރޭޒް ޚާން އެކްސްގައި ކުރި ޕޯސްޓެއްގައި ބުނެފައިވަނީ، އޭނާގެ މަންމަ ހުރި ތަނެއް ސަރުކާރުން ވަގުތުން ހާމަކުރުމަށާއި، ރައްކާތެރިކަމާއެކު އޭނާ އަނބުރާ ގެނައުމަށް ގޮވާލާ ކަމަށެވެ.
ގިނަ ބަޔަކު ގަބޫލުކުރާ ގޮތުގައި އަލީމާ ހައްޔަރުކުރީ ސެޕްޓެމްބަރު 27 ވަނަ ދުވަހު މުޅި ގައުމުގައި ބޭއްވުމަށް ރާވާފައިވާ މުޒާހަރާތަކާ ގުޅިގެންނެވެ. އެ ދުވަހު މުޒާހަރާގެ ބައިވެރިން ރާވާފައިވަނީ ޕާކިސްތާނުގެ ވެރިރަށް އިސްލާމްއާބާދަށް އެއްވުމަށެވެ.
ހައްޔަރުކުރުމުގެ އަމުރުގައި ބުނެފައިވަނީ، އަލީމާ ޚާނަމް އަންނަނީ "ގައުމުގެ އަމަންއަމާންކަން ގެއްލުވާލުމަށް" މީހުން އެއްކުރަމުން ކަމަށާއި، އަދި އާންމުންގެ ތެރޭގައި ސަރުކާރާ ދެކޮޅަށް ބަލައިނުގަނެވޭ ފަދަ ޝިއާރުތައް ފަތުރަމުންދާ ކަމަށެވެ.
ޕާކިސްތާނުގެ ދާޚިލީ ވަޒީރާ ހަވާލާދީ އެ ގައުމުގެ މީޑިއާތަކުން ރިޕޯޓުކޮށްފައިވާ ގޮތުގައި، މި މުޒާހަރާތަކުގެ ސަބަބުން ގައުމަށް ގެއްލުންވާނެ ކަމަށާއި، މުޒާހަރާތައް ހުއްޓުވުމަށް ސަރުކާރުން ކުރެވެން ހުރި ހުރިހާ މަސައްކަތެއް ކުރާނެ އެވެ.
އިމްރާން ޚާން 2023 ވަނަ އަހަރު ހައްޔަރުކުރީ ބޮޑުވަޒީރުކަމުގައި ހުންނެވިއިރު ލިބިވަޑައިގެންނެވި ހަދިޔާތައް ވިއްކައިގެން ލިބުނު ފައިސާގެ ތަފްސީލު ހާމަނުކުރި މައްސަލައިގައި ތިން އަހަރުގެ ޖަލު ހުކުމެއް އިއްވުމާ ގުޅިގެންނެވެ.
ދައުލަތުގެ ސިއްރުތައް ހާމަކުރުމާއި، ދައުލަތުގެ ހަދިޔާތައް ވިއްކުމުގެ މައްސަލަތައް ހިމެނޭހެން 100 އަށްވުރެ ގިނަ ދައުވާ އިމްރާން ޚާންގެ މައްޗަށް ވަނީ އުފުލާފަ އެވެ. ނަމަވެސް އޭނާ ވިދާޅުވަމުން ގެންދަވަނީ އެއީ ސިޔާސީ މަގްސަދެއްގައި ކުރާ ދައުވާތަކެއް ކަމަށެވެ.
ކުރީގެ މަޝްހޫރު ކްރިކެޓް ތަރި އަދި ސިޔާސީ ލީޑަރުގެ މައްޗަށް މިދިޔަ އަހަރު ވަނީ ކޮރަޕްޝަންގެ މައްސަލައެއްގައި 14 އަހަރުގެ ޖަލު ހުކުމެއް އިއްވާފަ އެވެ. މިއީ މިހާތަނަށް އޭނާގެ މައްޗަށް އިއްވި އެންމެ ދިގު ހުކުމެވެ.
އިމްރާން ޚާންގެ ސިއްހީ ހާލަތު ދަށްވަމުންދާތީ، މިދިޔަ މަހު އޭނާ ވަނީ ޓެސްޓުތައް ހެދުމަށް ހޮސްޕިޓަލަށް ގެންގޮސްފަ އެވެ.
