ގޫގުލްގެ އާޓިފިޝަލް އިންޓެލިޖެންސް (އޭއައި) މޮޑެލް "ޖެމިނައި" ގެ ސައިބަރ ސެކިއުރިޓީ ގާބިލުކަން ދެނެގަތުމަށް ހެދި ޓެސްޓެއްގެ ތެރެއިން، އެ މޮޑެލް އަމިއްލައަށް ތިން ކުންފުންޏެއްގެ ސިސްޓަމްތައް ހެކްކޮށްފައިވާ ކަމަށް އެ ކުންފުނިން ބުނެފި އެވެ.
ގޫގުލްގެ އޮފިޝަލަކު ބީބީސީއަށް މައުލޫމާތު ދެއްވަމުން ވިދާޅުވީ، އިންޓަނެޓުގައި ހުރި އާންމު މައުލޫމާތުތައް ހޯދައިގެން، ޓެސްޓުގެ ބައެއް ކަމަށް ހީކޮށް ބައެއް ވެބްސައިޓްތަކަށް ވަނުމަށް ބޭނުންވާ "ކްރެޑެންޝަލްސް" ނުވަތަ ލޮގިން މައުލޫމާތު ޖެމިނައި އިން އަމިއްލައަށް އަންދާޒާކޮށްފައިވާ ކަމަށެވެ. އަދި ކޮންމެ ފަހަރަކު ވެސް އެ މޮޑެލް އަމިއްލައަށް ހުއްޓުމަކަށް އައިސްފައިވާ ކަމަށް އޭނާ ފާހަގަކުރެއްވިއެވެ.
މިދިޔަ މެއި މަހު ހިނގި މި ހާދިސާގައި ސައިބަރ ހަމަލާ އަމާޒުވި ތިން ކުންފުންޏަށް މިހާރު ވަނީ އެކަމުގެ މައުލޫމާތު ދީފަ އެވެ.
އޭއައި ތަރައްގީކުރަމުންދާ ހަލުވި މިނާ މެދު އާންމުންގެ މެދުގައި ބޮޑެތި ސުވާލުތަކެއް އުފެދިފައިވާ ދަނޑިވަޅެއްގައި މި ހާދިސާ ފެންމަތިވިއިރު، ބައެއް ޓެކްނޮލޮޖީ ކުންފުނިތަކުން ދަނީ އިންސާނިއްޔަތަށް އޮތް ނުރައްކަލަކަށް ވެދާނެތީ މި މަސައްކަތް މަޑުޖައްސާލުމަށް ގޮވާލަމުންނެވެ. ނަމަވެސް ހުރިހާ ކުންފުނިތަކަކާއި މާހިރުން މިކަމަށް އެއްބަހެއް ނުވެއެވެ.
ވޯލް ސްޓްރީޓް ޖާނަލްއިން އެންމެ ފުރަތަމަ ރިޕޯޓްކުރި މި ހެކް ކުރުމުގެ ހާދިސާތައް ހިނގާފައިވަނީ މެއި މަހުގެ ތެރޭގައި ސައިބަރ ސެކިއުރިޓީ ދިރާސާކުރާ މިނިވަން ކުންފުންޏެއް ކަމަށްވާ "އިރެގިއުލާ" އިން ހެދި ޓެސްޓެއްގެ ތެރެއިންނެވެ.
ހޮނިހިރު ދުވަހު އިރެގިއުލާ އިން ބުނީ، އެ ކުންފުނިން ކުރިއަށްގެންދިޔަ ތަހުގީގުގެ ބައެއްގެ ގޮތުގައި، މިދިޔަ ޖުލައި މަހު ގޫގުލްއަށާއި މިކަމުގެ އަސަރުކުރި ހުރިހާ ފަރާތްތަކަށް މައުލޫމާތު ހިއްސާކޮށްފައިވާ ކަމަށެވެ.
"އިރެގިއުލާ އިން ވަގުތުން ފިޔަވަޅު އަޅައި، އަޅުގަނޑުމެންގެ ފަރާތުން ދިމާވި ހުރިހާ މައްސަލަތަކެއް މީގެ ހަފުތާތަކެއް ކުރިން ވަނީ ހައްލުކޮށްފައި،" އެ ކުންފުނިން ބުންޏެވެ.
ވޯލް ސްޓްރީޓް ޖާނަލްއިން ރިޕޯޓްކޮށްފައިވާ ގޮތުގައި، އެއް ހާދިސާއެއްގައި ޖެމިނައި މޮޑެލްއިން ވަނީ ރައްކާތެރިކޮށްފައިވާ ސިސްޓަމަކަށް ވަދެވެންދެން ތަކުރާރުކޮށް ޕާސްވޯޑްތައް އަމިއްލައަށް އަންދާޒާކޮށްފައެވެ.
ގޫގުލްގެ ސެކިއުރިޓީ އިންޖިނިއަރިންގެ ވައިސް ޕްރެޒިޑެންޓް ހެދަރ އެޑްކިންސް ވިދާޅުވީ، މިކަމުގެ އަސަރުކުރި ތިން ކުންފުންޏަށް އެކަން އެންގުމަށްފަހު، ޓެސްޓުކުރުމުގެ މަރުހަލާތަކަށް ގެންނަންޖެހޭ ބަދަލުތައް ގެނައުމަށް ތަމްރީނުދޭ ބައިވެރިންނާއެކު މަސައްކަތް ކޮށްފައިވާ ކަމަށެވެ.
އޭނާ އިތުރަށް ވިދާޅުވީ، މިފަދަ ހާދިސާތަކުން އެނގެނީ ބާރުގަދަ އޭއައި މޮޑެލްތައް ޒިންމާދާރުކަމާއެކު ބޭނުންކުރުމަށް ތަމްރީނުކުރުމުގެ މުހިންމުކަން ކަމަށެވެ.
މިފަދަ އެހެން އޭއައި ސިސްޓަމްތަކުން ވެސް ފަހަކަށް އައިސް މިފަދަ ހާދިސާތައް ހިނގާފައިވާ ކަމަށް ރިޕޯޓްކޮށްފައިވެއެވެ.
އޯޕަން އޭއައިގެ މޮޑެލްތަކުން އާންމުކޮށް ލިބެން ހުންނަ ބައެއް ހިދުމަތްތަކަށް ސައިބަރ ހަމަލާދީފައިވާ ކަމަށް އެ ކުންފުނިން ބުނިތާ މަދު ދުވަސްކޮޅެއްގެ ތެރޭގައި، މިދިޔަ ޖުލައި މަހު އެންތްރޮޕިކް ކުންފުނީގެ "ކްލޯޑް" މޮޑެލް ވެސް ވަނީ ޓެސްޓު މާހައުލުން ބޭރުވެ، އަމިއްލައަށް ތިން އިދާރާއެއް ހެކްކޮށްފަ އެވެ.
މައިކްރޯސޮފްޓްގެ ހެޑް އޮފް އޭއައި، މުސްތަފާ ސުލައިމާން މި ހަފުތާގައި ވިދާޅުވީ ވާދަވެރި އެންތްރޮޕިކް ކުންފުނިން އޭއައިއާ މެދު އަމަލުކުރަނީ އިންސާނަކާ މެދު އަމަލުކުރާ ފަދަ ގޮތަކަށް ކަމަށާއި، މިއީ "މަގުއޮޅިފައިވާ" އުސޫލެއް ކަމަށެވެ. އަދި މީގެ ސަބަބުން އިންސާނުންގެ ކޮންޓްރޯލުން ނެއްޓިދާނެ ފަދަ ޓެކްނޮލޮޖީއެއް އުފެދިދާނެ ކަމުގެ އިންޒާރު އޭނާ ދެއްވިއެވެ.
މި ޓެކްނޮލޮޖީ ތަރައްގީކުރުމުގެ ރައްކާތެރިކަމާ މެދު އާންމުންގެ މެދުގައި ބަހުސްތައް އިތުރުވަމުންދާއިރު، މިއީ ގާނޫނީ ގޮތުން ރެގިއުލޭޓްކުރުމާ ބެހޭ ވާހަކަތައް ވެސް ދަނީ ދެކެވެމުންނެވެ.
