ރައީސުލްޖުމްހޫރިއްޔާ މުހައްމަދު މުއިއްޒު ވެސް އެ ސަރުކާރެއްގައި ހިމެނުނު ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ޝަރުއީ ދާއިރާ މިނިވަން ނޫން ކަމަށް އެމަނިކުފާނު ވިދާޅުވެއްޖެ އެވެ.
ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މަތީ މަޖިލިސް ނިންމުމަށް ރޭ ބޭއްވި ޖަލްސާގައި ވާހަކަދައްކަވަމުން މުއިއްޒު ވަނީ ޔާމީނުގެ ނަން ވިދާޅުނުވެ އެ ވެރިކަމަށް ވަރަށް ބޮޑަށް ފާޑުވިދާޅުވެފަ އެވެ.
އެގޮތުން، ޔާމީނުގެ ވެރިކަމުގައި ސުޕްރީމް ކޯޓުން ޓިނު ނަގައި، އެ ކޯޓުގެ ފަނޑިޔާރުންތަކެއް ހައްޔަރުކުރުމާއި ކުރީގެ ރައީސް، މައުމޫން އަބްދުލްގައްޔޫމް ޖަލުގައި ބަންދުކުރި ވާހަކަ ވިދާޅުވެ އެކަމަށް މުއިއްޒު ފާޑުވިދާޅުވި އެވެ.
މުއިއްޒު ވިދާޅުވީ އެ ބޭފުޅުން ޖަލުގައި ބަންދުކޮށްފައި ތިއްބާ، އެ ބޭފުޅުންގެ ހާލު ބަލައިލަން ދާން އެމަނިކުފާނަށް އެންގެވި ކަމަށެވެ. ނަމަވެސް، އެކަން ކުރަން އެންގެވީ ކާކުކަމެއް މުއިއްޒު ވިދާޅެއް ނުވެ އެވެ.
"އަޅުގަނޑު އަމިއްލައަށް ތަޖުރިބާކުރި ކަންތައް މިއީ، އެހެންވީމާ އެހައިވަރަކަށް ޝަރުއީ ދާއިރާ މިނިވަން ވާނީ،" މުއިއްޒު ވިދާޅުވި އެވެ.
އެމަނިކުފާނު ވިދާޅުވީ އެ ބޭފުޅުންގެ ހާލު ބަލައިލަން ވަޑައިގެންނެވިއިރު، އެ ބޭފުޅުން ތިއްބެވީ ވަރަށް ހާލުގައި ކަމަށެވެ. އެ ބޭފުޅުންގެ ހާލު ބެލުމަށް ޖަލަށް ވަޑައިގަތުމުން އެ ބޭފުޅުން ކުރެއްވި ޝަކުވާތައް ޔާމީނުގެ އަރިހުގައި ދެންނެވިކަމަށް މުއިއްޒު ވިދާޅުވި އެވެ.
"ނޮވެމްބަރު 3، ގެ ހާދިސާގައި ގައުމު ސަލާމަތްކުރެއްވި ވެރިމީހާ، މިހެން ގޮސް އެތައް ހިދުމަތެއް ކުރައްވާފައި ހުންނެވި ބޭފުޅެއް، ދެން މި ތިބީ ސުޕްރީމް ކޯޓުގެ ފަނޑިޔާރަކާއި އެހެން ފަނޑިޔާރަކާ. މި ބޭފުޅުން މި ތިބީ ހަމަ ކުޑަގޮޅީގައި ނޫނިއްޔާ ވަރަށް ހާލުގައި،" މުއިއްޒު ވިދާޅުވި އެވެ.
ޔާމީނުގެ ވެރިކަމަށް ފާޑު ވިދާޅުވުމަށްފަހު، މުއިއްޒު ވަނީ މި ވެރިކަމުގައި އެހެން ކަން ނުކުރައްވާ ކަމަށް ވިދާޅުވެ ވާހަކަދައްކަވައިފަ އެވެ.
އެގޮތުން، ވެރިކަމުގެ ހުވާކުރެއްވުމަށްފަހު، މިއަދާ ހަމައަށް އައިއިރު، ޝަރުއީ ދާއިރާއަށް އެއްވެސް ނުފޫޒެއް ފޯރުވާފައި ނުވާނެ ކަމަށް މުއިއްޒު ވިދާޅުވި އެވެ.
ޔާމީނަށް މުއިއްޒު ފާޑުވިދާޅުވެފައިވާއިރު، އެމަނިކުފާނު ވެރިކަމަށް ވަޑައިގަތީ ޔާމީނުގެ ފޮޓޯ ވިއްކަވައިގެންނެވެ. މުއިއްޒުގެ މުޅި ރިޔާސީ ކެމްޕޭނު ބިނާކުރީ ޔާމީނު މިނިވަންކުރުމާއި ޔާމީނުގެ ލަފާފުޅާއި އިރުޝާދުގެ ދަށުން ވެރިކަން ކުރައްވާނެ ކަމަށް ވެވަޑައިގެންނެވި ވައުދުތަކުގެ މައްޗަށެވެ.
