އިސްތަންބޫލް، ތުރުކީ (ސެޕްޓެމްބަރު 20) - ތުރުކީ ސުޕަ ލީގުގައި ރޭ މުހައްމަދު ސަލާހުގެ ހެޓްރިކާ އެކު، ޓްރަބްޒޯސްޕޯރުން 4-0 އިން ގަލަތަސަރާއި ބަލިކޮށްފި އެވެ.
މިއީ، ނުވަ އަހަރަށް ފަހު ލިވަޕޫލް ދޫކޮށްލި ސަލާހު، 33، ޓްރަބްޒޯންސްޕޯރާ ގުޅުނު ފަހުން އެ ޓީމަށް ކާމިޔާބުކޮށްދިން ފުރަތަމަ ހެޓްރިކް އެވެ.
ޓްރަބްޒޯންސްޕޯރުގެ ދަނޑުގައި ރޭ ކުޅުނު މެޗުގެ ހަތަރު ވަނަ މިނިޓްގައި ސަލާހު ވަނީ އެ ޓީމަށް ލީޑުނަގައިދީފަ އެވެ. މިއީ، އަމިއްލަ ހާފުގެ ތެރެއިން ފެށި އެޓޭކެއްގައި ބޯޅަ ހިފައިގެން ގޮސް، ގަލަތަސަރާއިގެ ކީޕަރު، އުރުގާން ޗަކީރަށް އެއްވެސް ފުރުސަތެއް ނުދީ ސަލާހު ޖެހި ގޯލެކެވެ.
މެޗުގައި ޓްރަބްޒޯންސްޕޯރުން ލީޑުފުޅާކުރި ގޯލަކީ، 39 ވަނަ މިނިޓްގައި ސަލާހު ދިން ބޯޅައަކުން އެ ޓީމުގެ ނޯއާ ސަވިއޯލޯ ޖެހި ގޯލެކެވެ. އަދި، ފުރަތަމަ ހާފު ނިމުމުގެ ކުރިން، މެޗުގެ 44 ވަަނަ މިނިޓްގައި ސަލާހު ވަނީ މެޗުގައި އޭނާގެ ދެ ވަނަ ގޯލު ކާމިޔާބުކޮށްފަ އެވެ.
ތިން ގޯލުގެ ލީޑެއްގައި ދެ ވަނަ ހާފުގެ ބޮޑުބައި ހިފެހެއްޓި ޓްރަބްޒޯންސްޕޯރުން ފަހު ލަނޑު ޖެހީ، މެޗުގެ ފުރިހަމަ ވަގުތު ހަމަވާން 10 މިނިޓަށް ވެފައި ހުއްޓަ އެވެ. އެ ގޮތުން، މެޗުގެ 80 ވަނަ މިނިޓްގައި މި ލަނޑު ޖަހައި، ސަލާހު ވަނީ އޭނާގެ ހެޓްރިކް ފުރިހަމަކޮށްފަ އެވެ. މިއާ އެކު، ސަލާހު މި ވަނީ ޓްރަބްޒޯންސްޕޯރަށް މިހާތަނަށް ހުރިހާ މުބާރާތެއްގައި ކުޅެދިން އަށް މެޗުން ހަތް ގޯލު ޖަހައި، ދެ ލަނޑު ޖަހަން ފުރުސަތު ހޯދައިދީފަ އެވެ.
ގަލަތަސަރާއި އިން މެޗު ނިންމާލީ އެއް ކުޅުންތެރިއަކު މަދުކޮށެވެ. އެއީ، މެޗުގެ 88 ވަނަ މިނިޓްގައި އެ ޓީމުގެ ލެސްލީ އުގޮޗުކްވޫ އަށް ވަނީ ސީދާ ރަތެއް ދައްކައިފަ އެވެ.
މިއީ، މި ފަހަރުގެ ތުރުކީ ސުޕަ ލީގުގައި ގަލަސަތަރާއި ބަލިވި ފުރަތަމަ މެޗެވެ. ލީގުގައި އެންމެ ފަހުން ކުޅުނު ހަތަރު މެޗުން ވެސް އެ ޓީމު މޮޅުވެ، 13 ޕޮއިންޓާ އެކު އެއް ވަނައިގައި އޮތްއިރު، ދެ ވަނައިގައި އޮތް ބެސިކްޓާސް އަށް ފަސް މެޗުން ވަނީ 12 ޕޮއިންޓް ލިބިފަ އެވެ. ހަ މެޗުން 10 ޕޮއިންޓާ އެކު، ޓްރަބްޒޯންސްޕޯރު އޮތީ ފަސް ވަނައިގަ އެވެ.
