އެމެރިކާގައި މުދަލާއި ހިދުމަތުގެ އަގުތައް އުފުލެމުންދާތީ، އެކަން ކޮންޓްރޯލް ކުރުމުގެ ގޮތުން ތިން އަހަރަށްވުރެ ގިނަ ދުވަހަށްފަހު ފުރަތަމަ ފަހަރަށް އެ ގައުމުގެ އިންޓްރެސްޓް ރޭޓް ބޮޑުކޮށްފި އެވެ. އަދި ކުރިއަށް އޮތް ތަނުގައި އިންޓްރެސްޓް ރޭޓް އިތުރަށް ބޮޑުކުރުމުގެ ފުރުސަތު އޮތް ކަމަށްވެސް ވަނީ ބުނެފަ އެވެ.
އެމެރިކާގެ މަރުކަޒީ ބޭންކް، ފެޑަރަލް ރިޒާވްގެ ބޯޑުގެ އިއްތިފާގުން ނިންމާފައިވަނީ އިންޓްރެސްޓް ރޭޓް 3.5 ޕަސެންޓާއި 3.75 ޕަސެންޓާ ދެމެދުގެ މިންވަރަކުން، 3.75 ޕަސެންޓާއި 4 ޕަސެންޓާ ދެމެދުގެ މިންވަރަކަށް މަތިކުރުމަށެވެ. މި ނިންމުން ނިންމާފައިވަނީ އިންޓްރެސްޓް ރޭޓް ދަށްކުރުމަށް ރައީސް ޑޮނަލްޑް ޓްރަމްޕް ބާރުއަޅުއްވައި، ވަރަށް ބޮޑަށް ދެކޮޅު ހައްދަވަމުން ގެންދަވަނިކޮށެވެ.
ފެޑަރަލް ރިޒާވްގެ ޗެއާ ކެވިން ވޯޝް ވިދާޅުވީ، އިންޓްރެސްޓް ރޭޓް ބޮޑުކުރަން ނިންމީ އިންފްލޭޝަން ނުވަތަ ތަކެތީގެ އަގު އުފުލޭ މިންވަރު އިންތިހާއަށް މަތިވެ، އެކަން އެގޮތުގައި ދެމިގެންދާތާ ގިނަ ދުވަސްތަކެއް ވެފައިވާތީ ކަމަށެވެ. އަދި މިއީ ހާލަތަށް ރިއާޔަތްކޮށް ނިންމި "ޒިންމާދާރު ނިންމުމެއް" ކަމަށް އޭނާ ސިފަކުރެއްވިއެވެ.
މި ނިންމުން އިއުލާން ކުރުމާ ގުޅިގެން ޓްރަމްޕް ވަނީ ވޯޝްއަށް ތާއީދުކުރައްވާކަން ހާމަކުރައްވާފަ އެވެ. ނަމަވެސް، އިންޓްރެސްޓް ރޭޓާ މެދު ގޮތް ނިންމާ ފެޑަރަލް ރިޒާވްގެ ބޯޑަކީ "ދުޝްމަން" ބައެއްގެ ގޮތުގައި ޓްރަމްޕް ސިފަކުރެއްވި އެވެ.
އިންޓްރެސްޓް ރޭޓް ބޮޑުވުމުން ލޯނާއި، މޯގޭޖް އަދި ކްރެޑިޓް ކާޑު މެދުވެރިކޮށް ފައިސާ ނަގާ ފަރާތްތަކަށް އުފުލަންޖެހޭ ބުރަ ބޮޑުވާނެ އެވެ. ނަމަވެސް، މީގެ ސަބަބުން ބޭންކުތަކުގައި ފައިސާ ރައްކާކުރާ މީހުންނަށް ލިބޭ ފައިދާ ނުވަތަ ރިޓާންސް އިތުރުވެގެންދާނެ އެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވޯޝް ވިދާޅުވީ، ފެޑަރަލް ރިޒާވްގެ އިސްވެރިންގެ މެދުގައި އިގްތިސާދީ ކުރިއެރުމާ މެދު އުންމީދީ ވިސްނުމެއް އޮތް ނަމަވެސް، އިންފްލޭޝަންގެ މައްސަލަ އަދިވެސް އޮތީ ކަންބޮޑުވާންޖެހޭ މިންވަރެއްގައި ކަމަށެވެ.
ދުނިޔޭގެ ގިނަ މަރުކަޒީ ބޭންކުތަކެކޭ އެއްފަދައިން، ފެޑަރަލް ރިޒާވްގެ އަމާޒަކީ އިންފްލޭޝަން 2 ޕަސެންޓަށް ވުރެ ދަށުގައި ހިފެހެއްޓުމެވެ. ނަމަވެސް، އެމެރިކާގެ އިންފްލޭޝަން ރޭޓް އެ އަމާޒަށް ވުރެ މަތީގައި ހުންނަތާ ފަސް އަހަރަށް ވުރެ ގިނަ ދުވަސް ވެފައިވާކަން ވޯޝް ފާހަގަކުރެއްވި އެވެ.
މީގެ ސަބަބުން ދިރިއުޅުމުގެ ހަރަދުތައް އަތްނުފޯރާ މިންވަރަށް އުފުލުމަކީ އެމެރިކާގެ ވޯޓުލާ މީހުންގެ އެންމެ ބޮޑު ކަންބޮޑުވުމަށް ވަނީ ވެފަ އެވެ. ވަކިން ހާއްސަކޮށް، އެމެރިކާއާއި އިޒްރޭލުން އީރާނާ ދެކޮޅަށް ކުރަމުންދާ ހަނގުރާމައާ ގުޅިގެން ތެލުގެ ހޯލްސޭލް އަގު އުފުލި، އޭގެ ސަބަބުން ތެލުގެ އަގާއި އެހެނިހެން މުދަލާއި ހިދުމަތްތަކުގެ އަގު ވަނީ ވަރަށް ބޮޑަށް މަތިވެފައެވެ.
ވޯޝް ވިދާޅުވި ގޮތުގައި، ތެލުގެ އަގު ނުވަތަ ކާބޯތަކެތީގެ އަގު ފަދަ ވަކިވަކި ތަކެތީގެ އަގުތަކަށް ފެޑަރަލް ރިޒާވަށް ސީދާ ބަދަލެއް ނުގެނެވުނު ނަމަވެސް، މުޅި އިގުތިސާދަށް އޭގެ އަސަރު ފެތުރިގެން ދިޔަ ނުދީ ހިފެހެއްޓުމަށް މަރުކަޒީ ބޭންކަށް މަސައްކަތް ކުރެވިދާނެ އެވެ.
އޭނާ އިތުރަށް ވިދާޅުވީ، ވަޒީފާގެ ބާޒާރާއި އިގްތިސާދު ވަރުގަދަކޮށް އޮތުމުން، ފެޑަރަލް ރިޒާވްގެ މައިގަނޑު އަމާޒަކީ އަގުތައް އެއްވަރެއްގައި ހިފެހެއްޓުން ކަމަށެވެ. އަދި އިންފްލޭޝަން ދަށްވުމުން އޭގެ އެންމެ ބޮޑު ފައިދާއެއް ކުރާނީ މާލީ ގޮތުން ދަތި ހާލުގައި އުޅޭ މީހުންނަށް ކަމަށްވެސް ވިދާޅުވި އެވެ.
އާންމުގޮތެއްގައި މަރުކަޒީ ބޭންކުތަކުން އިންޓްރެސްޓް ރޭޓް ބޮޑުކުރަނީ އިންފްލޭޝަން މަތިވުމުން، މީހުން ހަރަދުކުރާ މިންވަރު މަދުކޮށް ފައިސާ ރައްކާކުރުމަށް ބާރުއެޅުމަށެވެ. މީގެ ބޭނުމަކީ ތަކެތީގެ އަގު އުފުލޭ ދުވެލި މަޑުޖައްސާލުމެވެ. ނަމަވެސް، މިއީ ވަރަށް ބަލައިގެން ކުރަންޖެހޭ ކަމެކެވެ. ސަބަބަކީ އިންޓްރެސްޓް ރޭޓް ބޮޑުވުމުން ވިޔަފާރިތަކުން އިންވެސްޓްކުރަން ފަސްޖެހި، އިގްތިސާދީ ކުރިއެރުމަށް ހުރަސް އެޅިދާނެތީ އެވެ.
އީރާން ހަނގުރާމައާ ގުޅިގެން އިންފްލޭޝަން މަތިވުމުގެ މައްސަލައާ ކުރިމަތިލާން ޖެހިފައިވަނީ ހަމައެކަނި އެމެރިކާގެ ފެޑަރަލް ރިޒާވްއަކަށް ނޫނެވެ. މިދިޔަ ހަފުތާގައި ޔޫރަޕިއަން ސެންޓްރަލް ބޭންކުން ވެސް ވަނީ އިންޓްރެސްޓް ރޭޓް ބޮޑުކޮށްފަ އެވެ. އަދި ބޭންކް އޮފް އިންގްލެންޑުން ވެސް އިންޓްރެސްޓް ރޭޓާ މެދު ގޮތެއް ނިންމުމަށް ހަމަޖެހިފައިވަނީ މި އަންނަ ބުރާސްފަތި ދުވަހު އެވެ.
