އީރާނާ ދެކޮޅު ހަނގުރާމައިގެ ސަބަބުން އެމެރިކާގެ ހަތިޔާރުގެ ރިޒާވް އިންތިހާއަށް މަދުވެ، އެ ތަކެތި އަލުން ހޯދުމުގައި ބޮޑެތި ހުރަސްތަކެއް ކުރިމަތިވެފައިވާ ކަމަށް އެމެރިކާގެ ޑިފެންސް ޑިޕާޓްމަންޓުގެ އިންސްޕެކްޓާ ޖެނެރަލް ވިދާޅުވެއްޖެ އެވެ.
މިއީ އެމެރިކާގެ ހަތިޔާރު ހުސްވަމުންދާ ކަމަށް ދެކެވޭ ވާހަކަތައް ރައީސް ޑޮނަލްޑް ޓްރަމްޕް ތަކުރާރުކޮށް ދޮގުކުރައްވަމުން ގެންދަވާ ދަނޑިވަޅެއްގައި ނެރުނު ރިޕޯޓެކެވެ.
މިނިވަން މުއައްސަސާއެއް ކަމަށްވާ އިންސްޕެކްޓާ ޖެނެރަލްގެ އޮފީހުން ބުނި ގޮތުގައި، ފެބްރުއަރީ މަހުން ފެށިގެން ޖޫން މަހުގެ ނިޔަލަށް އެމެރިކާއިން ވަނީ ހަތިޔާރަށް އެކަނިވެސް 22 ބިލިއަން ޑޮލަރަށް ވުރެ ގިނައިން ޚަރަދުކޮށްފަ އެވެ. މީގެ ސަބަބުން ގައުމުގެ "ސްޓްރެޓީޖިކް އިންވެންޓްރީ" ހަތިޔާރުގެ މިންވަރު ވަނީ ވަރަށް ބޮޑަށް ދަށްވެފަ އެވެ.
މި ރިޕޯޓާ ގުޅޭގޮތުން ސުވާލު ކުރުމުން ވައިޓް ހައުސްއިން ބުނީ އެމެރިކާގައި "ބޭނުންވާ ވަރަށް ވުރެ ވެސް ގިނައިން" ހަތިޔާރު އެބަހުރި ކަމަށެވެ.
މި ރިޕޯޓަކީ އާންމުކޮށް ސިއްރުކޮށްފައި އޮންނަ އެމެރިކާގެ ހަތިޔާރުގެ ރިޒާވްއާ ބެހޭ ގޮތުން، މިނިވަން މުއައްސަސާއަކުން މިހާ ތަފްސީލުކޮށް ހާމަކުރި ފުރަތަމަ ފަހަރެވެ.
މީގެ ކުރިން ބައެއް ފަރާތްތަކުން ލަފާކޮށްފައިވާ ގޮތުގައި، އެމެރިކާގެ ހަތިޔާރު ރިޒާވް ވަނީ ނުރައްކާތެރި ދަރަޖައަކަށް ދަށްވެފަ އެވެ.
ސެންޓަރ ފޯ ސްޓްރެޓީޖިކް އެންޑް އިންޓަރނޭޝަނަލް ސްޓަޑީޒް (ސީ.އެސް.އައި.އެސް) އިން ޖުލައި މަހުގެ ފަހުކޮޅު ނެރުނު އަންދާޒާއެއް ދައްކާ ގޮތުގައި، "ޕެޓްރިއަޓް މިސައިލް" އާއި "ޓާމިނަލް ހައި އެލްޓިޓިއުޑް އޭރިއާ ޑިފެންސް" (ތާޑް) ފަދަ ހަމަލާ ހުއްޓުވާ މިސައިލްތައް ވަނީ ވަރަށް ބޮޑަށް ހުސްވެފަ އެވެ. ބައެއް ބާވަތްތަކުގެ މިސައިލްތަކުގެ ދެބައިކުޅަ އެއްބަޔަށް ވުރެ ގިނައިން މިހާރު ވަނީ ހުސްވެފަ އެވެ.
ވައިޓް ހައުސްއިން ވަނީ އިންސްޕެކްޓާ ޖެނެރަލްގެ މި ހޯދުންތައް ގަބޫލުކުރަން ދެކޮޅު ހަދާފަ އެވެ.
ވައިޓް ހައުސްގެ ތަރުޖަމާނު އޭނާ ކެލީ އަންގާރަ ދުވަހު ނެރުއްވި ބަޔާނެއްގައި ވިދާޅުވީ، ކޮމާންޑަރ-އިން-ޗީފްގެ އިސްތިރާތީޖީ ލަނޑުދަނޑިތައް ހާސިލުކުރުމަށާއި، އެއަށްވުރެ އިތުރަށް ވެސް ބޭނުންވާނެ ހުރިހާ ބާވަތެއްގެ ހަތިޔާރާއި ވަޒަން އެމެރިކާގެ އަސްކަރިއްޔާގައި އެބަހުރި ކަމަށެވެ.
ޓްރަމްޕާއި ސަރުކާރުގެ އެހެން އިސްވެރިން ވެސް ވަނީ ހަތިޔާރު މަދުވާ ކަމަށް ބުނެ ނެރޭ ރިޕޯޓްތަކަކީ ދޮގު އަދި "ގައުމަށް ޣައްދާރުވުން" ފަދަ އަމަލެއްގެ ގޮތުގައި ސިފަކުރައްވާފަ އެވެ.
