ސްނެޕްޗެޓް ބޭނުންކުރާ ފުރާވަރުގެ ކުދިންނަށް އެ އެޕްލިކޭޝަން ބޭނުންކުރެވޭނެ ވަގުތު ކަނޑައެޅުމަށް އެ ކުންފުނިން ތައްޔާރަށް އޮތް ކަމަށް އެ ކުންފުނީގެ ވެރިޔާ ވިދާޅުވެއްޖެ އެވެ.
ސްނެޕްޗެޓުން މިކަން ހާމަކޮށްފައި މިވަނީ، ސޯޝަލް މީޑިއާގެ އެހެން މަންސަތަކުން ވެސް މިފަދަ ފިޔަވަޅުތައް އެޅުމަށް މެޓާ ކުންފުނިން ގޮވާލާފައިވާ ދަނޑިވަޅެއްގައެވެ.
ކެލިފޯނިއާގައި ހުންނަ ސްނެޕްޗެޓްގެ މައި މަރުކަޒުގައި ބީބީސީއަށް ދެއްވި އިންޓަވިއުއެއްގައި އެ ކުންފުނީގެ ސީއީއޯ އިވާން ސްޕީގަލް ވިދާޅުވީ، އެޕްލިކޭޝަންގައި ހޭދަކުރެވޭނެ އެންމެ ގިނަ ވަގުތު ކަނޑައެޅުމަކީ މުޅި ސޯޝަލް މީޑިއާ ސިނާއަތަށް ވެސް އެޅޭނެ މުހިންމު ފިޔަވަޅެއް ކަމަށް ގަބޫލުކުރައްވާ ކަމަށެވެ.
ސްޕީގަލް މިހެން ވިދާޅުވެފައި މިވަނީ، އެޕަލް އައިފޯނާއި މެކް ޑިވައިސްތަކާ ގުޅާލެވޭ ގޮތަށް ސްނެޕްޗެޓުން އަލަށް އުފައްދާ "ސްޕެކްސް" އައިނުގެ އާ ފީޗާތަކެއް އެ ކުންފުނިން ތައާރަފުކުރި ދަނޑިވަޅެއްގައެވެ.
އެމެރިކާގެ އެކި ސްޓޭޓްތަކާއެކު ވެފައިވާ ބިލިއަން ޑޮލަރުގެ ގާނޫނީ އެއްބަސްވުމެއްގެ ދަށުން މެޓާ އިން ގެންނަން ނިންމާފައިވާ ބަދަލުތަކުގައި އެހެން ސޯޝަލް މީޑިއާ ކުންފުނިތަކުން ވެސް ބައިވެރިވުމަށް އެ ކުންފުނިން ދަނީ ބާރުއަޅަމުންނެވެ.
އިންސްޓަގްރާމާއި ފޭސްބުކްގެ މައި ކުންފުނި މެޓާއާ ދެކޮޅަށް އެމެރިކާގެ ގިނަ ސްޓޭޓްތަކެއްގެ އެޓާނީ ޖެނެރަލުން ވަނީ ދައުވާ އުފުލާފައެވެ. އެ ދައުވާތަކުގައި ބުނެފައިވަނީ ޒުވާން ކުދިން އެޕްލިކޭޝަންތަކަށް ދެވިހިފާނެ ގޮތަށް މެޓާ އިން ގަސްދުގައި އެ އެޕްތައް ފަރުމާކޮށްފައިވާ ކަމަށެވެ.
މި މައްސަލަ ހައްލުކުރުމުގެ ގޮތުން 12.7 ބިލިއަން ޑޮލަރު ދެއްކުމަށާއި، ފުރާވަރުގެ ކުދިންނަށް ދުވާލަކު ދެ ގަޑިއިރުގެ ލިމިޓެއް އޮޓޮމެޓިކުން ކަނޑައެޅުމަށް މެޓާ އިން ވަނީ އެއްބަސްވެފައެވެ. މީގެ އިތުރުން ސްކޫލް ގަޑިތަކުގައި ނޮޓިފިކޭޝަންތައް މިއުޓްކުރުމާއި، ރޭގަނޑު ވަގުތުތަކުގައި އެޕް ބޭނުންކުރުން ހުއްޓުވުން ފަދަ ފިޔަވަޅުތައް އެޅުމަށް ވެސް ވަނީ ނިންމާފައެވެ.
"މިއީ މި ސިނާއަތުގައި އަމަލުކުރާނެ މިންގަނޑުތަކެއް ކަނޑައެޅުމަށް އެޅޭ މުހިންމު ފިޔަވަޅެއް ކަމަށް އަޅުގަނޑު ދެކެން. އަދި މީގެ ސަބަބުން މުޅި ދާއިރާއަށް ވެސް ފައިދާ ކުރާނެ،" ސްޕީގަލް ބީބީސީއަށް ވިދާޅުވިއެވެ.
އޮގަސްޓް މަހު މެޓާ އިން ވެފައިވާ އެއްބަސްވުމުގައިވާ ގޮތުން، ޔޫޓިއުބާއި ޓިކްޓޮކުން ވެސް މިފަދަ ފިޔަވަޅުތައް އަޅައިފިނަމަ، މެޓާ އިން އިތުރު 5.3 ބިލިއަން ޑޮލަރު ދެއްކުމަށާއި ވަގުތު ކަނޑައެޅުމުގެ އުސޫލުތައް މިހާރަށްވުރެ ވަރުގަދަކުރުމަށް ވަނީ ނިންމާފައެވެ. 10 އަހަރުގެ މުއްދަތަށް ބަހާލައިގެން ފައިސާ ދައްކާ ގޮތަށް ހަމަޖެހިފައިވާ މި އެއްބަސްވުމުގައި، މެޓާ އިން އެއްވެސް ގޯހެއް ހަދާފައިވާ ކަމަށް އިއުތިރާފެއް ނުވެއެވެ.
ނިމިދިޔަ މަހު މެޓާގެ ތަރުޖަމާނަކު ވިދާޅުވީ ސްނެޕްޗެޓުން ވެސް މިފަދަ ބަދަލުތަކެއް ގެންނާނެ ކަމަށް އުންމީދުކުރާ ކަމަށެވެ.
މެޓާ، ޔޫޓިއުބް، ޓިކްޓޮކް އަދި ސްނެޕްޗެޓަށް ވަނީ ޒުވާނުންގެ ނަފްސާނީ ދުޅަހެޔޮކަމުގެ މައްސަލަތައް ކުރިމަތިވުމަށް އެހީތެރިވާ ކަމަށް ބުނެ ގިނަ ގާނޫނީ ގޮންޖެހުންތަކެއް ކުރިމަތިވެފަ އެވެ. މީގެ އިތުރުން ސްނެޕްޗެޓް މެދުވެރިކޮށް ގަވާއިދާ ހިލާފަށް މަސްތުވާތަކެތި ވިއްކުމަށް މަގުފަހިވާ ކަމުގެ ތުހުމަތު ވެސް އެ ކުންފުންޏަށް ވަނީ އަމާޒުވެފަ އެވެ.
އޮޓޮމެޓިކުން ވަގުތު ކަނޑައެޅުމުގެ ހިޔާލާ ގުޅޭގޮތުން ސުވާލުކުރުމުން ސްޕީގަލް ވިދާޅުވީ، އެއީ އެ ކުންފުނިން ތަންފީޒުކުރަން ބޭނުންވާ ކަމެއްގެ ވަރަށް ރަނގަޅު މިސާލެއް ކަމަށެވެ.
ނަމަވެސް، މި ބަދަލުތައް ގެންނާނެ ވަކި ތާރީހެއް ސްޕީގަލް ހާމައެއް ނުކުރައްވައެވެ.
"އެއީ އަޅުގަނޑުމެން ކުންފުނީގެ އެތެރޭގައި މަޝްވަރާކުރަމުންދާ ކަމެއް. މިއަދު އެކަމާ ގުޅޭ އިތުރު ތަފްސީލެއް ހިއްސާކުރާކަށް ނެތް،" އޭނާ ވިދާޅުވިއެވެ.
ސްނެޕްޗެޓްގެ "ފެމިލީ ސެންޓަރ" ފީޗާ މެދުވެރިކޮށް، ފުރާވަރުގެ ކުދިން އެޕްލިކޭޝަން ބޭނުންކުރާ ގޮތް ބެލެނިވެރިންނަށް މިހާރު ވެސް މޮނިޓަ ކުރެވޭނެ އިންތިޒާމު ހަމަޖެހިފައިވާކަން އޭނާ ފާހަގަކުރެއްވިއެވެ.
ޔޫޓިއުބްގެ މައި ކުންފުނި ގޫގުލްއާ މިކަމާ ގުޅޭގޮތުން ސުވާލުކުރުމުން، މެޓާގެ އެއްބަސްވުމުގައިވާ ފަދަ ފިޔަވަޅުތައް އެޅުމާ މެދު އެއްވެސް އެއްޗެއް ބުނަން ބޭނުންނުވާ ކަމަށް ވަނީ ބުނެފަ އެވެ. އަދި ޓިކްޓޮކުން ބީބީސީގެ ސުވާލުތަކަށް އެއްވެސް ޖަވާބެއް ދީފައެއް ނުވެއެވެ.
