ކޯލް އަދި ގޭސް ބޭނުންކޮށްގެން ހިންގާ އިންޖީނުގެތަކުން ދުން ބޭރުވާ މިންވަރު ކުޑަކުރުމަށް ހަދާފައިވާ ގަވާއިދުތައް އުވާލަމުންދާކަން އެމެރިކާގެ އެންވަޔަރަންމަންޓަލް ޕްރޮޓެކްޝަން އެޖެންސީ (އީޕީއޭ) އިން އިއުލާންކޮށްފި އެވެ.
އީޕީއޭ އިން ބުނި ގޮތުގައި، ކުރިއަށް އޮތް ތަނުގައި އަންނަ ސަރުކާރުތަކަށް ވެސް އިންޖީނުގެތަކުން ދޫކުރާ ވިހަ ގޭސްތައް ކޮންޓްރޯލް ކުރުމަށް ގަވާއިދުތައް ނުހެދޭނެ ގޮތަށް ފިޔަވަޅުތަކެއް އެޅުމަށް ވަނީ ނިންމާފަ އެވެ.
ރައީސް ޖޯ ބައިޑަންގެ ސަރުކާރުން ތައާރަފުކުރި މޫސުމީ ބަދަލުތަކާ ގުޅޭ ގިނަ ގަވާއިދުތަކެއް އުވާލުމުން، 310 ބިލިއަން ޑޮލަރު ސަލާމަތް ކުރެވި، ހަކަތައިގެ އަގުތައް ހެޔޮވާނެ ކަމަށް އީޕީއޭ އިން ބުނެ އެވެ.
ނަމަވެސް، ތިމާވެށި ރައްކާތެރިކުރުމަށް މަސައްކަތްކުރާ ޖަމިއްޔާތަކުން އިންޒާރު ދޭ ގޮތުގައި، މި ނިންމުމުގެ ސަބަބުން އެމެރިކާގެ ރައްޔިތުންގެ ސިއްހަތަށާއި ދުނިޔޭގެ ތިމާވެއްޓަށް ބޮޑެތި ގެއްލުންތަކެއް ލިބޭނެ އެވެ. އީޕީއޭގެ މި ނިންމުމާ ދެކޮޅަށް ވަގުތުން ކޯޓަށް މައްސަލަ ހުށަހަޅާނެ ކަމަށް ބެލެވެ އެވެ.
އދ. އިން ހާމަކުރާ ގޮތުގައި، ދުނިޔޭގެ މޫސުމަށް އަންނަ ބަދަލުތަކަށް އެންމެ ބޮޑަށް މެދުވެރިވާ ސަބަބަކީ ކޯލް އާއި ގޭސް ހިމެނޭހެން ބިމުން ނަގާ ތެޔޮ ނުވަތަ ފޮސިލް ފިއުލްސް ބޭނުންކުރުމެވެ.
ތިމާވެށީގެ މިނިވަން ޖަމިއްޔާއެއް ކަމަށްވާ ސެންޓަރ ފޯ ކްލައިމެޓް އެންޑް އެނާޖީ ސޮލިއުޝަންސްގެ ރައީސް ނަތަނިއަލް ކިއޯހޭން މި ނިންމުން ސިފަކުރެއްވީ "ފަހަތަށް އެޅި ވަރަށް ބޮޑު ފިޔަވަޅެއް" ގެ ގޮތުގަ އެވެ.
ދުނިޔެ ހޫނުވުމަށް މެދުވެރިވާ ކާބަން ޑައިއޮކްސައިޑް ފަދަ ގްރީންހައުސް ގޭސްތައް އެންމެ ގިނައިން ދޫކުރާ ގައުމުތަކުގެ ލިސްޓުގައި ޗައިނާއަށް ފަހު ދެވަނައަށް އޮތީ އެމެރިކާ އެވެ.
އެންމެ ފަހުގެ އަންދާޒާތަކުން ދައްކާ ގޮތުގައި، އެމެރިކާއިން ދޫކުރާ ވިހަ ގޭހުގެ ހަތަރުބައިކުޅަ އެއްބައި ހިއްސާކުރަނީ ހަކަތަ އުފައްދާ ދާއިރާއިންނެވެ. އެއީ އަހަރަކު ގާތްގަނޑަކަށް 1.5 ބިލިއަން ޓަނުގެ ކާބަން ޑައިއޮކްސައިޑެވެ.
