ހުޅުމާލެ ފޭސް 2 ގަިއ މިދިޔަ އޮގަސްޓް 31، ގައި ހިނގި އެކްސިޑެންޓުގައި އަނިޔާވެ ފަރުވާދެމުންދިޔަ މީހާ ރޭ މަރުވެއްޖެ އެވެ.
ހުޅުމާލެ ފޭސް 2 ގެ ދުނބުރިގަސްމަގާއި ހީނާމާހިނގުން ގުޅުނު ކަންމަތީގައި ކާރަކާއި ސައިކަލެއް ޖެހި ހިނގި އެކްސިޑެންޓްގައި މަރުވީ ސައިކަލު ދުއްވަން އިން ޅ. ކުރެންދޫ، މާޖެހިގެ، މުހައްމަދު އަފީފް، 62 އެވެ.
އޭނާ މަރުވީ ހުޅުމާލޭ ހޮސްޕިޓަލުގައި ފަރުވާދިނުމަށްފަހު، ޓްރީޓޮޕް ހޮސްޕިޓަލަށް ބަދަލުކޮށް އައިސީޔޫގައި އިތުރު ފަރުވާ ދެމުންދަނިކޮށެވެ.
އެކި ސްކޫލްތަކުގައި ޓީޗަރެއް ގޮތުގައި މަސައްކަތްކުރި އަފީފްގެ ކަށުނަމާދު އޮތީ މެންދުރު ނަމާދަށްފަހު ހުޅުމާލޭ އާސަހަރާ މިސްކިތުގަ އެވެ.
މި އެކްސިޑެންޓުގައި ދެން އަނިޔާވީ ސައިކަލު ފަހަތުގައި އިން 24 އަހަރުގެ މީހާއަށެވެ. އޭނާއަކީ އަފީފްގެ ދަރިފުޅު ކަމަށް މި ނޫހަށް މައުލޫމާތު ލިބެ އެވެ.
މިއީ މަހެއް ތެރޭގައި ހުޅުމާލޭގައި ހިނގި އެކްސިޑެންޓުގައި މަރުވި ދެވަނަ މީހާ އެވެ. ހުޅުމާލޭގައި މިދިޔަ އޮގަސްޓް 29، ގައި ހިނގި އެކްސިޑެންޓެއްގައި ނުވަ އަހަރު ކުއްޖަކުވެސް ނިޔާވި އެވެ.
މި އަހަރު ތެރޭގައި މިހާތަނަށް 2،126 އެކްސިޑެންޓް ހިނގައިގެން ފުލުހުންނަށް ރިޕޯޓްކޮށްފައިވާއިރު، މި މަހު މިހާތަނަށް 94 އެކްސިޑެންޓުވެގެން ފުލުހުންނަށް ރިޕޯޓުކޮށްފައިވެ އެވެ.
