ހުޅުމާލޭގެ ދެވަނަ ފިޔަވަހިން ނުއަގުގައި މީހަކަށް ގޯއްޗެއް ވިއްކި މައްސަލައަށް އާންމުންގެ ފާޑުކިޔުން އަމާޒުވުމުން އެކަން ދިފާއުކޮށް، އެއީ ރަނގަޅު ނިންމުމެއް ކަމަށް ހައުސިން މިނިސްޓްރީން ބުނެފި އެވެ.
ހައުސިން މިނިސްޓްރީން މިއަދު ނެރުނު ބަޔާނެއްގައި ބުނީ އަހުމަދު ޒާހިރު ނަމަކަށް ކިޔާ މީހަކަށް އަގުހެޔޮކޮށް ހުޅުމާލެއިން ގޯއްޗެއް ވިއްކީ، 2003 ވަނަ އަހަރު އޭނާއަށް ހުޅުމާލޭގެ އެއްވަނަ ފިޔަވަހިން ގޯއްޗެއް ވިއްކަން އޭރުގެ ސަރުކާރުން ނިންމާފައި އޮތް ނިންމުމަކާ އެއްގޮތަށް ކަމަށެވެ.
އެގޮތުން، ޒާހިރުއަށް ގޯއްޗެއް ވިއްކާފައި އޮތީ ޑިސެމްބަރު 22، 2003، ގައި އޭރުގެ ސަރުކާރުން "މޯލްޑިވްސް ހައުސިން އެންޑް އާބަން ޑިވެލޮޕެމްންޓު ބޯޑު" މެދުވެރިކޮށް ހިންގި ބޯހިޔާވަހިކަމުގެ ސްކީމެއްގެ ތެރެއިން ހުޅުމާލޭގެ ރަށު ތެރެއިން ވިއްކި 56 ގޯތީގެ ދަށުންކަން ރަސްމީ ލިޔެކިޔުންތަކުން ފެންނަން އޮތް ކަމަށް އެ ބަޔާނުގައި ބުންޏެވެ.
"މި ސްކީމުގެ ދަށުން އެ ފަރާތަށް ކަނޑައެޅިފައި ވަނީ 904 އަކަފޫޓުގެ ބިމެއްކަމަށާއި އެ ބިމުގެ އަގަކީ 339،000ރ. ކަން އޭރުގެ ރައީސުލްޖުމްހޫރިއްޔާގެ އޮފީހުގެ ހުޅުމާލެ ޑިވެލޮޕެމްންޓު ޔުނިޓުން ޑިސެމްބަރު 24، 2003 ގައި ދޫކޮށްފައިވާ ލިޔުމުން ވެސް އެނގެން އޮވޭ،" ހައުސިން މިނިސްޓްރީގެ ބަޔާނުގައި ބުންޏެވެ.
ރައީސް އޮފީހުން އަންގައިގެން ހުޅުމާލެއިން ނުއަގުގައި މީހަކަށް ގޯއްޗެއް ވިއްކާލަނީ
ހުޅުމާލޭ ބިމުގެ އަސްލު އަގު އުޅެނީ އަކަފޫޓަކަށް 10،000 ރުފިޔާއަށްވުރެ ވެސް މަތިން. އެހެންކަމުން އަހުމަދު ޒާހިރަށް ބިން ވިއްކާފައި ވަނީ 96 ޕަސެންޓުގެ ޑިސްކައުންޓެއް ދީފަ.
އެކަމަށް ހައްލެއް ހޯދުމަށްޓަކައި ވެއަތުވި ހުރިހާ ސަރުކާރަކަށް ވެސް އޭނާ ހުށަހަޅާފައިވާކަން އެނގެން އޮތް ނަމަވެސް، އެކަމަށް އެއްވެސް ސަރުކާރަކުން ހައްލު ހޯދައިދީފައި ނުވާ ކަމަށް އެ ބަޔާނުގައި ބުންޏެވެ.
އެހެންކަމުން، އެ މައްސަލައަށް ހައްލެއް ހޯދައިދިނުމުގެ ގޮތުން ޒާހިރުއަށް ހުޅުމާލެ ދެވަނަ ފިޔަވަހިން ގޯއްޗެއް ވިއްކީ މީގެ ކުރިން ކުރީގެ ރައީސް، މައުމޫން އަބްދުލްގައްޔޫމްގެ ސަރުކާރުން އޭނާއަށް ބިން ވިއްކުމަށް އެއްބަސްވެފައިވާ ކޮމާޝަލް ޓާމްސްތަކާއެ އެއްގޮތްވާ ގޮތުގެ މަތިން ކަމަށް ހައުސިން މިނިސްޓްރީގެ ބަޔާނުގައި ބުންޏެވެ.
ހުޅުމާލޭގެ ދެވަނަ ފިޔަވަހިން ޒާހިރުއަށް ވިއްކާފައިވާ ބިމަކީ ބިންވެރިޔާ ސްކީމުގެ ދަށުން އަސާސީ ޝަރުތު ހަމަނުވާ މީހަކަށް ދީފައިވާ ބިމުގެ އެއްބަސްވުމެއް ބާތިލުކުރުމުން ހުސްކޮށް އޮތް ބިމެއް ކަމަށް ވެސް އެ ބަޔާނުގައި ބުންޏެވެ.
ޒާހިރުއަށް އެ ބިން ވިއްކީ ބިންވެރިޔާ ސްކީމުގެ ދަށުން އޭނާއަށް ގުޅީފަޅުން ލިބުނު ގޯތި ދޫކޮށްލަން އެއްބަސްވުމުން ކަމުގައި ވެސް އެ ބަޔާނުގައި ބުންޏެވެ.
އޭގެ އިތުރުން، އެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހެޅުމަށް ހައުސިން މިނިސްޓްރީން ނިންމާފައިވާ ކަމަށް ވެސް އެ ބަޔާނުގައި ބުންޏެވެ.
ސޯޝަލް މީޑިއާގައި ލީކުވެފައިވާ ހައުސިން މިނިސްޓްރީގެ މެމޯއެއްގައި ބުނެފައިވާ ގޮތުން ޒާހިރު އަށް ހުޅުމާލެއިން 1250 އަކަފޫޓުގެ ބިމެއް ވިއްކަން ނިންމާފައި ވަނީ 468،750 ރުފިޔާއަށެވެ. އެއިރުން އަކަފޫޓަކަށް ޖެހެނީ އެންމެ 375 ރުފިޔާ އެވެ.
ހުޅުމާލޭގައި އެންމެ ފަހުން ވިޔަފާރި އުސޫލުން ބިން ވިއްކާފައި ވަނީ 4000ރ. އާއި 4500ރ. ދެމެދުގެ އަގެއްގަ އެވެ. އެހެންކަމުން އަހުމަދު ޒާހިރަށް ބިން ވިއްކާފައި ވަނީ މާކެޓު އަގަށް ވުރެ ބޮޑު ޑިސްކައުންޓެއް ދީފަ އެވެ.
އެކަމުގެ މައުލޫމާތު އެނގޭ މީހަކު ނަން ނުޖެހުމަށް އަދި އަދަދު އާ ވާހަކަ ދައްކަމުން ބުނީ ޒާހިރަށް ނުއަގުގައި ގޯތި ވިއްކަން ހައުސިން މިނިސްޓްރީއަށް އެންގީ ރައީސުލްޖުމްހޫރިއްޔާގެ އޮފީހުން ކަމަށެވެ. ޒާހިރަކީ ވެރިކަން ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ މެންބަރެކެވެ.
