ސިނަމާލެ ބްރިޖުން މާލެއިން ހުޅުމާލެއަށް ދަތުރުކުރި ބާރު ސްޕީޑުގައި ދުއްވި ސައިކަލެއް ކަހާލައިގެން ވެއްޓި އިތުރު ސައިކަލަކާއި ކާރެއްގައި ޖެހިގެން ހިނގި އެކްސިޑެންޓެއްގައި ޒުވާނަކަށް ސީރިއަސް އަނިޔާތަކެއް ރެ ލިބިއްޖެ އެވެ.
ފުލުހުން ބުނީ މި އެކްސިޑެންޓުގައި ޖުމްލަ ތިން މީހަކަށް އަނިޔާވިއިރު، އޭގެ ތެރޭގައި ހިމެނެނީ އެއް ސައިކަލުގައި ތިބި ދެ މީހުންނާއި އަނެއް ސައިކަލުގައި އިން މީހާ ކަމަށެވެ.
އެ އެންމެންނަށް ފަރުވާދެމުންދިޔައީ ހުޅުމާލޭ ހޮސްޕިޓަލުގައި ކަމަށް ފުލުހުން ބުންޏެވެ. އެވެ. އޭގެ ތެރެއިން ސީރިއަސް އަނިޔާތައް ލިބިފައިވަނީ 20 އަހަރުގެ ދިވެހި ފިރިހެނަކަށް ކަމަށްވެސް އެ މުއައްސަސާއިން ބުންޏެވެ.
މި ނޫހަށް އެނގިފައިވާ ގޮތުގައި އަނިޔާވި ތިން މީހުންގެ ތެރެއިން ދެ މީހަކު މިވަގުތު ވަނީ ހޮސްޕީޓަލުން ދޫކޮށްލާފަ އެވެ. އޭގެއިތުރުން އެޑްމިޓްކޮށްފައިވާ 20 އަހަރުގެ ޒުވާނާއަށް ލިބުނު އަނިޔާތަކާ ގުޅިގެން ސާޖަރީއެއް މިއަދު ކުރުމަށް ހަމަޖެހިފައިވާ ކަމަށް މައުލޫމާތު ލިބެ އެވެ.
މި މައްސަލަ ތަހުގީގު ކުރަމުންދާ ކަމަށް ފުލުހުން ބުންޏެވެ. މި އަހަރު މިހާތަނަށް 2،100 އެކްސިޑެންޓުގެ މައްސަލަ ފުލުހުންނަށް ރިޕޯޓުކުރެވިފައިވާއިރު، މި މަހު މިހާތަނަށް 68 މައްސަލަ ރިޕޯޓުކުރެވިގެން ދަނީ ބަލަމުންނެވެ.
