މެޑްރިޑް (ސެޕްޓެމްބަރު 6) - ސްޕެނިޝް ލީގުގައި މިރޭ ވެލެންސިއާ ދަނޑުގައި 5-0 އިން މޮޅުވެ، ބާސެލޯނާ އިން ސްޕެނިޝް ލީގު ތާވަލުގެ ކުރީގައި ދެ ޕޮއިންޓުގެ ލީޑެއް ނަގައިފި އެވެ.
ހަންސީ ފްލިކްގެ ކޯޗުކަމުގައި ކުޅޭ ބާސެލޯނާ އަކީ ސްޕެނިޝް ލީގުގެ އާ ސީޒަނުގައި ކުޅުނު ހަތަރު މެޗުން މޮޅުވި ހަމައެކަނި ޓީމެވެ. މި ސީޒަނުގައި، ހޯސޭ މޮރީނިއޯގެެ ކޯޗުކަމުގައި ކުޅޭ ރެއާލް މެޑްރިޑުން މި ހަފްތާގައި ކުޅުނު މެޗުން ރެއާލް ބެޓިސް އަތުން ބަލިވުމުގެ ފައިދާ ވާދަވެރި ބާސެލޯނާ އިން މި ވަނީ ރަނގަޅަށް ނަގައިފަ އެވެ.
ބާސެލޯނާ އަށް ހަތަރު މެޗުން 12 ޕޮއިންޓް ލިބިފައިވާއިރު، ދެ ވަަނައިގައި އޮތް ޑިޕޯޓިވޯ އަލަވޭސް އަށް ހަތަރު މެޗުން ވަނީ 10 ޕޮއިންޓް ލިބިފަ އެވެ. ތިން ވަނައިގައި އޮތް ރެއާލް މެޑްރިޑާއި ހަތަރެއްގައި އޮތް ރެއާލް ބެޓިސް އަށް ހަތަރު މެޗުން ލިބިފައިވަނީ ނުވަ ޕޮއިންޓެވެ.
ވެެލެންސިއާގެ ދަނޑުގައި މިރޭ ކުޅުނު މެޗުގެ ހަ ވަނަ މިނިޓްގައި ބާސެލޯނާ އަށް ލީޑުނަގައިދިނީ ފަހަކަށް އައިސް ރަނގަޅު ފޯމެއްގައި ކުޅެމުން އަންނަ ލަމީން ޔަމާލް އެވެ. ފާމިން ލޮޕޭޒް ދިން ބޯޅައަކަށް އަރައި އޭރިއާތެރެއިން ޔަމާލް ވަނީ ވެލެންސިއާގެ ކީޕަރު، ސްޓޯލް ޑިމްޓްރިއެވްސްކީ ބޯމަތިން ގޯލަށް ފޮނުވާލައިފަ އެވެ. އޭގެ ދެ މިނިޓް ފަހުން، ފާމިން ލޮޕޭޒް ދިން ބޯޅައަކުން ޔަމާލް ޖެހި ގޯލު ވަނީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފައި އޮފްސައިޑް ކަމަށް ނިންމައިފަ އެވެ.
މެޗުގެ 22 ވަނަ މިނިޓްގައި އޭރިއާ ރޮނގުކައިރީގައި ހުރެފައި ފާމިން ލޮޕޭޒް ވަނީ ގޯލުގެ ތިރީ ކަނަށް ބޯޅަ ފޮނުވާލައިގެން ބާސެލޯނާގެ ތިން ވަނަ ލަނޑު ޖަހައިފަ އެވެ. އޭގެ ފަހުން، ޔަމާލް ޖެހި ޝޮޓެއް ކީޕަރު ޑިމްޓްރިއެވްސްކީ މަތަކުރި އެވެ.
ބާސެލޯނާ އިން ތިން ވަނަ ލަނޑު ޖެހީ ދެ ވަނަ ހާފުގެ ފަސް ވަނަ މިނިޓްގަ އެވެ. މެޗުގެ 50 ވަނަ މިނިޓްގައި ފާމިން ލޮޕޭޒް މުޅިން ހުސްކޮށްލާފައި ދިން ބޯޅައެއް ރަފީނިއާ ވަނީ ގޯލަށް ފޮނުވާލައިފަ އެވެ.
ބާސެލޯނާ އިން މެޗުގައި ޖެހި ފަހު ދެ ލަނޑު ވެސް ޖެހީ ޑެނީ އޮލްމޯ ތަނަަވަސްކޮށްދިން ފުރުސަތުތަކުންނެވެ. އެ ގޮތުން، މެޗުގެ 79 ވަނަ މިނިޓްގައި ޕެޑްރީ ދިން ބޯޅައަކުން ޕެޑްރީ ފޮނުވާލި ޝޮޓް އަމާޒުވީ ގޯލުގެ ތިރީ ކަނަށެވެ. އަދި، އޭގެ ފަސް މިނިޓް ފަހުން އޮލްމޯ ދިން ބޯޅައެއް ޔަމާލް ވަނީ ގޯލަށް ފޮނުވާލައިފަ އެވެ.
