މެޑްރިޑް (ސެޕްޓެމްބަަރު 15) - ލުއިސް ޑެ ލަ ފުއެންޓޭ، ސްޕެއިނުގެ ކޯޗަކަށް 2030 ވަނަ އަހަރުގެ ފީފާ ވޯލްޑް ކަޕްގެ ނިޔަަލަށް މަޑުކުރަން އެ ޓީމާ އެކު ހަދާފައިވާ އެއްބަސްވުން އާ ކުރަން ނިންމައިފި އެވެ.
އުމުރުން 65 އަހަރުގެ ޑެ ލަ ފުއެންޓޭ، މި ވަގުތު ސްޕެއިނުގެ ކޯޗަކަށް ހުރީ 2028 ވަނަ އަހަރުގެ ޔޫރޯގެ ނިޔަލަށެވެ. އެކަމަކު، ސްޕެއިނުގެ ފުޓްބޯޅަ ފެޑެރޭޝަނުން ޑެ ލަ ފުއެންޓޭގެ އެއްބަސްވުން އާ ކުރަން ހުށަހެޅި ޕްރޮޕޯސަލް ބަލައިގަންނަން އޭނާ ވަނީ ނިންމައިފަ އެވެ.
ގަތަރުގައި 2022 ވަަނަ އަަހަރު ބޭއްވި ވޯލްޑް ކަޕްގެ ގަދަ 16 ބުރުން މޮޮރޮކޯ އަތުން ޕެނަލްޓީ ޖަހައިގެން ކެޓި ފަހުން ސްޕެއިންގެ ކޯޗުކަމުން ލުއިސް އެންރީކޭ ވަކިކޮށް، ޑެ ލަ ފުއެންޓޭއާ އެ ޓީމު ހަވާލުކުރި ފަހުން، އޭނާ ވަނީ އެ ޓީމާ އެކު، 2023 ވަނަ އަހަރު ޔުއެފާ ނޭޝަންސް ލީގު، 2024 ވަނަ އަހަރުގެ ޔޫރޯ ފުޓްބޯޅަ މުބާރާތް އަދި މި އަހަރުގެ ޖޫން/ޖުލައި ގައި އެމެރިކާ، މެކްސިކޯ އަދި ކެނަޑާގައި ބޭއްވި ފީފާ ވޯލްޑް ކަޕްގެ ޗެމްޕިއަންކަން ހޯދައިފަ އެވެ.
ޑެ ލަ ފުއެންޓޭގެ ކޮންޓްރެކްޓް އާ ކުރަން ސްޕެއިނުގެ ފުޓްބޯޅަ ފެޑެރޭޝަނުން އެންމެ ބޮޑަށް ނިންމީ ވެސް މި ފަހަރުގެ ވޯލްޑް ކަޕްގެ ނަަތީޖާތަކުގެ ރިވިއު މީޓިން އެއް ބޭއްވުމަށް ފަހު އެވެ. ސްޕެއިނަށް މިހާތަނަށް 49 މެޗުގައި ކޯޗުކޮށްދީފައިވާ ޑެ ލަ ފުއެންޓޭ ވަނީ އެ ޓީމަށް 39 މެޗުން ކާމިޔާބު ހޯދައިދީފަ އެވެ. ހަތް މެޗުން އެއްވަރުވިއިރު، ތިން މެޗުން ވަނީ ބަލިވެފަ އެވެ.
ނޭޝަންސް ލީގުގެ ފައިނަލް މެޗުން، މިދިޔަ އަހަރު ޕެނަލްޓީ ޖަހައިގެން ޕޯޗުގަލް އަތުން ބަލިވި ފަހުން، ސްޕެއިނުން މެޗަކުން ބަލިނުވެ އެވެ. އަދި، ވޯލްޑް ކަޕްގެ ފައިނަލާ އެކު، ބަލިނުވެ 38 މެޗު ހަމަކޮށް ފުޓްބޯޅައިގައި ރެކޯޑެއް ވަނީ ހަދައިފަ އެވެ. އެއީ، ޖެހިޖެހިގެން އެންމެ ގިނަ މެޗުން ބަލިނުވެ އޮތުމުގެ ރެކޯޑެވެ. މީގެ ކުރިން އެ ރެކޯޑް އޮތީ އިޓަލީ އަތުގަ އެވެ.
ފްރާންސް ފުޓްބޯލްގެ ބެލޮންޑިއޯ އެވޯޑްސްގައި މޮޅު ކޯޗަކަށް ނޮމިނޭޓްވެފައިވާ، ޑެ ލަ ފުއެންޓޭ ވަނީ، 19 އަހަރުން ދަށާއި 21 އަހަރުން ދަށުގެ ޔޫރޯ ފުޓްބޯޅަ މުބާރާތުގެ ޗެމްޕިއަންކަން ސްޕެއިނަށް ހޯދައިދީފަ އެވެ.
ދެން އޮންނަ ވޯލްޑް ކަޕް ބާއްވާން ކަނޑައަޅާފައިވަނީ، ސްޕެއިނާއި ޕޯޗުގަލް އަދި މޮރޮކޯ އިން ގުޅިގެންނެވެ. އެ ވޯލްޑް ކަޕް އޮތް ތާރީހަކީ، އެންމެ ފުރަތަމަ ވޯލްޑް ކަޕެއް ކުޅުުނުތާ 100 އަހަރު ފުރޭ އަހަރު ކަމަށްވާތީވެ، ފީފާ އިން ވަނީ، އިތުރު ތިން ގައުމެއްގައި ވެސް ވޯލްޑް ކަޕްގެ މެޗުތަކެއް ކުޅެން ނިންމައިފަ އެވެ. އެއީ، ދެކުނު އެމެރިކާގެ ތިން ގައުމު ކަމަށްވާ އާޖެންޓީނާ އާއި އުރުގުއޭ އަދި ޕެރަގުއޭގަ އެވެ.
