ނިއު ޔޯކް، ޔުނައިޓެޑް ސްޓޭޓްސް (ޖުލައި 20) - އިތުރު ވަގުތުގެ ދެ ހާފު ކުޅެގެން، 1-0 އިން އާޖެންޓީނާ ބަލިކޮށް ސްޕެއިނުން ފީފާ ވޯލްޑް ކަޕްގެ ޗެމްޕިއަންކަން ހޯދައިފި އެވެ.
މިއީ، 2010 ވަނަ އަހަރުގެ ވޯލްޑް ކަޕްގެ ޗެމްޕިއަންކަން ހޯދި ފަހުން ސްޕެއިނުން މި މުބާރާތް ކާމިޔާބުކުރި ދެ ވަނަ ފަހަރެވެ. އަނެއްކޮޅުން، ސްޕެއިނުން މި ވަނީ ބަލިނުވެ ޖެހިޖެހިގެން 38 މެޗު ހަމަކޮށް، ދުނިޔޭގެ ފުޓްބޯޅައިގައި ރެކޯޑެއް ހަމަކޮށްފަ އެވެ. މީގެ ކުރިން، ޖެހިޖެހިގެން އެންމެ ގިނަ މެޗުން ބަލިނުވުމުގެ ރެކޯޑް އޮތީ 37 މެޗުން ބަލިނުވެ ނިންމާލި އިޓަލީ އަތުގަ އެވެ.
ސްޕެއިނުން ފުރަތަަމަ އެގާރަ އަށް ބަދަލެއް ނުގެނެސް މި މެޗަށް ނުކުތްއިރު، އާޖެންޓީނާ އިން ނުކުތީ ފުރަަތަމަ އެގާރަ އަށް ތިން ބަދަލެއް ގެނެސްގެންނެވެ.
މެޗުގެ ފުރަތަަމަ ފަސް މިނިޓް ތެރޭ ސްޕެއިނުގެ ލަމީން ޔަމާލަށް ދެ ފުރުސަތެއް ލިބުނުއިރު، ފޮނުވާލި ބޯޅަތައް އާޖެންޓީނާގެ ކީޕަރު، އެމިލިއާނޯ މާޓިނޭޒް ވަނީ މަތަކޮށްފަ އެެވެ. އަނެއްކޮޅުން، ކައުންޓާގައި އާޖެންޓީނާގެ ކެޕްޓަން، ލިއޮނަލް މެސީ އަށް ސްޕެއިން ޑިފެންސް ފަހަތުން ލިބުނު ބޯޅައެއް، އެ ޓީމުގެ ކީޕަރު، އުނާއި ސިމޯން ވަނީ ސަލާމަތްކޮށްފަ އެެވެ.
ފުރަތަމަ ހާފުގައި ސްޕެއިނަށް ލީޑުނަގައިދޭން އެ ޓީމުގެ ފޯވާޑް، މިކޭލް އޮޔާޒަބާލް ޖެހި ޝޮޓެއް އާޖެންޓީނާގެ ކީޕަރު، އެމިލިއާނޯ މާޓީނޭޒް ވަނީ މަތަކޮށްފަ އެވެ.
އާޖެންޓީނާ އަށް ސްޕެއިނުގެ ގޯލާ އަމާޒުކޮށް ހަމަލާއެއް ފޮނުވާލެވޭގޮތެއްނުވިއިރު، ސްޕެއިނުން ވަނީ ގިނަ ޝޮޓްތަކެއް ދެ ވަނަ ހާފުގައި ފޮނުވާލައިފަ އެވެ. އެ ގޮތުން، ފަބިއަން ރުއީޒް އާއި ޕައު ކުބަރްސީ ޖެހި ޝޮޓްތައް ކީޕަރު މާޓީނޭޒް މަތަކުރި އެވެ.
މެޗުގެ 90 ވަނަ މިނިޓްގައި އާޖެންޓީނާގެ އެންޒޯ ފެނާންޑޭޒަށް ވަނީ ދެ ވަނަ ރީނދޫ ކާޑާ އެކު ރަތެއް ދައްކައިފަ އެވެ. ފުރަތަމަ ރީނދޫ ކާޑު ދެއްކީ ރެފްރީގެ ނިންމުމާ މެދު ހިތްހަމަނުޖެހުން ފާޅުކުރުމުންނެވެ. ދެ ވަނަ ރީނދޫ ކާޑު ދެއްކީ ކުބަރްސީ އަށް ކުރި ނުރައްކާތެރި ފައުލަކަށެވެ.
އިތުރު ވަގުތުގެ ތެރޭގައި، ސްޕެއިނުގެ ނިކޯ ވިލިއަމްސް ޖެހި ޝޮޓެއް ކީޕަރު މާޓީނޭޒް މަތަކުރިއިރު، ފަހު ސިކުންތުގެ ތެރޭގައި ހިލޭ ޖެހުމަކުން ޔަމާލް ފޮނުވާލު ބޯޅަ ވެސް ހުއްޓުވީ ކީޕަރު މާޓީނޭޒް އެވެ.
މެޗުގެ ފުރިހަމަ ވަގުތު ހަމަވިއިރު، ލަނޑެއް ނުޖެހި އެއްވަރުވިއިރު، ނަތީޖާ ނެރެން އިތުރު ވަގުތުގެ ދެ ހާފު ކުޅެން ޖެހުނެވެ. އިތުރު ވަގުުތުގެ ފުރަތަަމަ ހާފުގައި ސްޕެއިނުގެ ނީކޯ ވިލިއަމްސް ލަނޑެއް ޖެހި އެވެ. އެކަމަކު، އޭގެ ކުރިން، ސްޕެއިނުގެ މިކޭލް މެރީނޯ، އޭރިއާތެރެއިން އާޖެންޓީނާގެ ނިކޮލަސް އޮޓަމެންޑީ އަށް ކުރި ފައުލެއް ވަނީ ދަަައްކައިފަ އެވެ.
އޭގެ ފަހުން، އޭރިއާތެރެއިން މެރީނޯ ބޮލުން ފޮނުވާލި ބޯޅައެއް ދިޔައީ ދަނޑިކައިރިން ބޭރުންނެވެ.
އިތުރު ވަގުތުގެ ދެ ވަނަ ހާފުގެ ކުޅުން ފެށިގެން މާ ލަސްތަކެއް ނުވެ ސްޕެއިނުން ވަނީ ލަނޑު ޖަހައިފަ އެވެ. މިއީ، އޭރިއާތެރެއަށް ނެގި ހުރަހަކުން ނިކޯ ވިލިއަމްސް ބޮލުން ޖައްސާލި ބޯޅައަކުން ފެރާން ޓޮރޭޒް ޖެހި ގޯލުންނެވެ.
އާޖެންޓީނާ އިން ފަހު ވަގުތު ކުރިއަށްޖެހިގެން ލަނޑެއް ޖެހޭތޯ މަސައްކަތްތަކެއް ކުރި ނަމަވެސް ސްޕެއިންގެ ގޯލަށް ބޯޅައެއް ވައްދާލެވޭ ގޮތެއްނުވެ ބަލިވީ އެވެ. މިއީ، 2022 ވަނަ އަހަރު ގަތަރުގައި ބޭއްވި ވޯލްޑް ކަޕްގެ ފުރަތަމަ މެޗުން ސައުދީ އަރަބިއްޔާ އަތުން ބަލިވި މެޗަށް ފަހު، އާޖެންޓީނާ އިން ވޯލްޑް ކަޕްގައި ބަލިވި ފުރަތަމަ ފަހަރެވެ.
އަނެއްކޮޅުން، ސްޕެއިނުން މި ފަހަރުގެ ވޯލްޑް ކަޕް ކާމިޔާބުކުރިއިރު، އެ ޓީމުން ކުޅުނު އަށް މެޗުގައި ބައިކޮޅަށް ވަނީ އެންމެ ގޯލެކެވެ. އެއާ އެކު، ސްޕެއިނަކީ އެންމެ މަދުން ބައިކޮޅަށް ގޯލު ވަދެގެން، ވޯލްޑް ކަޕް ޗެމްޕިއަންކަން ހޯދި ޓީމެވެ. މީގެ ކުރިން އެންމެ މަދުން ކޮޅަށް ގޯލު ވަދެގެން، ވޯލްޑް ކަޕް ޗެމްޕިއަންކަން ހޯދީ، 2010 ވަނަ އަހަރުގެ ސްޕެއިން އާއި 2006 ވަނަ އަހަރުގެ އިޓަލީ އަދި 1998 ވަނަ އަހަރުގެ ފްރާންސް ޓީމެވެ. މި ތިން ޓީމު ކޮޅަށް ވެސް ވަނީ އެންމެ ދެ ގޯލެވެ.
