ނިއު ޔޯކް، ޔުނައިޓެޑް ސްޓޭޓްސް (ޖުލައި 20) - ސްޕެއިނަކީ މި ވަގުތު ދުނިޔޭގެ އެންމެ މޮޅު ޓީމު ކަމަށް ބުނުމުން އެކަމާ ދެބަސްވެ، ޝައްކުކުރާނެ މީހެއް މިހާރު ނުހުންނާނެ ކަމަށް ފީފާ ވޯލްޑް ކަޕްގެ ޗެމްޕިއަންކަން ސްޕެއިނަށް ހޯދައިދިން ކޯޗު، ލުއިސް ޑެ ލަ ފުއެންޓޭ ބުނެފި އެވެ.
ސްޕެއިނުން ފީފާ ވޯލްޑް ކަޕްގެ ޗެމްޕިއަންކަން ރޭ ހޯދީ ފައިނަލް މެޗުގައި އިތުރު ވަގުތުގެ ދެ ހާފު ކުޅެގެން، 1-0 އިން އާޖެންޓީނާ ބަލިކޮށްގެންނެވެ. މިއީ، ސްޕެއިނުން ދުނިޔޭގެ އެންމެ ބޮޑު ފުޓްބޯޅަ މުބާރާތުގެ ތަށި ހޯދި ދެ ވަނަ ފަހަރެވެ. ސްޕެއިނުން އެންމެ ފުރަތަމަ ވޯލްޑް ކަޕް ކާމިޔާބުކުރީ 2010 ވަނަ އަހަރު އެވެ. އޭގެ 16 އަހަރު ފަހުން ދެ ވަނަ ތަށި މި ހޯދީ ވެސް ހަމަ އެއް ނަތީޖާ އަކުން ފައިނަލުގައި މޮޅުވެގެންނެވެ. ދެކުނު އެފްރިކާގައި 2010 ވަނަ އަހަރު ބޭއްވި ވޯލްޑް ކަޕް ފައިނަލުގައި ސްޕެއިނުން ނެދަލެންޑްސް ބަލިކުރީ 1-0 އިންނެވެ.
އަހަންނަށް ސްޕެއިނަކީ ދުނިޔޭގެ އެންމެ މޮޅު ޓީމު: ޑެ ލަ ފުއެންޓޭ
ސްޕެއިންގެ ކޯޗު ލުއިސް ޑެ ލަ ފުއެންޓޭ ގަބޫލުކުރާ ގޮތުގައި މިވަގުތު ދުނިޔޭގެ އެންމެ މޮޅު ޓީމަކީ ސްޕެއިނެވެ. ވޯލްޑް ކަޕްގެ ގަދަ 16 ބުރުގައި އޮސްޓްރިއާއާ ދެކޮޅަށް ނުކުތުމުގެ ކުރިން އޭނާ ބުނީ ޓީމަށް އޮތް އިތުބާރު ބޮޑު ކަމަށާއި، ފޭވަރިޓުން ކަނޑައެޅުމުގެ ބަދަލުގައި މިވަގުތު އެންމެ ބޮޑު އިސްކަމެއް ދެނީ ކުރިއަށް އޮތް މެޗަށް ކަމަށެވެ.
ސާޅީސް އަށް ގައުމުގެ މެދުގައި މި ފަހަރުގެ ވޯލްޑް ކަޕް ކުރިއަށްދިޔައިރު، ސްޕެއިނުން ޗެމްޕިއަންކަން ހޯދީ ކުޅުނު އަށް މެޗުގެ ތެރެެއިން ހަތް މެޗުން މޮޅުވެގެންނެވެ. މޮޅުނުވެވުނީ ފުރަތަަމަ މެޗުގައި ކޭޕް ވާޑާ ލަނޑެއް ނުޖެހި އެއްވަރުވި މެޗުގަ އެވެ. ރޭގެ ފައިނަލަށް ފަހު ޑެ ލަ ފުއެންޓޭ ބުނީ، ސްޕެއިނަށް މި ފަހަރުގެ ވޯލްޑް ކަޕްގެ ކޮންމެ މެޗެއްގައި ވެސް ގިނަ ކަންތައްތަކެއް ދަސްވެގެންދިޔަ ކަމަށެވެ.
"އެއީ އަހަރެމެން ފައިނަލުގައި ތަފާތުކޮށް ފެނުނު ސަބަަބަކީ، އަހަރެމެން ފައިނަލުގައި ވެސް ވަރަށް މޮޅަށް ކުޅެފިން. ދެރަކަމެއް ދެން އަހަރެމެންނަށް ފައިނަލް ތަންކޮޅެއް އަވަހަށް ނިންމައިނުލެވުމަކީ. އެކަމަކު، ގުރުބާނީތަކެއް ވެގެން ކާމިޔާބު ހޯދުމަކީ ވެސް މޮޅު ގޮތެއް،" ޑެ ލަ ފުއެންޓޭ ބުންޏެވެ.
"ކުރިން އަހަރެން ބުނިން، ސްޕެއިނުގައި މި އޮތީ އަހަންނަށް އެންމެ މޮޅު ޓީމޭ. މިހާރު އެހެން ބުނީމަ އެންމެން ވެސް ގަބޫލުކުރާނެ، ޝައްކެއް ނުކުރާނެ،"
ޑެ ލަ ފުއެންޓޭ ބުނީ ސްޕެއިނުން މި ފަހަރުގެ ވޯލްޑް ކަޕް ކާމިޔާބު ކުރުމަށްޓަކައި، ޕޯޗުގަލް އާއި ފްރާންސް އަދި އާޖެންޓީނާ އަތުން ނޮކައުޓްގެ ފަހު މެޗުތަކުގައި މޮޅުވެފައި އޮތުމަކީ ވެސް މިި ވޯލްޑް ކަޕްގައި ސްޕެއިނުން ޓީމެއްގެ ގޮތުގައި ކުރި މަސައްކަތް ސާބިތުވާ ކަމެއް ކަމަށެވެ.
އާޖެންޓީނާއާ ދެކޮޅަށް ރޭ ކުޅުނު ފައިނަލް މެޗުގައި އެ ޓީމުގެ ތަރި، ލިއޮނަލް މެސީ ހިފެެހެއްޓުމަށްޓަކައި، ސްޕެއިނުން ވަކިން ހާއްސަ ވިސްނުންތަކެއް ނުގެންގުޅޭ ކަމަށް ޑެ ލަ ފުއެންޓޭ ބުނެފައިވެ އެވެ. އަދި، ގިނަ ވަގުތު ބޯޅަ ހިފަހައްޓައިގެން ސްޕެެއިނުން ކުޅެފިނަމަ، އާޖެންޓީނާ އަށް މެސީގެ ބޭނުމެއް ހިފޭނެ ގޮތެއް ވެސް ނޯންނާނެ ކަމަށް ވެސް ޑެ ލަ ފުއެންޓޭގެ ވާހަަކައިގައި ފާހަގަކުރި އެވެ.
ސްޕެއިން ގައުމީ ޓީމާ މީގެ ހަތަރު އަހަރު ކުރިން ހަވާލުވި ޑެ ލަ ފުއެންޓޭ ވަނީ އެ ޓީމަށް 2024 ވަނަ އަހަރުގެ ޔޫރޯ ފުޓްބޯޅަ މުބާރާތާއި 2023 ވަނަ އަހަރުގެ ނޭޝަންސް ލީގު ވެސް ކާމިޔާބުކޮށްފަ އެވެ. މިދިޔަ އަހަރުގެ ނޭޝަންސް ލީގުގެ ފައިނަލް މެޗުން ޕެނަލްޓީ ޖަހައިގެން ޕޯޗުގަލް އަތުން ބަލިވި ފަހުން، ސްޕެއިނުން މެޗަކުން ބަލިނުވެ އެވެ. އަދި، ރޭގެ ފައިނަލާ އެކު، ބަލިނުވެ 38 މެޗު ހަމަކޮށް ފުޓްބޯޅައިގައި ރެކޯޑެއް ވަނީ ހަދައިފަ އެވެ. އެއީ، ޖެހިޖެހިގެން އެންމެ ގިނަ މެޗުން ބަލިނުވެ އޮތުމުގެ ރެކޯޑެވެ. މީގެ ކުރިން އެ ރެކޯޑް އޮތީ އިޓަލީ އަތުގަ އެވެ.
މީގެ ކުރިން، ޑެ ލަ ފުއެންޓޭ ވަނީ، 19 އަހަރުން ދަށާއި 21 އަހަރުން ދަށުގެ ޔޫރޯ ފުޓްބޯޅަ މުބާރާތުގެ ޗެމްޕިއަންކަން ސްޕެއިނަށް ހޯދައިދީފަ އެވެ.
