ރާއްޖޭގައި ފުޅާދާއިރާއެއްގައި ލޮލުގެ ފަރުވާގެ ހިދުމަތް ދެމުން އަންނަ އައިކެއާ އޮޕްޓިކަލްގެ 23 ވަނަ އަހަރީ ދުވަސް ފާހަގަކުރުމުގެ ގޮތުން، އައިކެއާއިން ވިއްކާ ހުރިހާ ބްރޭންޑެއްގެ އައިނު ފްރޭމްތަކުންނާއި އަވިއައިނުން 23 ޕަސަންޓުގެ ޑިސްކައުންޓު ލިބޭ ހާއްސަ ޕްރޮމޯޝަނެއް ފަށައިފި އެވެ.
އައިކެއާ އިން ބުނީ މެއި 23، އިން ފެށިގެން ޖޫން 6، ގެ ނިޔަލަށް ކުރިއަށްދާ އެ ޕްރޮމޯޝަންގެ ދަށުން އައިކެއާގެ ހުރިހާ އައުޓްލެޓަކުން ޑިސްކައުންޓް ލިބޭނެ ކަމަށެވެ.
އައިކެއާގެ އެމްޑީ ޑރ. އަބްދުﷲ ޒާހިރު ވިދާޅުވީ ރާއްޖޭގައި ފެންވަރު ރަނގަޅު ލޮލުގެ ސިއްހީ ހިދުމަތްތައް ފޯރުކޮށްދިނުމުގެ ތަސައްވުރާއެކު ހުޅުވި އައިކެއާ އިން މިއަދު ދެކޭ ކާމިޔާބުގެ އަސްލަކީ އެތަނުގެ ހީވާގި މުވައްޒަފުންގެ ބުރަ މަސައްކަތާއި، އައިކެއާގެ ހިދުމަތްތަކަށް ކަސްޓަމަރުންނާއި ޕާޓްނަރުން ކުރާ އިތުބާރު ކަމަށެވެ.
އެގޮތުން އޭނާ ވަނީ އައިކެއާގެ ކަސްޓަމަރުންނާއި ހުރިހާ މުވައްޒަފުން އަދި ޕާޓްނަރުންނަށް ޝުކުރު އަދާކޮށްފަ އެވެ.
މިދިޔަ 23 އަހަރުގެ ތެރޭގައި އައިކެއާ އިން ވަނީ ރާއްޖޭގެ އެކި ސަރަހައްދުތަކަށް ހިދުމަތް ފުޅާކޮށް، ޒަމާނީ ވަސީލަތްތަކާއެކު ފެންވަރު ރަނގަޅު ލޮލުގެ ފަރުވާ އާންމުންނާ ގާތަށް ފޯރުކޮށްދީފަ އެވެ.
އައިކެއާގެ ހުރިހާ އައުޓްލެޓްތަކެއްގައި ކުރިއަށްދާ ޕްރޮމޯޝަނުގެ ދަށުން ދުނިޔޭގެ މަޝްހޫރު ބްރޭންޑްތަކުގެ އައިނުތައް ހެޔޮ އަގުގައި ލިބޭނެ ކަމަށާއި އެކަމާ ގުޅޭ އިތުރު މައުލޫމާތު އައިކެއާގެ ރަސްމީ ވެބްސައިޓް އިން ލިބޭނެ ކަމަށް އެ ކުންފުނިން ބުންޏެވެ.
އައިކެއާގެ އަމާޒަކީ އަބަދުވެސް ކަސްޓަމަރުންނަށް ފައިދާހުރި، އުފާވެރި ތަޖުރިބާތަކެއް ފޯރުކޮށްދީ، ޒަމާނީ ޓެކްނޮލޮޖީއާއިއެކު ފެންވަރު ރަނގަޅު ލޮލުގެ ފަރުވާގެ ހިދުމަތްތައް ފޯރުކޮށްދިނުން ކަމަށް އެ ކުންފުނިން ބުންޏެވެ.
