ރާއްޖޭގެ ބެޑްމިންޓަންގައި ގިނަ އަހަރުތަކެއް ހިދުމަތް ކޮށްދީފައިވާ، އަލީ އަބްދުލް ކަރީމް (ޒޯލާ)، ބެޑްމިންޓަން އޭޝިއާ ސަޓިފައިޑް ރާއްޖޭގެ ފުރަތަމަ ރެފްރީ އަށް ވުމުގެ ޝަރަފް ހޯދައިފި އެވެ.
ބެޑްމިންޓަނުގެ ޓެކްނިކަލް ބައިގެ ތެރެއަށް 1998 ވަނަ އަހަރު ވަދެ އަމްޕަޔަރުކަން ކުރަން ފެށި ޒޯލާ ވަނީ، 2015 ވަނަ އަހަރު ބެޑްމިންޓަން ސަޓިފައިޑް އަމްޕަޔަރުކަން ހާސިލްކޮށްފަ އެވެ. އަދި، އޭގެ ހަތަރު އަހަރު ފަހުން، 2019 ވަނަ އަހަރު ޒޯލާ އަށް ވަނީ، ބެޑްމިންޓަން އޭޝިއާ އެކްރެޑިޓް ރެފްރީގެ ހައިސިއްޔަތު ލިބިފަ އެވެ.
ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ ރައީސް، އިޝްފާން މުހައްމަދު (އިއްޕަ) ވިދާޅުވީ، ޒޯލާ އަށް މި ފުރުސަތު ހޯދައިދިނުމަށްޓަކައި، މިހާރު އޮތް ބެޑްމިންޓަން އެސޯސިއޭޝަންގެ ލީޑަޝިޕުން ފުރަތަމަ ދުވަހުން ފެށިގެން ވެސް މަސައްކަތް ކުރަމުން އައި ކަމަށެވެ.
"އަލީ (ޒޯލާ)ގެ ފަރާތުން މިހާރު އޮތް ބީއޭއެމްގެ އެޑްމިނިސްޓްރޭޝަނަށް ފުރަތަމަ ދުވަހުން ފެށިގެން ވަރަށް ބޮޑު އެއްބާރުލުމެއް ލިބެމުން އަންނަނީ،" އިއްޕަ ވިދާޅުވި އެވެ.
ބެޑްމިންޓަން ދުނިޔޭގެ ފެޑެރޭޝަން (ބީޑަބްލިއުއެފް)ގެ ގިނަ މުބާރާތްތަކުގައި ޒޯލާ ވަނީ މަސައްކަތްކޮށްފަ އެވެ. އެއީ އަމްޕަޔަރެއްގެ ގޮތުގައި އިތުރުން، ރެފްރީ އަކަށެެވެ. އޭނާގެ މަސައްކަތްތަކުގެ އުސްއަލިތަކަށް ބަލާއިރު، ބްރެޒިލްގެ ރިއޯ ޑި ޖެނީރޯގައި 2016 ވަނަ އަހަރު ކުރިއަށްދިޔަ އޮލިމްޕިކްސްގެ ބެޑްމިންޓަން އިވެންޓުގައި އޮފިޝަލްކަން ކުރުމުގެ ފުރުސަތު ހޯދުމާއި، 2019 ވަނަ އަހަރު ނޭޕާލްގެ ކަތުމަންޑޫގައި ކުރިއަށްދިޔަ، ސައުތު އޭޝިއަން ގޭމްސްގެ ބެޑްމިންޓަން އިވެންޓުގެ އިސް ރެފްރީކަން ކުރުން ހިމެނެ އެވެ.
މީގެ އިތުރުން، 2016 ވަނަ އަހަރު ޕާކިސްތާންގައި ބޭއްވި ބީޑަބްލިއުއެފްގެ މުބާރާތެއްގައި ފެނިގެންދިޔަ ޒޯލާ އަކީ، މި ލެވަލްގެ މުބާރާތެއްގައި، އިންސާފުކުރި ފުރަތަމަ ދިވެހި ރެފްރީ އެވެ. އަމްޕަޔަރުކަމާއި ރެފްރީ ކަމުގެ އިތުރުން، ޒޯލާ ވަނީ ޓެކްނިކަލް އޮފިޝަލެއްގެ ގޮތުގައި ވެސް އެކި މުބާރާތްތަކުގައި މަސައްކަތްކޮށްފަ އެވެ.
ކުޅިވަރަށް ހިދުމަތް ކުރުމުގެ ރޮނގުން ޔޫތު އެވޯޑްސް ވެސް ހޯދާފައިވާ ޒޯލާ ވަނީ ބެޑްމިންޓަން އެސޯސިއޭޝަނާއި ގުޅިގެން ބެޑްމިންޓަން ކުރިއެރުވުމަށާއި ޓެކްނިކަލް އޮފިޝަލުން އިތުރުކުރުމަށް ވެސް އެކި ގޮތްގޮތުން މަސައްކަތްތަކެއް ކޮށްފަ އެވެ.
