ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) އިން ދާދި ފަހުން އާންމުކޮށްފައިވާ ރޭންކިން ޕޮއިންޓް ސިސްޓަމާ އެއްގޮތަށް، ތަރުތީބު ކުރި ފުރަތަމަ ގައުމީ ރޭންކިންގައި ރިވައިވަލް ސްޕޯޓްސްގެ ކުޅުންތެރިން އޯޕަން ހުރިހާ އިވެންޓްތަކުގެ އެއް ވަނަ ހޯދައިފި އެވެ.
އެ ގޮތުން، އޯޕަން ފަސް އިވެންޓްގެ އެއް ވަނަ މަގާމުގައި ވެސް އޮތީ ރިވައިވަލް ކުޅުންތެރިންނެވެ.
މިދިޔަ އޭޕްރީލް މަހު 21 ވަނަ ދުވަހު ބީއޭއެމް އިން އާންމުކުރި ރޭންކިން ޕޮއިންޓް ސިސްޓަމްގައި ވަނީ ގައުމީ ބެޑްމިންޓަން މުބާރާތާއި ބީއޭއެމް ޗެމްޕިއަންޝިޕްގެ އިތުރުން، ބީއޭއެމް އިން ރުހުންދޭ މުބާރާތްތަކުގައި ޕޮއިންޓް ދޭނެ ގޮތް ބުނެދީފަ އެެވެ.
އެ ގޮތުން، ސީނިއާ ކެޓަގަރީ އަށް ބަލާއިރު، ގައުމީ މުބާރާތުގެ އެއް ވަނަ އަށް 5000 ޕޮއިންޓް، ދެ ވަނަ އަށް 3500 ޕޮއިންޓް އަދި ތިން ވަނަ އާއި ހަތަރު ވަނަ އަށް 2400 ޕޮއިންޓް ހިމަނާފައިވެ އެވެ. މި ގޮތަށް އެންމެ ދަށް ރޭންކާ ހަމައަށް ޕޮއިންޓް ލިބޭ ގޮތަށް އެކުލަވާލާފައިވާއިރު، އެންމެ ފަހަތުން ނިންމާ ކުޅުންތެރިއަކަށް ވެސް މަދުވެގެން 40 ޕޮއިންޓް ލިބޭނެ އެވެ. ބީއޭއެމް ޗެމްޕިއަންޝިޕްގައި ޗެމްޕިއަނަށް 2500 ޕޮއިންޓް، ދެ ވަނަ އަށް 1750 ޕޮއިންޓް އަދި ތިން ވަނަ ނޫނީ ހަތަރަކަށް 1200 ޕޮއިންޓް ހިމަނާފައިވާއިރު، އެންމެ ފަހަތުން ނިންމާ ކުޅުންތެރިއަކަށް ވެސް މަދުވެގެން 20 ޕޮއިންޓް ލިބޭނެ އެވެ. ބީއޭއެމް އިން ރުހުން ދޭ މުބާރާތެއްގެ އެއް ވަނަ އަށް 1250 ޕޮއިންޓް، ދެ ވަނަ އަށް 875 ޕޮއިންޓް އަދި ތިން ވަނަ އާއި ހަތަރު ވަނަ އަށް 600 ޕޮއިންޓް ލިބޭނެ އެވެ. އަދި، އެންމެ ފަހަތު ބައިން ނިންމާ ކުޅުންތެރިއަކަށް ވެސް މަދުވެގެން 10 ޕޮއިންޓް ލިބޭނެ އެވެ.
އެ ގޮތުން، ފިރިހެން ސިންގަލްސްގެ އެއް ވަނައިގައި އޮތީ 2500 ޕޮއިންޓާ އެކު، ރިވައިވަލްގެ ޒަޔާން ޒަކީ އެވެ. ދެ ވަނައިގައި ރިވައިވަލްގެ ނިބާލް އަހުމަދު 1750 ޕޮއިންޓާ އެކު އޮތްއިރު، ތިން ވަނައިގައި އޮތީ ރިވައިވަލްގެ ހައިޝަމް އިބްރާހިމް އަލީ އާއި ހަސަން ޒަޔާން މުހައްމަދު އެވެ. ދެ ކުޅުންތެރިންނަށް ވެސް ވަނީ 1200 ޕޮއިންޓް ލިބިފަ އެވެ.
އަންހެން ސިންގަލްސްގެ އެއް ވަނައިގައި ރިވައިވަލްގެ ފާތިމަތު ނަބާހާ (ނަބާ)، 2500 ޕޮއިންޓާ އެކު އޮތްއިރު، ދެ ވަނައިގައި ރިވައިވަލްގެ އައިމިނަތު ނަބީހާ (ނަބީ) އޮތީ 1750 ޕޮއިންޓް ހޯދައިގެންނެވެ. ތިން ވަނައިގައި އޮތީ ޔަލްވީ ހުސެއިން ޒުހުރީ އާއި ޝުބާ މުހައްމަދު ޝަރީފް އެވެ. ދެ ކުޅުންތެރިންނަށް ވެސް 1200 ޕޮއިންޓް ލިބިފައިވެ އެވެ.
ފިރިހެން ޑަބަލްސް އެއް ވަނައިގައި ރިވައިވަލްގެ ޒަޔާން އާއި ނިބާލްގެ ޕެއާ އޮތީ 1750 ޕޮއިންޓް ހޯދައިގެންނެވެ. އަންހެން ޑަބަލްސް އެއް ވަނައިގައި ރިވައިވަލްގެ ނަބީ އާއި ނަބާގެ ޕެއާ އެއް ވަނައިގައި އޮތީ 2500 ޕޮއިންޓް ހޯދައިގެންނެވެ. އަދި، މިކްސް ޑަބަލްސްގެ އެއް ވަަނައިގައި ރިވައިވަލްގެ ނިބާލް އާއި ނަބީ، 2500 ޕޮއިންޓާ އެކު އޮތްއިރު، ދެ ވަަނައިގައި ރިވައިވަލް ޒަޔާން އާއި ނަބާ އޮތީ 1750 ޕޮއިންޓާ އެކު އެވެ. ތިން ވަަނައިގައި އޮތް މުހައްމަދު ހިޝާމް ލަތީފް އާއި ނަފްހާ ނަސްރުﷲގެ ޕެއާ އާއި މުހައްމަދު އަޖުފާން ރަޝީދު އާއި އައިޝަތު ޔޫހާ އަހުމަދުގެ ޕެއާ އަށް ވަނީ 2500 ޕޮއިންޓް ލިބިފަ އެވެ.
ގައުމީ ޓީމު ސިލެކްޝަން ވަކިން ކުޅޭނެ: ބެޑްމިންޓަން އެސޯސިއޭޝަން
ބެޑްމިންޓަން އެސޯސިއޭޝަނުން ބުނީ، އެ އެސޯސިއޭޝަނުން އެކުލަވާލާފައިވާ ރޭންކިން ސިސްޓަމް ކޮންމެ މުބާރާތަކަށް ފަހު ވެސް، އެ މުބާރާތެއްގެ ނަތީޖާ ތަކަށް ފަހު ރޭންކް ކުރެވުނު ކަމުގައި ވިޔަސް، އެ އަށް ބަލައިގެން، ގައުމީ ސްކޮޑު އެކުލަވާ ނުލާނެ ކަމަށެވެ. އެ ގޮތުން، ގައުމީ ސްކޮޑު އެކުލަވާނީ ވަކިން ކުޅޭ ސިލެކްޝަނެއް މެދުވެރިކޮށް ކަމަށެވެ.
"އަދަދު ސްޕޯޓްސް" އަށް ބެޑްމިންޓަން އެސޯސިއޭޝަންގެ ރައީސް، އިޝްފާން މުހައްމަދު (އިއްޕަ) ވިދާޅުވީ، މިހާރު އޮތް ލީޑަޝިޕް ހަވާލުވިއިރު، މި އަހަރުގެ ކަލަންޑަރު އެކުލަވާލައިގެން ކަންކަން ކުރިއަށްގެންދަން އޮތް މުއްދަތު ތެރޭގައި، ސިލެކްޝަން ކުޅޭނެ ތާރީހުތަކެއް ކަލަންޑަރުގައި ހިމަނައިގެން ކުރިއަށްގެންދަން އުނދަގޫވެފައި އޮތް ކަމަށެވެ. އެހެން ނަމަވެސް، ކުރިއަށް އޮތް ދެތިން މަހެއްގެ ތެރޭގައިި ނެޝަނަލް ސިލެކްޝަނެއް ކުޅެވިގެންދާނެ ކަމަށް އޭނާ ވިދާޅުވި އެވެ.
"ވިސްނުމަކީ އަހަރަކު ދެ ފަހަރު ނޫނީ ތިން ފަހަރު ނެޝަނަލް ސިލެކްޝަނެއް ކުޅެވިގެންދިއުން. އެ ގޮތަށް ކަލަންޑަރު ކުރެވިިގެން އަންނަ އަހަރުން ފެށިގެން ކުރިއަަށްދާނެ. ދެން، މި އަހަރު ސިލެކްޝަނެއް ކުރިއަށް އޮތް ދެތިން މަސް ތެރޭގައި ކުޅެވޭނެ ކަމަށް މި ބަލަނީ،" އިއްޕަ ވިދާޅުވި އެވެ.
ފުރަތަމަ ފަހަރަށް ހުޅުވާލެވިގެން ގައުމީ ބެޑްމިންޓަން ޓީމުގެ ސިލެކްޝަނެއް ކުރިއަށްދިޔައީ މިދިޔަ އަހަރުގެ އޮގަސްޓް މަހުގަ އެވެ. އެއީ، ބެޑްމިންޓަން އެސޯސިއޭޝަނުގެ ހިންގުން، ކޮމިޓީއެއްގެ ދަށުން ކުރިއަށްގެންދިޔައިރު އެވެ. ރާއްޖޭގެ އެކި ކަންކޮޅުތަކުގެ ކްލަބްތަކުގައި ތަމްރީން ވަމުން އަންނަ ކުޅުންތެރިން ހިމެނޭ ގޮތަށް ގައުމީ ސިލެކްޝަނެއް ކުޅެން ނިންމި ނިންމުމަށް ކުޅުންތެރިން ވަނީ މަރުހަބާ ކިޔައިފަ އެވެ.
ބީއޭއެމްގެ މިހާރުގެ ލީޑަޝިޕްގެ ވިސްނުމަކީ ވެސް ސިލެކްޝަން ކުޅުމުގެ ކަންކަން ރަނގަޅު އުސޫލެއްގެ ތެރެއިން ކުރިއަށްގެންދިއުމެވެ.
