ތިން އަހަރުގެ މެދުކެނޑުމަކަށް ފަހު، ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ އެސޯސިއޭޝަން ޗެމްޕިއަންޝިޕް، އިއްޔެ، ކުޅިވަރު އެކުވެނި އިންޑޯ ބެޑްމިންޓަން ކޯޓުގައި ފަށައިފި އެވެ.
ބެޑްމިންޓަން އެސޯސިއޭޝަނުން އެންމެ ފަހުން އެސޯސިއޭޝަން ޗެމްޕިއަންޝިޕް ބާއްވާފައިވަނީ 2023 ވަނަ އަހަރު އެވެ. ބެޑްމިންޓަން އެސޯސިއޭޝަންގައި ދިމާވި އެކިއެކި މައްސަލަތަކާ ހެދި، ބީޑަބްލިއުއެފްގެ ސަސްޕެންޝަނަކަށް ގޮސް، އޭގެ ފަހުން، ބީއޭއެމްގެ އިންތިހާބެއް ބޭއްވުމާ އެކު، އެ ސަސްޕެންޝަނުން ސަލާމަތްވި އެވެ. އިންތިހާބުވި، އާ ލީޑަޝިޕުން މި އަހަރަށް ބަަޖެޓެއް ފާސްކޮށް، ކަަލަންޑަރެއް އެކުލަވާލައި، އޭގައި ހިމަނައިގެން، އިއްޔެ ފެށި އެސޯސިއޭޝަން ޗެމްޕިއަންޝިޕް، އަންނަ ހޯމަ ދުވަހުގެ ނިޔަލަށް ކުރިއަށްދާނެ އެވެ.
ޖުމްލަ އެކު، ހަ ދުވަހުގެ މުއްދަތަށް ކުރިއަށްދާ މި މުބާރާތުގައި، ޖުމްލަ އެކު، 213 ކުޅުންތެރިން ވާދަކުރާއިރު، 28 އިވެންޓަކަށް 296 އެންޓްރީސް ވަނީ ހަދައިފަ އެވެ.
އެހެން ނަމަވެސް، މި މުބާރާތް ކުރިއަށްދަނީ، ސްކޫލް ދުވަސްވަރެއްގައި ކަމަށްވާތީވެ، ރަށްރަށުގައި ތިބި ގިނަ ކުޅުންތެރިންތަކަކަށް މުބާރާތުގައި ކުޅުމުގެ ފުުރުސަތު ނުލިބޭކަން އެކަޑަމީތަކުން ވަނީ ފާހަގަކޮށްފަ އެވެ. އޭގެއިން އެއް އެކަޑަމީ އަކީ، ނައިފަރު އެކަޑަމީ އެވެ.
މުބާރާތުގެ ފޯމެޓްތައް ރޭވިފައިވާ ގޮތަށް ބަލާއިރު، 9 އަހަރުން ދަށް، 11 އަހަރުން ދަށް، 13 އަހަރުން ދަށް، 15 އަހަރުން ދަށް އަދި 19 އަހަރުން ދަށުގެ އުމުރުފުރާގެ އިތުރުން، އޯޕަން ކެޓަގަރީ ވަނީ ހިމަަނައިފަ އެވެ.
މި މުބާރާތަކީ، ރާއްޖޭގެ ގައުމީ ބެޑްމިންޓަން ޓީމުގެ ކުޅުންތެރިންނަށް ދެ އަހަރަށް ފަހު، ގައުމީ ލެވަލްގައި މި ގޮތަށް ވާދަކޮށްލަން އެސޯސިއޭޝަނުން ބާއްވާ ފުރަތަމަ މުބާރާތެވެ.
